Read Moba 2 Tesɑɑluoniiktieb 1 Bible Online

2 Tesɑɑluoniiktieb 1 - Moba bible

2 Tesɑɑluoniiktieb 1

¹Min Pɔul nɑn Siilɑɑs nɑn Tiimuote dɑ kɑdɑɑɔk nɑ, k tien Yiesu mɔtɑɑɔk niib nbɑ be Tesɑɑluoniik, k biɑ tie t Bɑɑ Yennu nɑn Yonmdɑɑnɔ Yiesu Klistuyɑb nɑ.

²Bɑɑ Yennu nɑn Yonmdɑɑnɔ Yiesu *Klistu ii mɔk ninkpɑbɑɔnŋ nɑn’i, k biɑ tul’i mɑnu.

³T nɑɑ wɑɑs, l kpɑɑ tɑlɑs e nɑn tii tien Yennu niipuouk yuo kul i pɑɑk. T i tuun nnɑ, l ŋɑn, k mɑɑn i yɑdɑ mɑntk puki bonciɑnn, k yɑɑ mɔk lonm nbɑ k tien i lieb nɑ puki.

⁴L pɑɑk te k t mɔk yugontl i pɑɑk Yiesu mɔtɑɑɔk niib sinsuuk ni, nɑn yɑɑ lɑɑt muksuk nɑn fɑlɑ ŋɑɑn mɔk gbɑnkul nɑn yɑdɑ nɑ.

⁵Nɑ kul wɑnt nɑn Yennu nbɑ din senn nɑn wɑɑ sɑɑ tun bɑnnu nbɑ nɑ ŋɑn, k l pɑɑk i sɑɑ jɑnŋ nɑn yin kuɑ u nɑɑn nbɑ k i di fɑlɑ l pɑɑk nɑ ni.

⁶Yennu e tuun lin nbɑ tuok, k tɑn sɑɑ te k bin nbɑ dint’i fɑlɑ mɑnŋ nɑ n mun di fɑlɑ nnɑ,

⁷k fɑt yinm nbɑ di fɑlɑ nɑ k tul’i fuon, k mun biɑ fɑt’t k tul’t fuon. Nɑ kul sɑɑ tien yuo nbɑ k Yonmdɑɑnɔ Yiesu tɑn sɑɑ dɔkt nɑn u yɑbnt mɑlɑkɑɑnbɑ.

⁸U tɑn sɑɑ bɑɑl muu nbɑ yɑb sinsuuk ni k dɑt bin nbɑ yet bin bɑnn Yennu nɑn bin nbɑ k sɑk t Yonmdɑɑnɔ lɑbɑmɑnn nɑ tubɑ.

⁹U sɑɑ dɑt b tubɑ k biil’b yuo nbɑ kɑɑ gbennu k b sii fɔk nɑn Yonmdɑɑnɔ nɑn u yiikuo nbɑ yɑb,

¹⁰dɑɑl nbɑ k u tɑn sɑɑ bɑɑl k gɑɑl dontl nɑn pɑku u weilɑ kul nbɑ tien’ɔ yɑdɑ k tie u tiɑɔnŋ yɑb nɑ buol ni. I mun tɑn sii be b sinsuuk ni e, k mɑɑn i ponŋ tien mɑɑn nbɑ k t din tul’i nɑ yɑdɑ wɑɑ.

¹¹L pɑɑk e k t mei Yennu yuo kul k tien’i. T mei’ɔ, ɑ wun te k yin jɑnŋ nɑn binbenŋ nbɑ k u yiin’i, ɑ i be lenŋ nɑ ni e. T mei’ɔ, ɑ wun jii u yiikuo k te k yii tuun tuonŋɑnɑ kul nbɑ k i luon, ɑ yii tuun nɑ, k gbenn tuonɑ kul nbɑ k i tuun i yɑdɑ pɑɑk nɑ.

¹²Ŋɑnn e sɑɑ te k t Yonmdɑɑnɔ Yiesu sɑnn nɑ n lɑ dontl i sinsuuk ni, k yin mun lɑ dontl u buol ni. Yennu nɑn Yonmdɑɑnɔ Yiesu Klistu ninkpɑbɑɔnŋ o nɑ.