Read Moba Efestieb 5 Bible Online

Efestieb 5 - Moba bible

Efestieb 5

¹Yɑɑ tie Yennu wɑlonkɑi nɑ, i yɑbl i mɔnŋ pɑɑk kii tuun nɑn ŋuɑ nɑ,

²k ŋɑɑn k lonm i diɑ’i nɑn *Klistu nbɑ din luon’t bonciɑnn k gɑɑl t pɑɑk k kpo k l nɑɑn nɑn mɑnnu nbɑ k l nublu mɑn k tul Yennu nɑ.

³Yɑɑ tie Yennu wɑɑs nɑ pɑɑk, l ponŋ k ŋɑn niib ii gbiɑ boncuncontuonɑ mɑɑn, ɑmi jɑknt mɑɑn, ɑmi niɑnciɑɔnŋ mɑɑn i sinsuuk ni.

⁴L biɑ k ŋɑn k boncuncontuonɑ mɑɑn ɑmi jɑknt mɑɑn ɑmi bɑlyɑnɑ ii nyi i mɔi ni, ŋɑɑn ii tien Yennu niipuouk mɑn.

⁵L ŋɑn yii mi nɑn wun nbɑ tie boncunconn ɑmi jɑknt dɑɑnɔ ɑmi niɑnciɑɔnŋ dɑɑnɔ, ŋuɑ e kɑn lɑ yiɑl Klistu nɑn Yennu nɑɑn ni, k mɑɑn niɑnciɑɔnŋ tie pɑtmɑnnu nɑ e.

⁶I dɑɑ te k suɑ n jii jɑt-wɑnnu k kpɑnn’i ni, k mɑɑn l tuonbiit tumu pɑɑk e te k Yennu wutuol bɑɑt mɔyetdɑnm pɑɑk.

⁷I dɑɑ tɑɑ b po.

⁸I din be bunbɔnn ni e, ŋɑɑn yɑɑ be Klistu ni mɔtɑɑnɑ nɑ, i ji be yentu ni e. L pɑɑk, i ji kii be kii nɑɑn bin nbɑ tie yentu yɑb nɑ,

⁹k mɑɑn yentu bɑɑt nɑn tuonŋɑnɑ buolu kul ɑ nɑn yentinu nɑn bɑlmɔni.

¹⁰I yɑbl i mɔnŋ k tumi lin nbɑ sɑɑ penn Yonmdɑɑnɔ pɑl ni,

¹¹k dɑɑ toki bin nbɑ tuun bunbɔnn ni tuonɑ k nyuɑt kɑɑ l ni, ŋɑɑn te k b bunbɔnn ni tuonɑ mɑnŋ n nyi pɑɑnu.

¹²Lin nbɑ k b tuun bunbɔnn ni nɑ mɔk fei bonciɑnn nɑn tii piɑk l po.

¹³Tuonɑ mɑnŋ kul ɑ i nyii pɑɑnu, b sɑɑ lɑ lɑɑ tie bɑnnu nbɑ nɑn bɑlmɔni.

¹⁴K mɑɑn lin nbɑ kul fiit nyii pɑɑnu, l ji tuu tie yin-yienm e. L pɑɑk e k b yet ɑ: «Fin nbɑ guɑnt, fɑn fiil guɑn ni, fɑn fiil kuun ni, k Klistu sɑɑ tul’ɑ u yentu.»

¹⁵Ii goli i binbenŋ mɑn. I dɑɑ be jɑtbenu, ŋɑɑn kii mɔk subndɑnm binbenŋ e.

¹⁶I jii i yuo kii tuun nɑn’n fɑnu, k mɑɑn yuo nɑ ni tie yobiiuk o.

¹⁷L pɑɑk, i dɑɑ tie jɑtt kɑɑ, ŋɑɑn kii tuun bɑnnu nbɑ k Yonmdɑɑnɔ luon.

