Read Moba 2 Tesɑɑluoniiktieb 2 Bible Online

2 Tesɑɑluoniiktieb 2 - Moba bible

2 Tesɑɑluoniiktieb 2

¹N nɑɑ wɑɑs, k jikt sɑɑ t Yonmdɑɑnɔ jenu mɑnŋ nɑn tinm nɑn ŋuɑ nbɑ tɑn sɑɑ cet lieb k tɑɑn be nɑ po,

²t bɑln’mi e, i dɑɑ mɔk jijiet i pɑlɑ ni ɑmi gbɑnɑnjijekt nɑn nisiɑb nbɑ yɑɑ ɑ Yomdɑɑnɔ dɑɑl mɑnŋ ponŋ bɑɑl ɑ nɑ. L pɑsiɑl b yien’i ɑ tinm din yet nnɑ sɔkni mɑɑn wɑnnu ni, ɑmi muɑnti ni, ɑmi kɑdɑɑɔk ni.

³I dɑɑ te k suɑ kpɑnn’i nɑn wɑɑn ɑ, k mɑɑn l dɑɑl kɑn bɑɑl sie k mɔyetuk yuo bɑɑl sinsinn, k *Klistu dɑtɑɑk nbɑ k Yennu sɑɑ biil’ɔ muu ni nɑ, n nyi pɑɑnu.

⁴U tɑn sɑɑ kɔn nɑn lin nbɑ kul k niib jiɑntl’l, nɑn lin nbɑ kul k niib duki nɑn l tie Yennu. U tɑn sɑɑ kɔn nɑn lin nbɑ nɑ kul k biɑ tɑn sɑɑ kuɑ Yennu jɑɑnti ŋɑsɑɑkɑk ni, k kɑl k pul u mɔnŋ Yennu.

⁵Mɑɑ din be i buol ni yuo nbɑ nɑ, n din yet’i lin nbɑ nɑ kul ɑ. I k tiɑn ii?

⁶Ŋɑɑn siɑl e lek dɑɑ diɑ’u, k i mi lɑɑ tie lin nbɑ, ŋɑɑn k u tɑn sɑɑ nyi pɑɑnu yuo nbɑ k Yennu tiɑɔnŋ din senn nɑ e.

⁷Bonbiil wuol ni yiikuo ponŋ tuun u tuonn, ŋɑɑn lin nbɑ tɑn sɑɑ tien, dɑɑ kɑn tien, sie k wun nbɑ dɑɑ te k l k fit tie nɑ tɑn bot sinsinn.

⁸L yuo mɑnŋ k Klistu dɑtɑɑk sɑɑ nyi pɑɑnu ni, k Yonmdɑɑnɔ Yiesu n kpi’u nɑn u mɔb ni wɑn, k biil’ɔ nɑn u bɑɑlu yentciɑɔnŋ.

⁹Klistu dɑtɑɑk mɑnŋ tɑn sɑɑ bɑɑl nɑn *Sɑɑtɑn yiikuo e k tun fɑɑk bɑktnɔunŋ tuonɑ nɑn yɑɑl-lituk tuonɑ,

¹⁰nɑn tuonbiit buolu kul nbɑ kpɑnn bin nbɑ k Yennu tɑn sɑɑ biil’b nɑ. B tɑn sɑɑ lɑ biilu, k mɑɑn b k gɑɑl, k biɑ k luon bɑlmɔni nbɑ bo sɑɑ fiel’b nɑ.

¹¹L pɑɑk e te k Yennu te k fɑɑk yiikuo tuun b ni, ɑ bin tien lin nbɑ tie fɑɑk nɑ yɑdɑ.

¹²L pɑɑk, Yennu tɑn sɑɑ biil bin nbɑ kul k tien bɑlmɔni mɑnŋ yɑdɑ ŋɑɑn luon bonbiil tumu nɑ.

¹³T nɑɑ wɑɑs, yinm nbɑ k Yonmdɑɑnɔ luon’i nɑ, l kpɑɑ tɑlɑs k t pɑk Yennu yuo kul i pɑɑk, k mɑɑn Yennu din lukt’i pinpiik ni e wɑɑ, ɑ yin lɑ fielu Foŋɑnm nbɑ tien’i Yennu tiɑɔnŋ yɑb nɑn yɑɑ tien lɑbɑmɑnn yɑdɑ nɑ pɑɑk.

¹⁴Tɑɑ din muɑnt lɑbɑmɑnn nbɑ k tul’i nɑ, Yennu din yiin’i, ɑ yin lɑ dontl nbɑ tie t Yonmdɑɑnɔ Yiesu Klistu tiɑɔnŋ yɑl e.

¹⁵T nɑɑ wɑɑs, l pɑɑk, setl mɑn cib, k diɑ wɑnnu nbɑ k t din wɑnn’i t mɑɑn ni, nɑn t kɑdɑɑɔk ni nɑ.

¹⁶T Yonmdɑɑnɔ Yiesu Klistu tiɑɔnŋ nɑn t Bɑɑ Yennu nbɑ luon’t, k tul’t pɑlcienn nbɑ kɑɑ gbennu nɑn dindɑnn nbɑ ŋɑn, u ninkpɑbɑɔnŋ nɑ pɑɑk nɑ,

¹⁷n cie i pɑlɑ k tul’i pɑnŋ k yin fit tun lin nbɑ kul ŋɑn i bontitiet nɑn i mɑɑn ni.