Read Moba Gɑɑlɑɑt-tieb 4 Bible Online

Gɑɑlɑɑt-tieb 4 - Moba bible

Gɑɑlɑɑt-tieb 4

¹Tɔn, mɑɑ biɑ yɑɑ n ŋɑnm yet lin nbɑ e nɑ: ŋɑɑk bik nbɑ lek tuu tɑn sɑɑ di u bɑɑ fɑɑl nɑ, ŋɑɑn yuo nbɑ k u dɑɑ tie bonbunn nɑ, u dɑɑ tuu tie nɑn dɑɑbl nɑ e, ŋɑɑn u bɑɑ fɑɑl mɑnŋ lek tie u yɑl.

²Wɑɑ dɑɑ tie bonbunn yuo nbɑ nɑ, nisiɑb e tuu diɑ k wubi’ɔ mɔkmɔk nɑn lɑɑ tɑn sɑɑ jɑnŋ yuo nbɑ k u bɑɑ senn nɑ.

³T mun din tie nnɑ e. Yuo nbɑ k t din tie nɑn bonbunɑ t din tie *dulnyɑ nnɑ sei dɑɑbɑ.

⁴Ŋɑɑn yuo nbɑ din tɑn jɑnŋ nɑ, k Yennu tun u mɔnŋ mɔnŋ Bijɑ, k puo din mɑl’ɔ, k u din be *Suifnbɑ *senni ni,

⁵ɑ wun fiel bin nbɑ din tuu be senni mɑnŋ ni nɑ, ɑ tin kpɑnt Yennu wɑɑs.

⁶Yɑɑ tie u wɑɑs nɑ pɑɑk e, k u tun u Bijɑ mɑnŋ Siek t pɑlɑ ni, k u yikn ɑ: «Abbɑ! n Bɑɑ.»

⁷Ŋɑnn, ɑ ji k tie dɑɑbl kɑɑ, ŋɑɑn ɑ ji tie Yennu bik e, k fɑɑ tie u bik nɑ pɑɑk, u mun sɑɑ tul’ɑ lin nbɑ kul k u mɔk k tien u wɑɑs.

⁸Siɑn-yuo i din tuu k mi Yennu, k l yuo i din tuu tie dɑɑbɑ k tul bin nbɑ set k tie yenni kɑɑ,

⁹ŋɑɑn mɔtɑɑnɑ i bɑnn Yennu wɑɑ, kuo n sɑɑ yet ɑ Yennu e bɑnn’i, k l jin tien nlee k i luon k yin biɑ ŋmɑt tunn k wei sei nbɑ k mɔk yiikuo k biɑ k mɔk nyuɑt i? Bee tien k i luon k yin ŋɑnm kpɑnt b dɑɑbɑ?

¹⁰I mɑntk ŋɑɑn k i bɑkɑ be dɑyenɑ ni, nɑn ŋmɑɑyeni ni, nɑn sɑkyenɑ ni, nɑn bin-yenɑ ni bonciɑnn!

¹¹N mɔk jijiet i pɑɑk. Mɑɑ tun tuonn nbɑ k tul’i nɑ tien yɑnn e nɑ ɑɑ?

¹²N nɑɑ wɑɑs, n bɑln’mi e, ii nɑɑn nɑn min nɑ mɑn, nɑn mɑɑ nɑnn n mɔnŋ nɑn yinm nɑ. I k tun siɑl biil’n.

¹³I ponŋ tiɑn lin nbɑ pɑɑk te k n din sint k muɑnt lɑbɑmɑnn nɑ k tul’i: k mɑɑn mɑɑ din yiɑl nɑ pɑɑk e.

¹⁴N gbɑnɑnt nbɑ din k mɑnŋ nɑ, l din tie biknu e k tul’i, ŋɑɑn i din k yet’n k biɑ k lu’n. I lek din gɑɑl’n nɑn Yennu *mɑlɑkɑ kuo nɑn Yiesu *Klistu nɑ e.

¹⁵I din mɔk pɑlpienn bonciɑnn. Bee ji tien i? N mɔnŋ bo sɑɑ di i *siɑlɑ nɑn l ii dinŋ ii bo i sɑɑ fit, i din bo sɑɑ sɑk k nyinn i mɔnŋ ninbinɑ k tul’n ɑ.

¹⁶K mɔtɑɑnɑ, mɑɑ yet’i bɑlmɔni nɑ, n ji kpɑnt i dɑtɑɑk ee?