¹⁸I dɑɑ nyu dɑɑn k yib. Ŋɑnn sɑɑ te k i mɔk mɑlnbiit e, ŋɑɑn ii yɑbl i mɔnŋ pɑɑk kii gbie nɑn Foŋɑnm.

¹⁹Ii yiin Yennu lolkpel kɑdɑɑɔk ni *yɑni nɑn jɑɑnti yɑni nɑn yɑni nbɑ nyi Foŋɑnm buol ni mɑn, k cie i lieb pɑlɑ, kii biɑ kii yiin Yennu lolkpel kɑdɑɑɔk ni yɑni nɑn jɑɑnti yɑni kii piɑk Yonmdɑɑnɔ nɑn i pɑlɑ kul ɑ.

²⁰Yuo kul ii tien Bɑɑ Yennu niipuouk bonsiɑl kul pɑɑk, t Yonmdɑɑnɔ Yiesu Klistu sɑnn ni.

²¹Yɑɑ bɑɑkt Klistu nɑ, i sikn i mɔnŋ k tul i lieb mɑn.

²²Puob, i sikn i mɔnŋ k tul i sɔlb, nɑn yɑɑ sikn i mɔnŋ k tul Yonmdɑɑnɔ nɑ,

²³k mɑɑn juɑ mɔk yiikuo u puo pɑɑk nɑn Klistu nbɑ mɔk yiikuo u mɔtɑɑɔk niib pɑɑk nɑ e. Klistu e tie u mɔtɑɑɔk niib nbɑ tie u gbɑnɑnt nɑ Fietuɑ.

²⁴Ŋɑnn, l ŋɑn k puob n sikn b mɔnŋ k tul b sɔlb mɔbonɑ kul ni, nɑn Klistu mɔtɑɑɔk niib nbɑ sikn b mɔnŋ k tul’ɔ nɑ.

²⁵Jɑb, ii luon i puob nɑn Klistu nbɑ luon u mɔtɑɑɔk niib k gɑɑl b pɑɑk k kpo biɑnŋ nbɑ nɑ.

²⁶U din tun lin nbɑ nɑ, k biɑ jii Yennu mɑɑn nɑn nyun k wul’b, ɑ wun ŋɑnm’b k bii ŋɑn nɑn bii tie Yennu yɑb,

²⁷k jii’b tien’m u mɔnŋ nuu ni nɑn fɑnt, ɑ b fɑnt nɑ dɑɑ mɔk dɑnsiɑk, k biɑ kii tie niŋɑnm k dɑɑ mɔk biit nɑn wɑɑnm-nnɑ wɑɑ.

²⁸L ŋɑn k jɑb i luon b puob nɑn bɑɑ luon b mɔnŋ gbɑnɑnt biɑnŋ nbɑ nɑ e. Wun nbɑ luon u puo, luon u mɔnŋ e.

²⁹Suɑ k mi yet u mɔnŋ gbɑnɑnt, ŋɑɑn u goli u gbɑnɑnt e fɑnu k dint u mɔnŋ nɑn Klistu nbɑ tuun biɑnŋ nbɑ tien u mɔtɑɑɔk niib nɑ.

³⁰Tinm e tie u gbɑnɑnt mɑnŋ,

³¹nɑn Yennu lolkpel kɑdɑɑɔk nbɑ yet biɑnŋ nbɑ nɑ ɑ: «Lin nbɑ nɑ pɑɑk k l ŋɑn k juɑ n nyik u bɑɑ nɑn u nɑɑ, ŋɑɑn jii u mɔnŋ k tɑɑn nɑn u ŋɑɑpuo k bin ji tien yonm.»

³²Yennu mɑɑn nɑ sumi bonciɑnn, ŋɑɑn min mi nɑn l wɑnt Klistu nɑn u mɔtɑɑɔk niib po e.

³³Ŋɑɑn l biɑ wɑnt yinm e ɑ l ŋɑn k juɑ kul ɑ i luon u puo nɑn wɑɑ luon u mɔnŋ biɑnŋ nbɑ nɑ, k puo kul ɑ i mun i bɑɑkt u sɔlɔ.