Read Moba Gɑɑlɑɑt-tieb 2 Bible Online

Gɑɑlɑɑt-tieb 2 - Moba bible

Gɑɑlɑɑt-tieb 2

¹Tɔn, l binɑ piik nɑn ŋɑnnɑ puolpo e, k min nɑn Bɑɑlnɑɑbɑɑs din ŋmɑt sɑɑn Selusɑɑlenm, k n jii Tiit mun.

²Yennu e din fiit l sɔnu sɑɑnu pɑɑnu ni k wɑnn’n, l pɑɑk e te k n sɑɑn. Lenŋ e k n yiin Klistuyɑb sɑɑkɑb nɑ, t kuukuɑ, k wɑnn’b lɑbɑmɑnn muɑnti nbɑ k n muɑntl k tien bin nbɑ k tie *Suifnbɑ nɑ, k mɑɑn n din k luon mɑɑ ponŋ tun lin nbɑ, kuo mɑɑ tuun lin nbɑ nɑ n tɑn biɑl yɑnn k nyuɑt kɑɑ.

³Tɔn, n tɔk-nɑn-luɑ Tiit tie Gles nilɔ e, ŋɑɑn suɑ din k miɑ’u ɑ wun pot u punn.

⁴L mɑɑn din kɑn bɑɑl, ŋɑɑn nisiɑb nbɑ fɑ fɑɑk b mɔnŋ pɑɑk, ɑ b mun tie Klistuweilɑ nɑ din kuɑ t sinsuuk ni wuol ni, ɑ bin piki k bɑnn tɑɑ mɔk yent-n-mɔnŋ Yiesu *Klistu ni biɑnŋ nbɑ k biɑ luon tii tie Muois *senni dɑɑbɑ nɑ.

⁵Ŋɑɑn tɑɑ mun luon tin diɑ lɑbɑmɑnn nɑn l bɑlmɔni sɔnu k tul’i nɑ pɑɑk, t k sɑk tul’b nɑn wɑɑnm-nnɑ wɑɑ.

⁶Bin nbɑ k b yi’b sɑɑkɑb nɑ, b i tie nijɑɑnɑ ɑmi b i kii tie i e, l k kpɑɑ tɑlɑs min yɑɑ buol, k mɑɑn Yennu k biki nɑn ningɑnni. Ŋɑnm nbɑ k b yi’b sɑɑkɑb nɑ din k pukn’n sennsɑi.

⁷Ŋɑɑn bɑɑ set lɑ lin nbɑ n buol ni tie Yennu nbɑ lukt’n, ɑ n muɑnt u lɑbɑmɑnn k tul bin nbɑ k tie Suifnbɑ nɑ, nɑn biɑnŋ nbɑ k u din lukt Piɑl, ɑ wun muɑnt l lɑbɑmɑnn k tul Suifnbɑ nɑ.

⁸K mɑɑn Yennu nbɑ din tien Piɑl *tuomi k tul Suifnbɑ nɑ e, mun din tien’n *tuomi k tul bin nbɑ k tie Suifnbɑ nɑ.

⁹Sɑɑk nɑn Piɑl nɑn Sɑn nbɑ din tie nɑn jɑɑntɑli nɑ, din bɑnn nɑn Yennu e tul’n tuongɑnkɑl nɑ, k b din fuont min nɑn Bɑɑlnɑɑbɑɑs k t yok lieb nii ni k ŋɑnn e din wɑnt ɑ t kul ɑ mɔk mɔtɑɑɔk nɑn t lieb. Tinm nɑn ŋɑnm din sɑk e ɑ min nɑn Bɑɑlnɑɑbɑɑs i muɑntl lɑbɑmɑnn kii tien bin nbɑ k tie Suifnbɑ nɑ, k b mun i muɑntl kii tien Suifnbɑ.

¹⁰Bon-yenn nbɑ k b din yet’t din tie: ɑ t dɑɑ tɑnmt tɑlɑs-dɑnm nbɑ be b sinsuuk ni nɑ po. L mun e k n set ponŋ din luon tumu.

