Read Moba 2 Kuolent-tieb 8 Bible Online

2 Kuolent-tieb 8 - Moba bible

2 Kuolent-tieb 8

¹T nɑɑ wɑɑs, t luon k i bɑnn lin nbɑ k Yennu ninkpɑbɑɔnŋ tun *Klistu mɔtɑɑɔk niib nbɑ be Mɑɑseduɑnn nɑ sinsuuk ni nɑ po e.

²B din lɑ fɑlɑ bonciɑnn b biknu ni, b pɑlpienn din yɑb hɑli nɑn bin wɑnn b bulcint nɑn bɑɑ lek tie tɑlɑs-dɑnm nɑ wɑɑ.

³N sɑɑ fit tien b *siɑlɑ nɑn bɑɑ din mɔk lin nbɑ, b din tul nɑn b pɑnŋ telk e, k ponŋ din sɑɑ gɑl bɑɑ bo sɑɑ tul biɑnŋ nbɑ gbɑɑ. B yɑnbuɑt ni,

⁴b din bɑln’t ɑ tin cɑb’b k bin sonm Yennu niib.

⁵B din tul k l gɑl tɑɑ ponŋ din duki ɑ b sɑɑ tul biɑnŋ nbɑ. Sinsinn b jii b mɔnŋ e k tul Yonmdɑɑnɔ, k ji fit jii b mɔnŋ k tul tinm, Yennu lonm ni.

⁶Ŋɑnn e k t din bɑln Tiit ɑ wun sɑɑn i buol ni kii sɑɑ kii tuun tuonn mɑnŋ nɑn wɑɑ din piin nɑ, ɑ wun fit sonm’i ɑ yin tun bulcint tuonn mɑnŋ k gbenn.

⁷Tɔn, i mɔk bont kul ɑ. I tien Yiesu yɑdɑ, k biɑ fit piɑk fɑnu k biɑ mi bonciɑnn, k biɑ tuun tuonn nɑn ninmɔnn k biɑ luon’t bonciɑnn. Yɑɑ tuun lin nbɑ nɑ kul bonciɑnn nɑ, t luon k yii tuun bulcint tuonn mɑnŋ mun bonciɑnn.

⁸N k senn sennu kɑɑ k tul’i, ŋɑɑn n wɑnt’i i lieb nbɑ tuun nɑn ninmɔnn bɑnnu nbɑ e, ɑ lin wɑnn’i sɔnu nbɑ k i sɑɑ tɔkn k wɑnn i lonm nbɑ yɑb bɑnnu nbɑ.

⁹K mɑɑn, i mi t Yonmdɑɑnɔ Yiesu Klistu ninkpɑbɑɔnŋ nbɑ tie bɑnnu nbɑ. U din tie mɔktɔ e, ŋɑɑn k i pɑɑk k u din kpɑnt tɑlk, ɑ u tɑlɑs mɑnŋ n te k yin tien mɔktɑ.

¹⁰Dudukt nbɑ k n sɑɑ tul’i k jiin l po tie nnɑ e. L ŋɑn k yin tukn kii tuun yɑɑ din piin lin nbɑ binn po nɑ. Yinm e din dɔnŋ lieb k l k tie yɑɑ din tun nnɑ kuukuɑ pɑɑk kɑɑ, ŋɑɑn yɑɑ din mɔk dudukt nbɑ sɑɑ fit tun nnɑ nɑ pɑɑk.

¹¹Mɔtɑɑnɑ i tun tuonn mɑnŋ k tont mɑn. Tumn mɑn l tuonn k tont nɑn lonm nɑn yɑɑ din piin nɑn lonm bɑnnu nbɑ nɑ. I tun nnɑ mɑnŋ nɑn yɑɑ mɔk lin nbɑ.

¹²L i tie k suɑ luon wun tul siɑl i e, Yennu sɑɑ gɑɑl’l k mɑɑn u goli lin nbɑ k l dɑɑnɔ mɔk e, ŋɑɑn k k goli lin nbɑ k u k mɔk.

