Read Moba 1 Tiimuote 3 Bible Online

1 Tiimuote 3 - Moba bible

1 Tiimuote 3

¹Bɑli nbɑ nɑ tie bɑlmɔni e, k jɑsuɑ nbɑ luon k wun tien *Klistu mɔtɑɑɔk niib yudɑɑnɔ, l tie tuonŋɑnn e k u luon.

²L k ŋɑn k yudɑɑnɔ mɑnŋ ii tuun lin nbɑ k niib sɑɑ fit tɑɑl’ɔ l pɑɑk. L kpɑɑ tɑlɑs e k wuu mɔk puo yenɔ kuɑ, kii tie wun nbɑ fit diɑ u mɔnŋ, kii tie wun nbɑ k niib tien’ɔ nibɑɑkl, kii gɑɑn sɑɑnm u ŋɑɑk ni kii cɑntl’b, kii tie wun nbɑ sɑɑ fit tumi niib fɑnu,

³k dɑɑ yib dɑɑn, k dɑɑ tie kunkɔnkɔnnuk ŋɑɑn kii be suon nnɑ, k dɑɑ luon mɔniɑɔk, k biɑ dɑɑ mɔk niɑnciɑɔnŋ nɑn likli.

⁴L kpɑɑ tɑlɑs e k wun fit kii diɑ u mɔnŋ ŋɑɑtieb fɑnu, k te k u wɑɑs n sɑk u mɔb nɑn cɔlnt.

⁵Ŋɑɑdɑɑnɔ i kii mi wɑɑ sɑɑ diɑ u ŋɑɑk niib biɑnŋ nbɑ, nlee k u sɑɑ fit diɑ Yennu mɔtɑɑɔk niib i?

⁶L kpɑɑ tɑlɑs k u dɑɑ tie dɑɑnɔ nbɑ gɑɑl Klistu k l dɑɑ k wei. Nnɑ e i kɑɑ, u tɑn sii mɔk kɑlnbɑɑni k wɑnt u mɔnŋ k tɑn lɑ tubdɑtu nbɑ k *Sɑɑtɑn lɑ nɑ.

⁷L kpɑɑ tɑlɑs k wuu tie dɑɑnɔ nbɑ k bin nbɑ k wɑɑ Klistu nɑ n yet ɑ u binbenŋ ŋɑn, k u dɑɑ mi di fei k *Sɑɑtɑn bɑluk tɑn sɑɑ mɑnn k suol’ɔ.

⁸L biɑ kpɑɑ tɑlɑs k jɑɑnti ni * sonmtieb ii mun ii tie jɑb nbɑ jɑnŋ nɑn niib n bɑɑk’b e, kii tie mɔmɔnm dɑnm, k dɑɑ nyu dɑɑn bonciɑnn, k biɑ dɑɑ luon bin lɑ nyuɑt fɑɑk tuonɑ pɑɑk.

⁹L kpɑɑ tɑlɑs k bii diɑ bɑlmɔni nbɑ k t yɑdɑ wɑnn’t nɑ, k dɑɑ mɔk bilsuk.

¹⁰L kpɑɑ tɑlɑs k Yiesu mɔtɑɑɔk niib n bik’m, k b i kii lɑ lin nbɑ b sɑɑ fit tɑɑl’b l pɑɑk, b sɑɑ fit kii tuun nɑn jɑɑnti niib sonmtieb nɑ.

¹¹Nnɑ e mun, b puob sii tie bin nbɑ jɑnŋ nɑn niib n bɑɑk’b, k dɑɑ tie bonbiil-pɑklɑ, ŋɑɑn kii be suon nnɑ kii tie bin nbɑ luon bɑlmɔni e.

¹²L kpɑɑ tɑlɑs k jɑɑnti niib * sonmtuɑ i mɔk puo yenɔ kuɑ, k biɑ fit diɑ u wɑɑs nɑn u ŋɑɑk niib fɑnu.

¹³B i tuun b tuonɑ fɑnu b sii mɔk nibɑɑkl k biɑ k mɔk bilsuk yuo nbɑ k b wɑnt niib bɑɑ tien Yiesu yɑdɑ bɑnnu nbɑ nɑ.

¹⁴Mɑɑ dɑ kɑdɑɑɔk nbɑ tien’ɑ nɑ, n mɔk dindɑnn nɑn mɑn bɑɑl mɔtɑɑnɑ k lɑ’ɑ,

¹⁵ŋɑɑn l i wei k n k bɑɑl, kɑdɑɑɔk nɑ sɑɑ te k ɑ sii mi niib nbɑ sii diɑ b mɔnŋ bɑnnu nbɑ Yennu ŋɑɑtieb sinsuuk ni. N piɑk mɑnfodɑɑnɔ Yennu mɔtɑɑɔk niib po e. Ŋuɑ guu’b k biɑ tie fiɑkl nbɑ k bɑlmɔni set l pɑɑk nɑ.

¹⁶Nn, l tie mɔni e, bɑktnɔunŋ minu nbɑ k yɑdɑ tien tinm nɑ yɑb: Klistu din bɑɑl k tie nisɑɑlk e, k tie bɑlmɔndɑɑnɔ, Foŋɑnm e din wɑnn nnɑ. Mɑlɑkɑɑnbɑ din lɑ’u wɑɑ, k niib din muɑnt u lɑbɑɑl k tul nibuolu kul, k b tien’ɔ yɑdɑ tingbounŋ nɑ ni, k **Yendɔunŋ ni k Yennu tul’ɔ *yudɑnt.