Read Moba Efestieb 2 Bible Online

Efestieb 2 - Moba bible

Efestieb 2

¹Yuo nbɑ din gɑl nɑ, i din tie kpienm e, i mɔyetuk nɑn biit pɑɑk.

²I wɑɑ tingbounŋ nɑ binbenŋ nɑn nɑlnbiit yudɑɑnɔ, wun nbɑ diɑ niib nbɑ yet Yennu mɔb nɑ mɔnŋ ɑ.

³Bɑlmɔni, t kul ɑ mun din nɑɑn nɑn l nibuolu nɑ e, k wɑɑ t gbɑnɑnt niɑɔnŋ, k tuun t gbɑnɑnt nɑn t dudukt lonm. Tinm nɑn ŋɑnm biit binbenŋ din jɑnŋ nɑn lin bɑɑl nɑn Yennu wutuol t kul ɑ pɑɑk ɑ.

⁴Ŋɑɑn Yennu luon’t bonciɑnn, k biɑ tin’t ninbɑɑɔk.

⁵L pɑɑk, tɑɑ din tie kpienm t biit pɑɑk nɑ, u din te k t lɑ mɑnfuol *Klistu ni. Yennu ninkpɑbɑɔnŋ pɑɑk e k i lɑ fielu.

⁶Tɑɑ be Yiesu Klistu ni nɑ pɑɑk k Yennu din lɑkn fiin tinm nɑn ŋuɑ kuun ni, ɑ t tɑn lɑkn kii tie nɑɑn *Yendɔunŋ ni.

⁷U din tun lin nbɑ nɑ, ɑ yuo nbɑ bɑɑt wun fit wɑnn suɑ kul u ninkpɑbɑɔnŋ nbɑ yɑb biɑnŋ nbɑ e, wɑɑ din tun bulcint k tul’t Yiesu Klistu ni nɑ pɑɑk.

⁸Yennu ninkpɑbɑɔnŋ nɑ pɑɑk e k i lɑ fielu i yɑdɑ nɑ pɑɑk. Fielu mɑnŋ k nyii i buol ni kɑɑ, ŋɑɑn l tie Yennu piini e.

⁹Suɑ kɑn fit fuɑ bɑlɑ fielu mɑnŋ pɑɑk, k mɑɑn l k tie i tiɑɔnŋ tuonɑ nyuɑt kɑɑ,

¹⁰ŋɑɑn Yennu e tien’t nnɑ, k t tie u nɑɑmi Klistu ni ɑ tin tun tuonŋɑnɑ nbɑ k u din dɔnŋ tien l siil ɑ tii tuun nɑ.

¹¹Ŋɑnn tiɑtl mɑn i binbenkpelk po, yinm nbɑ k tie *Suifnbɑ i mɑɑlu ni nɑ, Suifnbɑ yi yinm e punjuot, ŋɑɑn yi b mɔnŋ sɑnkpɑnnɑ. B piɑk nyinn nbɑ k jɑb tien b gbɑnɑnt ni nɑ po e.

¹²L yuo nɑ i din fɔk nɑn Klistu. I din tie sɑɑnm e k b k kɑɑn’i k puki’i Yennu nigɑnnkɑb ni. I din k pukn mɔsonn nbɑ k Yennu din senn k tul u niib nɑ ni. I din k mɔk dindɑnn k biɑ din k mɔk Yennu.

¹³Ŋɑɑn mɔtɑɑnɑ, Yiesu Klistu ni e, k yinm nbɑ din fɔk nɑn’ɔ nɑ, ji nyɑt nɑkn’ɔ wɑɑ yit u mɔnŋ sɑlk nɑ pɑɑk.

¹⁴K mɑɑn ŋuɑ Klistu tiɑɔnŋ o tul’t mɑnu. U din yiel dɑtɑɑl nbɑ din bɔkt Suifnbɑ nɑn bin nbɑ k tie Suifnbɑ k b ji tie niyenɔ kuɑ.

¹⁵U gbɑnɑnt ni e k u din kpien Suifnbɑ *senni nɑn l kuɑt kul ɑ, ɑ nibuolu bɑnle nɑ n tɑɑn k tien niyenɔ kuɑ u ni. Nnɑ e k u din bɑɑl nɑn mɑnu.

¹⁶U kuun dɑpunpunn pɑɑk te k mɑnu ji be ŋɑnm nɑn Yennu sinsuuk ni, k u jii’b k tien’m buolyenŋ kuɑ Yennu buol ni.

¹⁷Klistu din bɑɑl muɑnt mɑnu lɑbɑmɑnn muɑnti k tul yinm nbɑ k tie Suifnbɑ, k din tuu fɔk nɑn Yennu nɑ, k mun biɑ bɑɑl nɑn’n k tul Suifnbɑ nbɑ din tuu kpiɑ nɑn’ɔ nɑ.

¹⁸Klistu pɑɑk e k Suifnbɑ nɑn bin nbɑ k tie Suifnbɑ nɑ kul ɑ fit bɑɑl Bɑɑ buol ni, u Foŋɑn-yenɔ ni.

¹⁹Mɔtɑɑnɑ, yinm nbɑ k tie Suifnbɑ ji k tie nibuolgɑnu kuo sɑɑnm kɑɑ, ŋɑɑn yinm nɑn Yennu niib tie tin-yenŋ kuɑ wɑɑs e, k ji tie Yennu ŋɑɑtieb.

²⁰Fiɑkyenn kuɑ nbɑ k sɔkniinbɑ nɑn tuomiinbɑ din fɔkn nɑ pɑɑk e, k i mun tuɑn k Yiesu Klistu mɔnŋ tie tɑnn nbɑ tien fiɑkl pɑnŋ.

²¹Ŋuɑ e te k ŋɑɑk nɑ wɑki k kpɑɑtl tien Yennu jɑɑnti ŋɑsɑɑkɑk Yonmdɑɑnɔ ni.

²²Yinm nɑn ŋuɑ nbɑ tɑɑn nɑn lieb nɑ pɑɑk, k yinm nɑn ŋɑnm kul ɑ mun biɑ tɑɑn tien ŋɑɑk nbɑ k Yennu be lenŋ Foŋɑnm ni.