¹⁷Niib mɑnŋ dɑɑk’i, nɑn ninmɔnn e ŋɑɑn b dudukt k ŋɑn. B loln ɑ bin bɔkt min nɑn yinm e, k yin tunn kii wɑɑ ŋɑnm kuukuɑ.

¹⁸Nilɔ bɑkɑ i be sɔnŋɑnu ni yuo sɑɑk ɑ, l ŋɑn, mi i lek i be i buol ni ɑmi mi i kɑɑ.

¹⁹N wɑɑs, l yiɑl’n nɑn lɑɑ tuu yiɑl puo nbɑ luon wun mɑl bik nɑ e mɔkmɔk nɑn yuo nbɑ k Klistu binbenŋ nɑ tɑn sɑɑ gbie i ni.

²⁰N yɑn ni ŋmɑt i pɑɑk e. N bo sunmɑn k n be i buol ni mɔtɑɑnɑ k lek fit pɑk nɑn’i k wutuol kɑɑ.

²¹Yetl’n mɑn, yinm nbɑ luon k yii wɑɑ senni nɑ, i k gbɑt senni mɑnŋ nbɑ yet lin nbɑ ɑɑ?

²²L diɑn nɑn Ablɑɑhɑɑnm din mɔk bonjɑi bɑnle, k yenɔ tie u dɑɑbl Agɑɑl bik, k luɑ mun din tie u puo nbɑ din k tie dɑɑbl k b yi’u Sɑɑlɑ nɑ bik.

²³K dɑɑbl nɑ din mɑl u bonjɑk nɑn niib nbɑ mɑɑl biɑnŋ nbɑ nɑ e, ŋɑɑn k puokuul puo nɑ mɑl u bonjɑk nɑn biɑnŋ nbɑ k Yennu din senn mɔsonn tul’ɔ nɑ.

²⁴Lɑbɑɑl mɑnŋ fit wɑnn’t siɑl. B puob bɑnle nɑ sie Yennu mɔsonɑ ŋɑnle nɑ setu nɑ ni e. Dɑɑbl mɑnŋ sɑnn din tie Agɑɑl[1], k u sie *lol nbɑ k Yennu senn Siinɑi juɑl pɑɑk nɑ setu ni, k mɑl u wɑɑs dɑɑbs ni.

²⁵Tɔn, Agɑɑl tie Siinɑi juɑl nbɑ be Alɑɑbi tinŋ ni nɑ e, k sie tingbounŋ nɑ Selusɑɑlenm setu mɔtɑɑnɑ, k ŋuɑ nɑn u niib tie dɑɑbɑ.

²⁶Ŋɑɑn sɑnpɑɑpo Selusɑɑlenm nɑ tie yent-n-mɔnŋ duo, k biɑ tie t nɑɑ.

²⁷K mɑɑn l diɑn Yennu lolkpel kɑdɑɑɔk ni ɑ: «Fin puokɑnmɑtl, mɔk pɑlpienn! Ii yikn sɑnpɑɑpo nɑn pɑlpienn, Fin nbɑ k mi mɑtyiɑlu tonu nɑ. K mɑɑn puo nbɑ be k b nyik’ɔ tɑn sii mɔk wɑɑs bonciɑnn k gɑl puo nbɑ sɔlɔ luon’ɔ nɑ.»

²⁸Tɔn, n nɑɑ wɑɑs, yinm e mun tie Yennu mɔsonn wɑɑs nɑn Isɑɑk nbɑ din tie biɑnŋ nbɑ nɑ.

²⁹Yɑɑyuo ni, bɑɑ din mɑl bonjɑk nbɑ nɑn bɑɑ mɑɑl nisɑɑli bɑnnu nbɑ, nɑ din tuu muks wun nbɑ k b din mɑl’ɔ nɑn Foŋɑnm yiikuo ni nɑ e, k l mun biɑ tie nɑn mɔtɑɑnɑ wɑɑ.

³⁰Ŋɑɑn l diɑn nlee Yennu lolkpel kɑdɑɑɔk ni? L diɑn ɑ: «Beln puo nbɑ tie dɑɑbl nɑ nɑn u bonjɑk nɑ, k mɑɑn dɑɑbl bonjɑk nɑ dɑɑ mi lɑkn di b bɑɑ mɑnŋ fɑɑl nɑn puokuul puo bonjɑk nɑ.»

³¹N nɑɑ wɑɑs, mɑɑ yien lin nbɑ tie ɑ t k tie puo nbɑ tie dɑɑbl nɑ wɑɑs kɑɑ, ŋɑɑn t tie puokuul puo nɑ wɑɑs e.