Read Moba Gɑɑlɑɑt-tieb 3 Bible Online

Gɑɑlɑɑt-tieb 3 - Moba bible

Gɑɑlɑɑt-tieb 3

¹Yinm Gɑɑlɑɑtitieb, bonjɑtɑ nɑ! Yinm nbɑ k t ponŋ din wɑnn’i Yiesu *Klistu dɑpunpunn pɑɑk kuun po nyik nyik nɑ, ŋmee jin tɑn lol’i ni?

²I yet’n bon-yenn kuɑ mɑn. Yɑɑ din cɔln *senni nɑ pɑɑk e din te k i gɑɑl Foŋɑnm ɑmi yɑɑ din gbɑt lɑbɑmɑnn nɑ, k tien yɑdɑ nɑ pɑɑk e din te k i gɑɑl’ɔ?

³Bee te k i k mɔk yɑn i? I din piin Klistuweiu nɑn Foŋɑnm e. I ji tɑn luon yin juont nɑn i mɔnŋ mɔnŋ pɑnŋ ee?

⁴I din gɑɑl Foŋɑnm k biɑ lɑ bɑktnɔunŋ tuonjɑɑnɑ nɑ yɑnn ee? Aɑi l din k tien yɑnn kɑɑ.

⁵Yɑɑ tun senni tuonɑ nɑ pɑɑk e te k Yennu tul’i Foŋɑnm k tuun yɑɑl-lituk tuonɑ i sinsuuk ni ɑmi yɑɑ gbɑt lɑbɑmɑnn k tien yɑdɑ nɑ pɑɑk e?

⁶L diɑn Yennu lolkpel kɑdɑɑɔk ni ɑ: «Ablɑɑhɑɑnm din tien Yennu yɑdɑ, l pɑɑk, k Yennu din yet ɑ u tie niŋɑnɔ u buol.»

⁷Ŋɑnn e k l ŋɑn yin bɑnn nɑn niib nbɑ tien Yennu yɑdɑ nɑ, ŋɑnm e tie Ablɑɑhɑɑnm yɑɑbuonɑ.

⁸K l biɑ din diɑn Yennu lolkpel kɑdɑɑɔk ni, ɑ Yennu tɑn sɑɑ yet ɑ bin nbɑ k tie *Suifnbɑ mun tie niŋɑnm u buol b yɑdɑ pɑɑk. L pɑɑk e k lɑbɑmɑnn mɑnŋ diɑn Yennu lolkpel kɑdɑɑɔk ni k tul Ablɑɑhɑɑnm ɑ: «A pɑɑk e k nisɑɑli buolu buolu kul ɑ sɑɑ lɑ yetŋɑnm.»

⁹L pɑɑk, Yennu yɑt yetŋɑnm bin nbɑ tien’ɔ yɑdɑ nɑ pɑɑk, nɑn wɑɑ din yɑt yetŋɑnm Ablɑɑhɑɑnm nbɑ din tien’ɔ yɑdɑ nɑ pɑɑk.

¹⁰Ŋɑɑn bin nbɑ duki nɑn b tie niŋɑnm b senni weiu nɑ pɑɑk nɑ, Yennu mɔpol be b pɑɑk, k mɑɑn l diɑn Yennu lolkpel kɑdɑɑɔk ni ɑ: «Wun nbɑ k wɑɑ senni kul nbɑ diɑn kɑdɑɑɔk mɑnŋ ni nɑ, Yennu mɔpol be u pɑɑk.»

¹¹Ŋɑnn e wɑnt fɑnu nɑn senni diɑnu kɑn fit te k nilɔ i tie niŋɑnɔ Yennu buol ni, k mɑɑn l diɑn Yennu lolkpel kɑdɑɑɔk ni ɑ: «Wun nbɑ k Yennu yien ɑ u tie niŋɑnɔ u buol u yɑdɑ nɑ pɑɑk, l dɑɑnɔ sii mɔk mɑnfuol.»

¹²Ŋɑɑn senni diɑnu nɑn yɑdɑ tienu bɔkt ɑ, k mɑɑn l diɑn Yennu lolkpel kɑdɑɑɔk ni ɑ: «Dɑɑnɔ nbɑ wɑɑ senni kul fɑnu sii mɔk mɑnfuol.»

¹³Klistu tiɑɔnŋ o din gɑɑl t pɑɑk, k din be mɔtonm mɑnŋ ni k nyinn’t l mɔtonm ni, k mɑɑn l diɑn Yennu lolkpel kɑdɑɑɔk ni ɑ: «Wun nbɑ k b kpɑɑ’u dɑpunpunn pɑɑk nɑ, Yennu mɔtonm be u pɑɑk.»

¹⁴L din tie nnɑ e Yiesu Klistu ni, ɑ bin nbɑ k tie Suifnbɑ n lɑ yetŋɑnm nbɑ k Yennu din yɑt Ablɑɑhɑɑnm pɑɑk nɑ. K t i tien yɑdɑ tin gɑɑl Foŋɑnm nbɑ k Yennu din senn mɔsonn ɑ wun tul’t nɑ.

