Read Moba Fiiliiptieb 1 Bible Online

Fiiliiptieb 1 - Moba bible

Fiiliiptieb 1

¹Min Pɔul nɑn Tiimuote, tinm nbɑ tie Yiesu *Klistu tuontunnɑ nɑ e diɑn kɑdɑɑɔk nɑ k tien bin nbɑ tie Yennu niib Yiesu Klistu ni k be Fiiliip nɑ, nɑn b jɑɑnti ni yudɑnm nɑn b * sonmtieb.

²T Bɑɑ Yennu nɑn Yonmdɑɑnɔ Yiesu Klistu ii mɔk ninkpɑbɑɔnŋ nɑn’i, k biɑ tul’i mɑnu.

³N tien Yennu niipuouk yuo nbɑ kul k n tuu tiɑl i po.

⁴Yuo kul ɑ, mi i mei Yennu tien’i, n tuu mei nɑn pɑlpienn e,

⁵k mɑɑn yɑɑ sonmt’n biɑnŋ nbɑ lɑbɑmɑnn tuonɑ mɑnŋ pinpiik ni wɑɑ nɑn mɔtɑɑnɑ nɑ pɑɑk.

⁶L pɑɑk, n k mɔk bilsuk nɑn Yennu nbɑ din piin tuonŋɑnn i ni nɑ, u sii diɑ’l nnɑ mɔkmɔk nɑn yuo nbɑ k u tɑn sɑɑ gbenn tuonŋɑnn mɑnŋ Yiesu Klistu jennu dɑɑl.

⁷Mi i duki i po nnɑ, l ŋɑn, k mɑɑn n yɑn be i ni, yinm nbɑ k Yennu tin’i ninbɑɑɔk nɑn wɑɑ tin’n biɑnŋ nbɑ, mɑɑ dɑɑn yen n mɔnŋ k gbɑɑ lɑbɑmɑnn mɑnŋ pɑɑk, ɑ n senn’l nɑ wɑɑ, k tɑn bɑɑl yuo nbɑ k n ji be dɑnsɑlk ni nɑ.

⁸Yennu e tie n siɑlɑɑdɑɑnɔ nɑn n yɑn set be i ni nɑn Yiesu Klistu tiɑɔnŋ nbɑ luon’i biɑnŋ nbɑ nɑ.

⁹N mei Yennu mɑɑ i lonm ii tun kii puki yuo kul, k yii biɑ kii mɔk bɑlmɔni bɑnnu nɑn subni,

¹⁰ɑ yin fit gɑnn lin nbɑ ŋɑn kii be k dɑɑ mɔk jɑknt k biɑ dɑɑ mɔk biit mɔkmɔk nɑn Klistu dɑɑl mɑnŋ,

¹¹k i binbenŋ n gbie nɑn yentinu luɑnɑ nbɑ nyii Yiesu Klistu buol ni nɑ, ɑ Yennu n lɑ dontl nɑn pɑku.

¹²N nɑɑ wɑɑs, n luon k yin bɑnn nɑn lin nbɑ kul nbɑ tien’n nɑ, sonm lɑbɑmɑnn mɑnŋ ɑ lin sɑɑn tuɑnn e nɑn bɑlmɔni.

¹³L pɑɑk, kpɑnbɑl ŋɑguulɑ nɑn nilieb nbɑ be nnɑ nɑ kul bɑnn nɑn mɑɑ tie Klistu tuontunnɔ nɑ pɑɑk e k n be dɑnsɑlk nɑ.

¹⁴N sɑlk ni benu nɑ tul t nɑɑ wɑɑs bonciɑnn yugontl Yonmdɑɑnɔ sɔnu ni, k l puki yuo kul, k b muɑntl Yennu mɑɑn nɑn pɑlcienn, k jɑŋmɑɑni ji kɑɑ.

¹⁵Siɑb muɑntl Klistu mɑɑn mɑnŋ k mɑɑn b tie punpondɑnm nɑn kunkɔnkɔnnɑ e, ŋɑɑn k siɑb mun muɑntl nɑn b pɑlɑ ni nɑn bɑlmɔni lonm.

