Read Moba Kuoluostieb 3 Bible Online

Kuoluostieb 3 - Moba bible

Kuoluostieb 3

¹I din fiil nɑn *Klistu kuun ni, l pɑɑk i jii i pɑlɑ k gɑɑn nɑn *Yendɔunŋ ni bonɑ, siɑn nbɑ k Klistu kɑl Yennu niidiitu po nɑ.

²I lol i dudukt nɑn lenŋ bonɑ nɑ, ŋɑɑn dɑɑ loln nɑn tingbounŋ nɑ bonɑ kɑɑ,

³k mɑɑn i ponŋ din kpo wɑɑ, k i mɑnfuol bɔl Yennu buol ni nɑn Klistu yɑl nbɑ bɔl biɑnŋ nbɑ nɑ.

⁴Klistu e tie i mɑnfuol. Yuo nbɑ k u sɑɑ jen nɑ, i mun tɑn sii be nɑn’ɔ u *yudɑnt ni.

⁵L pɑɑk, yin kpi lin nbɑ tie tingbounŋ nɑ binbenŋ i ni, lin nbɑ tie boncunconsn nɑn jɑknt tuonɑ nɑn niɑnciɑɔnŋ nɑn dudukbiit nɑn niijeu (k mɑɑn niijeu tie pɑtmɑnnu buolu yenn).

⁶K mɑɑn biit nɑ buolu pɑɑk e k Yennu wutuol tɑn sɑɑ do bin nbɑ k sɑk u mɔb nɑ pɑɑk.

⁷Siɑn-yuo i din tuun l buolu, yuo nbɑ k i din tie biit mɑnŋ dɑɑbɑ nɑ.

⁸Ŋɑɑn mɔtɑɑnɑ i ji fiɑn lin nbɑ kul tie wutuol nɑn lin nbɑ sɑɑ bien nilɔ pɑl nɑn tonu k lu. I dɑɑ te k siɑl ɑ sukt nɑn mɔbonbiit nyi i mɔi ni.

⁹I dɑɑ fɑ fɑɑk k tien i lieb, k mɑɑn i ponŋ liɑt i binbenkpelk nɑ nɑn l tuonɑ wɑɑ,

¹⁰k ji liɑ binbenpɑɑnŋ e. Binbenpɑɑnŋ nɑ e k Yennu nbɑ tie l nɑntuɑ nɑ pɑntl yuo kul ɑ, k l nɑɑn u mɔnŋ binbenŋ, ɑ wun te k yin bɑnn’ɔ setk nɑn mɔni.

¹¹L pɑɑk, bɔktu ji kɑɑ bin nbɑ tie *Suifnbɑ nɑn bin nbɑ k tie Suifnbɑ sinsuuk ni. Bin nbɑ pot punɑ nɑn bin nbɑ k pot kul ɑ ji k mɔk bɔktu nɑn lieb. Bɔktu ji kɑɑ muuk ni niib nɑn duo ni yɑb sinsuuk ni. Bɔktu biɑ kɑɑ dɑɑbɑ nɑn yent-n-mɔnŋ dɑnm sinsuuk ni, ŋɑɑn Klistu kuukuɑ siɑn, k u be i kul ni.

¹²I tie Yennu nigɑnnkɑb e. U din luon’i k din lukt’i, ɑ ii tie u tiɑɔnŋ niib. L pɑɑk, ii tiin lieb ninbɑɑɔk bonciɑnn mɑn, kii mɔk bulcint, kii centl lin nbɑ k i mɔk nɑ nɑn’m kii tie sikn-n-mɔnŋ dɑnm, kii luon mɑnu, kii mɔk pɑlmɑɑsl.

¹³Kii di i lieb suklu. K suɑ i mɔk bunbulmi u luɑ pɑɑk, wun nyik cɑb’ɔ. L kpɑɑ tɑlɑs k yin mun nyik cɑb i lieb nɑn Yonmdɑɑnɔ nbɑ ponŋ nyik cɑb’i biɑnŋ nbɑ nɑ.

¹⁴Lin nbɑ mɑntk siɑn tie yii mɔk lonm e. Ŋɑnn e sɑɑ te k yii mɔk mɔtɑɑɔk fɑnu nɑn lieb.

¹⁵I ŋɑɑn k Klistu mɑnu ii diɑ i pɑlɑ kii ŋmɑktl’i. Yennu lɑkn yiin’i gbɑnɑn-yent kuɑ ni ɑ yii mɔk mɑnu mɑnŋ e. Ii tien Yennu niipuouk mɑn.

¹⁶I ŋɑɑn k Klistu mɑɑn nɑn l mɔktuk kul ii be i pɑlɑ ni, k yii wɑnt i lieb, kii biɑ kii kpɑɑn i lieb nɑn i yɑn kul. I jii *yɑni nbɑ tie Yennu mɑɑn ni *yɑni, yɑni nbɑ piɑk Klistu po, nɑn yɑni nbɑ k Foŋɑnm tien’i ɑ yin tumi i mɔnŋ k biɑ kpɑɑn lieb nɑ. Ii yiin l yɑni kii tien Yennu nipuouk nɑn i pɑlɑ kul ɑ.

¹⁷Lin nbɑ kul k i tie, ii tie mɑn Yonmdɑɑnɔ Yiesu Klistu sɑnn ni. Lin nbɑ kul k i yien, ii yien mɑn Yonmdɑɑnɔ Yiesu Klistu sɑnn ni, kii tien Bɑɑ Yennu niipuouk Yiesu tuonɑ pɑɑk.

¹⁸Puob, i sikn i mɔnŋ k tul i sɔlb, nɑn lɑɑ nɑɑn Yonmdɑɑnɔ niib i tuun u tuɑnn ni bɑnnu nbɑ nɑ.

¹⁹Puosɔlb, ii luon i puob mɑn, k dɑɑ diɑ nibisn benu k be nɑn’m.

²⁰Wɑɑs, ii sɑɑk i dɑnm mɔi bonsiɑl kul ni, k mɑɑn ŋɑnn e pent Yennu pɑl ni.

²¹Bɑɑnbɑ, i dɑɑ dont i wɑɑs wutuol, k b yɑn nyi.

²²Dɑɑbɑ, ii sɑɑk i yonmdɑnm mɔi bonsiɑl kul ni, k l dɑɑ tie yuo nbɑ k b goli’i nɑ kuukuɑ kɑɑ, ɑ yin penn b pɑlɑ k gɑɑl pɑku, ŋɑɑn kii tuun nnɑ nɑn ninmɔnn yɑɑ bɑɑkt Yonmdɑɑnɔ biɑnŋ nbɑ nɑ pɑɑk.

²³Yɑɑ tuun lin nbɑ kul, yin tun nɑn ninmɔnn nɑn i tuun tien Yonmdɑɑnɔ e, k k tuun tien nisɑɑli kɑɑ.

²⁴Ii tiɑn mɑn nɑn Yonmdɑɑnɔ mɑnŋ tɑn sɑɑ tul’i nyuɑt nbɑ tie u niib yɑl. K mɑɑn Klistu e tie bɑlmɔni Yonmdɑɑnɔ, k i tuun tien’ɔ.

²⁵Wun nbɑ tuun bonbiil tɑn sɑɑ gɑɑl u nyuɑt, wɑɑ tuun bonbiil nɑ pɑɑk, k mɑɑn Yennu k mɔk luktn.