¹⁵N nɑɑ wɑɑs, ŋɑɑnt k n jii nisɑɑli binbenŋ k bikn k yin bɑnn lin nbɑ k n yien’i nɑ pɑɑk: niib bɑnle i sɑk lol ɑ bin tun siɑl k pot muɑnu nɑn lieb, b yenɔ kuɑ ji kɑn fit nyi u luɑ nɑ puolpo nɑn wɑɑn ɑ.

¹⁶Tɔn, Yennu din tul Ablɑɑhɑɑnm nɑn u yɑɑbuonn e u mɔsonɑ mɑnŋ. L k diɑn Yennu lolkpel kɑdɑɑɔk ni ɑ: «nɑn u yɑɑbuonɑ» kɑɑ, k l pɑɑk sii tie niib bonciɑnn. Ŋɑɑn l diɑn ɑ: «nɑn yɑɑbuonn e,» k l pɑɑk tie yɑɑbuonyenɔ kuɑ, k ŋuɑ e tie Klistu.

¹⁷Mɑɑ wɑnt lin nbɑ tie nnɑ e: Yennu din senn mɔsonn, k senni nbɑ din tɑn bɑɑl binɑ kobi ŋɑnnɑ nɑn piintɑ puolpo nɑ, l din kɑn fit kpien lin nbɑ k Yennu din *lol k senn nɑ, k biɑ kɑn fit k kpien u mɔsonn mɑnŋ.

¹⁸Ŋɑɑn l i tie k niib sɑɑ cɔln senni e wɑɑ, k fit lɑ Yennu nbɑ sɑɑ tul’b piini nbɑ, ŋɑnn piini nbɑ k b gɑɑl nɑ k nyii mɔsonn nɑ ni kɑɑ.

¹⁹L i bo i tie nnɑ i e, senni nɑ nyuɑt tie bee? Biit pɑɑk e, k Yennu din tul nifosɑɑli senni nɑ k pukn u mɔsonn nɑ pɑɑk, k din luon ɑ senni mɑnŋ i diɑ’b mɔkmɔk nɑn yuo nbɑ k Ablɑɑhɑɑnm yɑɑbuonn nbɑ k Yennu din senn mɔsonn k tul’ɔ nɑ n tɑn bɑɑl. K *mɑlɑkɑɑnbɑ din jii senni mɑnŋ k tien nisɑɑlk nuu ni ɑ wuu tie bɑlŋɑnmtuɑ,

²⁰k mɑɑn l i tie k nilɔ tie u kuukuɑ, bɑlŋɑnmtuɑ k siɑn, ŋɑɑn Yennu tie u kuɑ e.

²¹Tɔn, ŋɑnn e wɑnt nɑn senni nɑ kɔn nɑn Yennu mɔsonɑ ɑɑ? Aɑi, l k wɑnt nnɑ nɑn wɑɑn ɑ. K mɑɑn Yennu i bo i senn senni nbɑ sɑɑ fit tien nilɔ mɑnfuol, u bo sɑɑ yet ɑ niib tie niŋɑnm u buol senni mɑnŋ weiu pɑɑk ɑ.

²²Ŋɑɑn l diɑn Yennu lolkpel kɑdɑɑɔk ni ɑ tingbounŋ kul sɑɑk be biit yiikuo ni e, ɑ Yennu n tul bin nbɑ tien yɑdɑ nɑ piini nbɑ k u din senn mɔsonn ɑ u sɑɑ tul’b nɑ. B yɑdɑ nɑn Yiesu Klistu nɑ pɑɑk e k u sɑɑ tul’b.

²³Senni nɑ din tuu diɑ’t nɑn dɑnsɑli nɑ e k tɑn bɑɑl yuo nbɑ k Yennu fiit yɑdɑ tienu lɑbɑɑl k wɑnn’t nɑ.

²⁴L pɑɑk, senni nɑ din ŋmɑn t guutuɑ nbɑ diɑ’t mɔkmɔk nɑn yuo nbɑ k Klistu tɑn bɑɑl ɑ tin tien’ɔ yɑdɑ, k Yennu n yet ɑ t tie niŋɑnm u buol t yɑdɑ nɑ pɑɑk.

²⁵Mɔtɑɑnɑ, yɑdɑ tienu lɑbɑɑl nbɑ bɑɑl nɑ, senni ji k tie t guutuɑ.

²⁶Yɑɑ tien Klistu yɑdɑ nɑ, ŋɑnn pɑɑk e k i tie Yennu wɑɑs,

²⁷k mɑɑn yinm nbɑ kul k b din wul’i Yennu nyunwulu Klistu sɑnn ni nɑ, yinm e gɑɑl u mɔnŋ mɔnŋ binbenŋ.

²⁸L pɑɑk, bɔktu ji k be bin nbɑ tie Suifnbɑ nɑn bin nbɑ k tie Suifnbɑ sinsuuk ni, l biɑ k be bin nbɑ tie dɑɑbɑ nɑn yent-n-mɔnŋ dɑnm sinsuuk ni. Bɔktu biɑ k be puob nɑn jɑb sinsuuk ni. Yɑɑ be Yiesu Klistu ni nɑ pɑɑk e te k i kul ɑ tie yenɔ kuɑ.

²⁹K i tie Klistuyɑb i e, ŋɑnn i tie Ablɑɑhɑɑnm yɑɑbuonɑ e, k tɑn sɑɑ gɑɑl piini nbɑ k Yennu din senn mɔsonn nɑn u sɑɑ tul’b nɑ.