¹⁶Bin nbɑ tuun nɑn lonm nɑ, b mi nɑn Yennu lukt’n ɑ n wɑnn nɑn lɑbɑmɑnn tie bɑlmɔni e.

¹⁷Nisiɑb k muɑntl Klistu po nɑn b pɑlɑ kul, ŋɑɑn b tuun nɑn *funfunn e, k b duki nɑn b sɑɑ pukn min e fɑlɑ mɑɑ dɑɑ be dɑnsɑlk nnɑ.

¹⁸Ŋɑɑn ŋɑnn k biil. Lin nbɑ siɑn tie nnɑ e. B i muɑntl b dudukŋɑnt ni ɑmi b dudukbiit ni, ŋɑɑn niib sɑɑ gbɑt Klistu po, k n mɔk pɑlpienn.

¹⁹Bɑlmɔni, n mi l juontu, i Yenmiɑlu nɑn Foŋɑnm nbɑ nyi Yiesu Klistu buol ni nɑ, sɑɑ te k n lɑ fielu wɑɑ.

²⁰N pɑl ni lonm nɑn n dindɑnn tie k n dɑɑ dint n mɔnŋ fei e, ŋɑɑn n sii mɔk pɑlcienn mɔtɑɑnɑ nɑn lɑɑ tuu tie bɑnnu nbɑ nɑ, k mi i lek i kpo ɑmi mɑɑ be, ŋɑɑn n binbenŋ kul sɑɑ dont Klistu sɑnn.

²¹K mɑɑn n buol ni, mɑnfuol tie Klistu e, k kuun tie nyuɑt.

²²L i tie k n sii be n mɑnfuol ni, n sii tuun tuonɑ nbɑ mɔk nyuɑt e. Ŋɑɑn n k mi lin nbɑ k n sɑɑ gɑnn.

²³L bonɑ ŋɑnle nɑ e dɑɑl’n. N luon k n nyik n mɑnfuol kii be Klistu buol ni. Ŋɑnn e sii cie.

²⁴Ŋɑɑn i pɑɑk e te k l mɑntk kpɑɑ tɑlɑs bonciɑnn nɑn mii be n mɑnfuol ni.

²⁵N mi nɑn ŋɑnn e sɔ k bilsuk kɑɑ. L pɑɑk te k n mi nɑn n sii be e wɑɑ. N sii be i kul ɑ buol ni, k i sɑɑ sɑɑn tuɑnn kii mɔk pɑlpienn i yɑdɑ ni,

²⁶ɑ mi i tɑnŋ i jen i buol ni yuo nbɑ, i pɑlpienn sii yɑb bonciɑnn nɑn yɑɑ be Yiesu Klistu ni nɑ, n mɑnfuol pɑɑk.

²⁷Ŋɑɑn lin nbɑ yɑɑ kul ni, ŋɑɑnt k i binbenŋ sɔnu ii tie nɑn Klistu lɑbɑmɑnn nbɑ luon lii tie bɑnnu nbɑ nɑ. K mi i lek i fit sɑɑn lɑ’i ɑmi mi i kii fit lɑ’i ni, ŋɑɑn n sɑɑ gbɑt ɑ i sie fɑnu nɑn dudukyent kuɑ, k tɑɑn mɔtɑɑɔk k yɑbi i mɔnŋ k yɑdɑ nbɑ nyi lɑbɑmɑnn nɑ ni n sɑɑn tuɑnn.

²⁸I dɑɑ tiin i dɑtɑi mɑn. Ŋɑnn e sii tie nyinn k tul’b nɑn b tɑn sɑɑ bɑɑ k l mun biɑ sii tie nyinn k tul’i nɑn i be fielu sɔnu ni, k ŋɑnn e nyi Yennu buol ni.

²⁹K mɑɑn Yennu cɑb’i ɑ yin tun k tul Klistu k l k tie yɑɑ tien’ɔ yɑdɑ nɑ kuukuɑ pɑɑk kɑɑ, ŋɑɑn l biɑ tie yɑɑ di fɑlɑ u pɑɑk nɑ.

³⁰Mɔtɑɑnɑ i gbɑɑ nɑn yɑɑ ponŋ din lɑ mɑɑ gbɑɑ k biɑ gbɑɑ mɔtɑɑnɑ biɑnŋ nbɑ nɑ.