Read Moba 2 Tiimuote 1 Bible Online

2 Tiimuote 1 - Moba bible

2 Tiimuote 1

¹Min Pɔul wun nbɑ tie Yiesu *Klistu *tuomi Yennu nbɑ luon bɑnnu nbɑ nɑ pɑɑk, ɑ n muɑnt mɑnfuol nbɑ k Yennu din senn mɔsonn ɑ u sɑɑ tul’t nɑ Yiesu Klistu ni,

²n diɑn kɑdɑɑɔk nɑ k tien n bilonkɑk Tiimuote. Bɑɑ Yennu nɑn t Yonmdɑɑnɔ Yiesu Klistu ii mɔk ninkpɑbɑɔnŋ nɑn’ɑ k biɑ tul’ɑ nyikcɑbu nɑn mɑnu.

³N tien Yennu niipuouk nɑn mɑɑ tuun nɑn dudukŋɑnt nɑn n yejɑnm nbɑ din tuun bɑnnu nbɑ nɑ. N tien’ɔ niipuouk yuo kul nbɑ k n mei Yennu, yennu nɑn nyiɑɔk k biɑ tiɑn ɑ po.

⁴N tiɑn ɑ nyin-nyuut po, k lek luon k n lɑ’ɑ kii mɔk pɑlpienn bonciɑnn.

⁵N tiɑn ɑ mɔmɔnm yɑdɑ po, yɑdɑ nbɑ din sint be ɑ yɑɑ Loiis nɑn ɑ nɑɑ Euniis pɑlɑ ni nɑ, k n mi nɑn l ji be ɑ pɑl ni mɔtɑɑnɑ.

⁶L pɑɑk, k n tiɑtl’ɑ mɑɑ ɑ dɑɑ te k piini nbɑ k Yennu din tul’ɑ yuo nbɑ k n din yii n nii ɑ pɑɑk nɑ n kpo,

⁷k mɑɑn Foŋɑnm nbɑ k Yennu tul’t nɑ k tien’t jɑŋmɑɑndɑnm, ŋɑɑn Foŋɑnm mɑnŋ tien’t pɑnŋ nɑn lonm, nɑn diɑ-n-mɔnŋ e.

⁸L pɑɑk, din t Yonmdɑɑnɔ *siɑlɑ k dɑɑ tiin fei. A biɑ dɑɑ tiin fei nɑn mɑɑ be dɑnsɑlk u pɑɑk nɑ, ŋɑɑn sɑk fɑldinu nɑn’n u lɑbɑmɑnn mɑnŋ pɑɑk, nɑn Yennu nbɑ tul’ɑ pɑnŋ biɑnŋ nbɑ nɑ.

⁹Ŋuɑ e fiel’t k yiin’t ɑ tii tie u yɑb, k l k tie t tuonɑ pɑɑk kɑɑ ŋɑɑn u din lol k fiel’t u ninkpɑbɑɔnŋ pɑɑk e. U din tul’t ninkpɑbɑɔnŋ mɑnŋ Yiesu Klistu ni, yuo nbɑ k u dɑɑ din k nɑn *dulnyɑ nɑ.

¹⁰Ŋɑɑn t Fietuɑ Yiesu Klistu bɑɑlu ni e k u fiit wɑnn’t l po, k mɑɑn Yiesu Klistu din biil kuun yiikuo, ŋɑɑn biɑ wɑnn’t ɑ lɑbɑmɑnn ni, ɑ t sɑɑ lɑ mɑnfuol nbɑ kɑɑ gbennu.

¹¹Yennu ponŋ din yiin’n, ɑ n tien tuomi nɑn wɑntuɑ k muɑnt lɑbɑmɑnn mɑnŋ.

¹²L pɑɑk e te k n di fɑlɑ mɑnŋ, ŋɑɑn k n k tiin fei, k mɑɑn n mi wun nbɑ k n tien’ɔ yɑdɑ, k n biɑ mi k bilsuk kɑɑ nɑn u sɑɑ fit diɑ lin nbɑ k n jii k tien u nuu ni nɑ fɑnu mɔkmɔk nɑn buut dɑɑl.

¹³Jiin mɔmɔnm nbɑ k n din tul’ɑ nɑ, k fit bɑnn wɑnnu nbɑ ŋɑn k cie lin nbɑ nɑ, kii diɑ’l nɑn yɑdɑ nɑn lonm nbɑ k t mɔk Yiesu Klistu ni.

¹⁴Foŋɑnm pɑnŋ nbɑ be t ni nɑ pɑɑk, ii diɑ lɑbɑmɑnn nbɑ k u jii k tien ɑ nuu ni nɑ.

¹⁵A ponŋ mi nɑn suɑ kul nbɑ be Asii nɑ nyik’n ɑ, k b siɑb e tie Fiijel nɑn Helmojenn.

¹⁶Yonmdɑɑnɔ n tin Onesiifuol ŋɑɑtieb ninbɑɑɔk, k mɑɑn u dɑɑn yuɑ cien n pɑl. U dɑɑn k tin fei nɑn mɑɑ be dɑnsɑlk nɑ pɑɑk,

¹⁷ŋɑɑn wɑɑ dɑɑn tɑn bɑɑl Luonm yuo nbɑ, u dɑɑn piin luon mɑɑ be siɑn e nɑn ninmɔnn nɑn wɑɑ dɑɑn tɑn lɑ n buol.

¹⁸Yonmdɑɑnɔ n tin’ɔ ninbɑɑɔk dɑɑl mɑnŋ dɑɑl. A mɔnŋ mi fɑnu wɑɑ din sonm’n bonciɑnn biɑnŋ nbɑ Efes duo ni.