Read Moba Gɑɑlɑɑt-tieb 1 Bible Online

Gɑɑlɑɑt-tieb 1 - Moba bible

Gɑɑlɑɑt-tieb 1

¹Min Pɔul nbɑ tie *Klistu *tuomi nɑ, nisɑɑli kɑɑ tun’n, nisɑɑlk kɑɑ biɑ tien’n Klistu tuomi, ŋɑɑn Bɑɑ Yennu nɑn Yiesu Klistu nbɑ k u din fiin’ɔ kuun ni nɑ e din lukt’n. Min Pɔul nɑn t nɑɑ wɑɑs nbɑ be nnɑ nɑ kul fuont Klistuweilɑ nbɑ be Gɑɑlɑɑti tinŋ ni.

³T Bɑɑ Yennu nɑn Yonmdɑɑnɔ Yiesu Klistu ii mɔk ninkpɑbɑɔnŋ nɑn’i, k biɑ tul’i mɑnu.

⁴Yiesu Klistu e din cɑb u mɔnŋ t biit pɑɑk, ɑ wun fɑt’t tingbounŋ nbɑ mɔk biit nɑ ni nɑn t Bɑɑ Yennu nbɑ luon bɑnnu nbɑ.

⁵Ŋuɑ Yennu kuukuɑ e yen dontl nɑn yuo nbɑ kɑɑ gbennu. * Amenn.

⁶L bɑkt’n e nɑn yɑɑ nyik Yennu yiɑn ɑ, wun nbɑ din yiin’i Klistu ninkpɑbɑɔnŋ ni, ŋɑɑn gɑɑn lɑbɑmɑnliɑ.

⁷Setk nɑn mɔni, lɑbɑmɑnliɑ kɑɑ, ŋɑɑn nisiɑb be k yɑbi b mɔnŋ pɑɑk ɑ bin ŋmɑt i dudukt, k biɑ lebt k biil Klistu lɑbɑmɑnn nɑ.

⁸L i lek i tie *Yendɔunŋ ni *mɑlɑkɑ ɑmi tinm i muɑnt lɑbɑmɑnsiɑl k l be l kuukuɑ k k tie tɑɑ ponŋ din muɑnt lin nbɑ tul’i nɑ, mɔpol ii be t kul ɑ pɑɑk!

⁹T ponŋ din yet’i e wɑɑ, ŋɑɑn n biɑ ŋɑnmt yien’i e mɔtɑɑnɑ: nisuɑ i muɑnt lɑbɑmɑnsiɑl k tul’i k l k tie lin nbɑ k i din gɑɑl nɑ, mɔpol ii be u pɑɑk.

¹⁰N yiɑb mɑɑ n gɑɑl nisɑɑlk pɑku kuo Yennu yɑl e? N luon k mii tun lin nbɑ k niib luon ɑmi ii? L i tie k n luon k mii tuun lin nbɑ k niib luon nɑ, n ji kii tie Klistu tuontunnɔ.

¹¹N nɑɑ wɑɑs, n yɑɑ n tiɑl’i nɑn lɑbɑmɑnn nbɑ k n muɑnt nɑ k nyii nisɑɑlk buol ni kɑɑ,

¹²k mɑɑn n din k gɑɑl’l nisɑɑlk buol ni kɑɑ, ŋɑɑn Yiesu Klistu mɔnŋ mɔnŋ e din fiit wɑnn’n.

¹³I ponŋ gbɑt mɑɑ din tuun biɑnŋ nbɑ yuo nbɑ k n din wɑɑ *Suifnbɑ jɑɑnti nɑ. L yuo nɑ n din tuu muksl Yennu mɔtɑɑɔk niib bonciɑnn, k yɑbi n mɔnŋ mɑɑ n biil’b k gbenn.

¹⁴Tinm Suifnbɑ sinsuuk ni, min e din gɑl tuɑnn n wɑɑkl ni t jɑɑnti sɔnu ni, k mɑɑn n din jii n pɑl kul ɑ k wɑɑ t yejɑnm kɑɑl nbɑ wɑnt lin nbɑ e.

¹⁵Ŋɑɑn Yennu din lukt’n u ninkpɑbɑɔnŋ pɑɑk, k b dɑɑ din k mɑln, k yiin’n ɑ mɑn tun u tuonɑ.

¹⁶Yuo nbɑ k u din dukn nɑn l ŋɑn, k u din nyinn u Bik mɑnŋ pɑɑnu ni k wɑnn’n ɑ n muɑnt u lɑbɑmɑnn k tul bin nbɑ k tie Suifnbɑ. L yuo mɑnŋ, n din k sɑɑn nisɑɑlk buol ni k sɑɑ fɑɑ suɑ bɑɑnn.

¹⁷N biɑ din k sɑɑn Selusɑɑlenm k sɑɑ lɑ bin nbɑ din dɔnŋ tien tuomiinbɑ nɑn’n nɑ, ŋɑɑn n din fiil e l tɑɑkpɑɑk ni k sɑɑn Alɑɑbi tinŋ ni. L puolpo e k n ŋmɑt sɑɑn Dɑɑmɑɑs duo ni.

¹⁸Binɑ ŋɑntɑ puolpo e k n din tɑn sɑɑn Selusɑɑlenm mɑɑ n bɑnn Piɑl, k din biɑl u buol ni dɑɑ piik nɑn ŋɑnŋmu.

¹⁹N ji din k lɑ tuomiinbɑ nɑ ni suɑ k pukn, sie Sɑɑk, Yonmdɑɑnɔ ninjɑ nɑ.

²⁰Yennu mɔnŋ mi nɑn mɑɑ diɑn lin nbɑ nɑ tie bɑlmɔni e k fɑɑk kɑɑ lenŋ.

²¹L puolpo e k n din sɑɑn Siili nɑn Siiliisi cinciɑɔnŋ po.

²²L yuo nɑ k Klistuweilɑ nbɑ be Suude tinŋ ni nɑ din k mi’n.

²³Bɑɑ din mi lin nbɑ din tie b lieb nbɑ din yien ɑ: «Juɑ nbɑ din tuu muks tinm nɑ, mun ji diɑ lɑbɑmɑnn nbɑ k u din yɑɑ wun biil nɑ e, k muɑntl tien niib.»

²⁴K b din piɑk Yennu n pɑɑk lin nbɑ nɑ po.