¹³N k luon k yin tul lieb ŋɑɑn di fɑlɑ l pɑɑk. N luon k i kul i jɑn e.

¹⁴Yɑɑ mɔk k l yɑb mɔtɑɑnɑ nɑ, l ŋɑn k yin sonm bin nbɑ k mɔk nɑ, k l i tie k i mun tɑn k mɔk yuo nbɑ, b mun sɑɑ fit sonm’i wɑɑ. Ŋɑnn e sɑɑ te k i kul i jɑn nɑn lieb

¹⁵nɑn lɑɑ diɑn Yennu lolkpel kɑdɑɑɔk ni biɑnŋ nbɑ nɑ ɑ: «Wun nbɑ din tɔkl bonciɑnn nɑ, u din k dii k tenn, k wun nbɑ tɔkl wɑɑnm-nnɑ nɑ, l din k pɔt’ɔ.»

¹⁶Yennu yen niipuouk nɑn wɑɑ te k Tiit bɑkɑ be i ni nɑn t bɑkɑ nbɑ mun be i ni biɑnŋ nbɑ nɑ,

¹⁷k mɑɑn tɑɑ bɑln’mɔ ɑ wun sɑɑn i buol ni nɑ, u sɑk ɑ, ŋɑɑn u mɔnŋ mɔnŋ nunm mɔn nɑn wun sɑɑn i buol ni, k u dɑɑn yɑɑ wun sɑɑn nɑn u mɔnŋ lonm.

¹⁸T tɑn sɑɑ te k t nɑɑ bisiɑk n wei’ɔ k sɑɑn i buol ni. T nɑɑ bik nɑ nbɑ muɑntl Klistu lɑbɑmɑnn biɑnŋ nbɑ nɑ pɑɑk te k Klistu mɔtɑɑɔk niib nbɑ be nɑ kul piɑk’ɔ bonciɑnn.

¹⁹B biɑ lukt t nɑɑ bik mɑnŋ ɑ wun ciɑn’t k tii tuun bulcint tuonn nɑ k l sɑɑ pukn Yonmdɑɑnɔ *yudɑnt, k biɑ wɑnn nɑn t luon k tin sonm t lieb.

²⁰T luon tin lɔkt bɑnnu nbɑ k niib sɑɑ tɑɑl’t tɑɑ tun nɑn piini nɑ bɑnnu nbɑ nɑ e.

²¹T k yɑbi t mɔnŋ pɑɑk, ɑ t tun lin nbɑ ŋɑn Yennu nunm ni kuukuɑ kɑɑ, ŋɑɑn t luon k tin tun lin nbɑ ŋɑn e niib nuni ni mun.

²²T sɑɑ tun t nɑɑ biliek mun k wun ciɑn’m i buol ni. Yuo kul, t lɑɑt t nɑɑ bik mɑnŋ binbenŋ nbɑ tie biɑnŋ nbɑ, k bɑnn nɑn u nunm set mɔn Yennu tuonɑ pɑɑk, ŋɑɑn mɔtɑɑnɑ u ji mɑntk luon k wun sɑɑn i buol ni, k mɑɑn wɑɑ duu i pɑɑk nɑ pɑɑk.

²³Lin nbɑ be k jiin Tiit po tie nnɑ e, u tie n tuontunluɑ e k tuun tien’i. Ŋɑɑn t nɑɑ wɑliet nbɑ ciɑnt’ɔ nɑ ŋɑnin, b tie Klistu mɔtɑɑɔk niib tuomiinbɑ e k tuun lin nbɑ sɑɑ dont Klistu sɑnn.

²⁴L pɑɑk, i wɑnn t nɑɑ wɑɑs nɑn i luon’m nɑn bɑlmɔni, ɑ k Klistu mɔtɑɑɔk niib n set bɑnn nɑn tɑɑ piɑk’i biɑnŋ nbɑ nɑ, t mɔk mɔni.