¹¹Ŋɑɑn yuo nbɑ k Piɑl bɑɑl Antiɑɔs nɑ, n din yɑki nɑn’ɔ niib ni, k mɑɑn u din mɔk biit.

¹²Sɑɑk din tun nisiɑb Antiɑɔs duo ni, k bɑɑ din dɑɑ k bɑɑl yuo nbɑ nɑ, Piɑl din lɑkn di jiet nɑn bin nbɑ k tie Suifnbɑ. Ŋɑɑn bɑɑ tɑn bɑɑl yuo nbɑ, k u ji kpɑt kpinŋ k k sɑk wun di nɑn’m, k mɑɑn u din tiin niib nbɑ tien *punpotu yɑdɑ nɑ e.

¹³L pɑɑk, k Suifnbɑ lieb nɑ mun piin tuun nɑn Piɑl nɑ, k Bɑɑlnɑɑbɑɑs mɔnŋ mun ŋmɑt k wɑɑ b bontitiet mɑnŋ.

¹⁴Mɑɑ lɑ k b k tɔkn lɑbɑmɑnn sɔnu nɑn bɑlmɔni yuo nbɑ, k n yet Piɑl, b kul nunm ni, mɑɑ: «Fɑɑ bɑɑl nnɑ, ɑ binbenŋ tie nɑn wun nbɑ k tie Suif nilɔ nɑ e. Ŋɑɑn mɔtɑɑnɑ, bee k ɑ muks bin nbɑ k tie Suifnbɑ, ɑ bii be nɑn Suifnbɑ nɑ?»

¹⁵Tɔn, t tie Suifnbɑ mɑti e, t k tie nibuolgɑnm nbɑ k b yi’b biitdɑnm nɑ kɑɑ,

¹⁶k t mi nɑn sie k nilɔ n tien Yiesu Klistu yɑdɑ, ŋɑnn e sɑɑ te k Yennu n yet ɑ u tie niŋɑnɔ u buol. L k tie tɑɑ tuun senni nbɑ yɑɑ tii tuun lin nbɑ pɑɑk kɑɑ. L pɑɑk, t mɔnŋ mun tien Yiesu Klistu yɑdɑ, ɑ Yennu n yet ɑ t tie niŋɑnm u buol yɑdɑ mɑnŋ pɑɑk e, ŋɑɑn l k tie senni tuonɑ tumu pɑɑk kɑɑ. K mɑɑn Yennu kɑn yet ɑ suɑ tie niŋɑnɔ u buol senni mɑnŋ tuonɑ tumu pɑɑk.

¹⁷L i tie k t yɑbi ɑ Yennu n yet ɑ t tie niŋɑnm u buol Klistu pɑɑk, ŋɑɑn t biɑ lɑ nɑn t mun tie biitdɑnm e, ŋɑnn e wɑnt nɑn Klistu e te k niib tuun biit ɑmi ii? Aɑi, l k wɑnt nnɑ kɑɑ.

¹⁸Tɔn, mi i jinŋ i ŋɑnmt mɑɑ lin nbɑ k n din yet nɑ i e, Ŋɑnn n wɑnt nɑn n mɔnŋ tie biitdɑɑnɔ e nɑ.

¹⁹K mɑɑn senni te k n kpo senni mɑnŋ buol, ɑ mii mɔk mɑnfuol Yennu buol. L tie nɑn senni mɑnŋ din tɑɑn kpɑɑ min nɑn Klistu dɑpunpunn pɑɑk nɑ e.

²⁰L pɑɑk, mɑnfuol nbɑ k n mɔk n gbɑnɑnt ni mɔtɑɑnɑ, n mɔk l mɑnfuol mɑɑ tien Yennu Bijɑ yɑdɑ nɑ e. Ŋuɑ din luon’n k din cɑb u mɑnfuol n pɑɑk.

²¹N k nyik Yennu ninkpɑbɑɔnŋ kɑɑ. L i tie k Yennu bo sɑɑ yet ɑ nilɔ nbɑ sɑk senni nɑ e tie niŋɑnɔ u buol, l bo wɑnt nɑn Klistu kuun mɑnŋ tie yɑnn e.