Read Moba Gɑɑlɑɑt-tieb 6 Bible Online

Gɑɑlɑɑt-tieb 6 - Moba bible

Gɑɑlɑɑt-tieb 6

¹N nɑɑ wɑɑs, l i tie k i lɑ k suɑ tun tuonbiit, yinm nbɑ be nɑn Foŋɑnm nɑ, l ŋɑn k yin sonm’ɔ nɑn sikn-n-mɔnŋ, k wun ŋɑnm set fɑnu. Ŋɑɑn ii mi mɑn k mɑɑn biknu mun sɑɑ fit te k i bot.

²I jii i lieb jik-kpiɑtɑ mɑn, k nnɑ e k i sɑɑ sɑk *Klistu sennu.

³Suɑ i kii tie siɑl, ŋɑɑn biki ɑ u mun tie suɑ e, u kpɑnn u mɔnŋ e.

⁴L ŋɑn k suɑ kul n bikn u mɔnŋ binbenŋ ɑ, k fit kii mɔk yugontl u mɔnŋ mɔnŋ tuonŋɑnɑ pɑɑk, k dɑɑ biki wɑɑ tun lin nbɑ nɑn u luɑ tuonɑ,

⁵k mɑɑn l ŋɑn k suɑ kul n jii u tiɑɔnŋ jikl.

⁶Nisuɑ nbɑ k b wɑnt’ɔ Yiesu Klistu lɑbɑmɑnn nɑ, l ŋɑn k l dɑɑnɔ n mun jii lin nbɑ k u mɔk kul k cent nɑn u wɑntuɑ mɑnŋ.

⁷I dɑɑ kpɑnn i mɔnŋ mɑn, b k lɑɑ Yennu. Nisɑɑlk nbɑ bul lin nbɑ, ŋɑnn e k u tɑn sɑɑ jɑɑn kpɑnŋ.

⁸Wun nbɑ bul u mɔnŋ gbɑnɑnt lonm, u tɑn sɑɑ jɑɑn kuun e, u gbɑnɑnt lonbiit mɑnŋ pɑɑk. Ŋɑɑn wun nbɑ bul Foŋɑnm nbɑ luon biɑnŋ nbɑ nɑ, u tɑn sɑɑ jɑɑn mɑnfuol nbɑ kɑɑ gbennu, Foŋɑnm mɑnŋ pɑɑk.

⁹T dɑɑ bɑkt nɑn tuonŋɑnɑ tumu mɑn, k mɑɑn t i kii nyik tuonŋɑnɑ, yuo nbɑ jɑnŋ nɑ, t tɑn sɑɑ gɑɑl nyuɑt.

¹⁰L pɑɑk, l i tie k l bɑɑl nɑn t fit tun siɑl, ŋɑɑnt k tin tun lin nbɑ ŋɑn k tul suɑ kul ɑ, ŋɑɑn mɑntk kii tuun kii tien bin nbɑ tie Klistuyɑb.

¹¹Tɔn, gotl mɑn mɑɑ diɑn nɑnmgbenŋɑ nɑn n mɔnŋ mɔnŋ nuu bɑnnu nbɑ.

¹²Niib nbɑ luon bin penn *Suifnbɑ pɑlɑ nɑ, ŋɑnm e mɑb’i ɑ yin pot i punɑ, ɑ k b dɑɑ lɑɑt muksuk Klistu dɑpunpunn nɑ pɑɑk.

¹³Bin nbɑ poli b punɑ nɑ mɔnŋ k wɑɑ Yennu *senni, ŋɑɑn b luon k yin pot e k bii fɑɑ jɑpɑɑt i *punpotu mɑnŋ pɑɑk.

¹⁴Min ŋɑnin kɑn mi fɑɑ jɑpɑɑt sie t Yonmdɑɑnɔ Yiesu Klistu dɑpunpunn nɑ kuukuɑ pɑɑk. K mɑɑn u dɑpunpunn pɑɑk e te k tingbounŋ lonm kpo n buol ni k n mun kpo tingbounŋ lonm buol ni.

¹⁵Suɑ i pot u punn kuo wuu kii pot u punn, l k tie siɑl. Lin nbɑ siɑn tie bii tie nipɑɑnm e.

¹⁶N mei Yennu mɑɑ mɑnu nɑn ninbɑtinu i be bin nbɑ kul wɑɑ wɑnnu mɑnŋ nɑn Yennu niib kul ɑ nɑ pɑɑk.

¹⁷Ii mi mɑn k suɑ n muks’n, k mɑɑn n mɔk Yiesu dɔkt n gbɑnɑnt pɑɑk.

¹⁸N nɑɑ wɑɑs, t Yonmdɑɑnɔ Yiesu Klistu ii mɔk ninkpɑbɑɔnŋ nɑn i kul ɑ. * Amenn.