Read Moba 2 Tiimuote 3 Bible Online

2 Tiimuote 3 - Moba bible

2 Tiimuote 3

¹A mi nɑn tingbounŋ nɑ dɑjuonti yuo tɑn sii pɑɑl.

²Niib tɑn sii tie jɑwudɑnm e, nɑn liklonnɑ, k wɑnt b mɔnŋ, k tie jɑpɑdɑnm nɑn bin nbɑ suki Yennu, nɑn bin nbɑ k sɑɑk b dɑnm mɔi, nɑn bin nbɑ k tiɑn ŋɑnm po, nɑn bin nbɑ k tiin Yennu.

³B tɑn kii mɔk lonm nɑn niib, b tɑn kii tiin niib ninbɑɑɔk, k piɑk mɑbiit k tien lieb, k b binbenŋ tie yɑnɑ yɑnɑ nnɑ, k b nɑɑn bonsusuot, k nɑn tuonŋɑnɑ.

⁴B tɑn sii nyi lieb puoɑ e, k tie kɑɑtkɑɑtdɑnm, k dont b mɔnŋ. B tɑn sii luon bii tuun lin nbɑ mɑn k tul’b k kii mɔk lonm nɑn Yennu.

⁵B tɑn sii diɑ Yenjiɑntu sɑnn e, ŋɑɑn k sɑɑk l yiikuo. Nyint ɑ mɔnŋ l nibuolu ni.

⁶B siɑb e lin k doi ŋei k kpɑnn puoliini nbɑ tuu tuun tuonbiit bonciɑnn k wɑɑ b pɑlɑ niɑnbiit buolu buolu, k nyint b yɑn.

⁷Yuo kul ɑ, l puob gbiintl niib kpɑɑni, ŋɑɑn b k mi k bɑnn bɑlmɔni.

⁸Sɑɑnes nɑn Sɑnbles[1] nbɑ din kɔn nɑn Muois biɑnŋ nbɑ nɑ, l jɑbuolu mun tie nnɑ e. B kɔn nɑn bɑlmɔni, k b yɑn gbie nɑn dudukbiit, k b yɑdɑ k wɑ lɑn bɑɑ biknu ni.

⁹Ŋɑɑn b kɑn fit kpɑnn niib k wei, k mɑɑn suɑ kul tɑn sɑɑ lɑ b jɑti nbɑ tie biɑnŋ nbɑ, nɑn bɑɑ din lɑ Sɑnes nɑn Sɑnbles jɑti nbɑ din tie biɑnŋ nbɑ nɑ.

¹⁰Ŋɑɑn fin ŋɑnin ponŋ mi n wɑnnu po, nɑn n binbenŋ po, nɑn n dudukt po, nɑn n yɑdɑ po, nɑn n suklu po, nɑn n lonm nɑn niib po, nɑn n gbɑnkul po.

¹¹A mi niib nbɑ muks’n biɑnŋ nbɑ, nɑn n fɑldinu. A mi lin nbɑ kul nbɑ din tien’n Antiɑɔs, nɑn Ikoniunm nɑn Liistl. A mi mɑɑ din lɑ muksbiit biɑnŋ nbɑ, ŋɑɑn Yonmdɑɑnɔ e din fɑt’n l kul ni.

¹²Bɑlmɔni e, niib kul nbɑ luon k bii be binbenŋ nbɑ gbuot Yennu nunm Yiesu *Klistu ni nɑ, sɑɑ lɑ muksuk.

¹³k nitont nɑn kpinkpɑnni dɑnm lek tɑn sii ŋɑnmt puki b biit e, k kpɑnn lieb, k b lieb mun sɑɑ kpɑnn’b.

¹⁴Ŋɑɑn fin ŋɑnin, fii diɑ mɑɑn nbɑ k ɑ din tumi k gɑɑl k tien’l yɑdɑ nɑ, k mɑɑn ɑ ponŋ mi bin nbɑ din tie ɑ wɑntieb nɑ nbɑ tie biɑnŋ nbɑ.

¹⁵A bisn ni wɑɑ ɑ ponŋ mi Yennu lolkpel kɑdɑɑɔk. L kɑdɑɑɔk sɑɑ fit tul’ɑ yɑn k wɑnn’ɑ fɑɑ sɑɑ lɑ fielu ɑ yɑdɑ nɑn Klistu pɑɑk biɑnŋ nbɑ nɑ.

¹⁶Yennu lolkpel kɑdɑɑɔk munn tie mɑɑn nbɑ nyii Yennu mɔb ni, k l kul ɑ mɔk nyuɑt e, k wɑnt’t u po, k kpɑɑn’t, k ŋɑnmt t benu, k wɑnt’t binbenŋ nbɑ gbuot Yennu nunm nɑ sɔnu,

¹⁷ɑ nisuɑ kul nbɑ tie Yennu yuɑ nɑ binbenŋ ii ŋɑn, k wun tien siil kii fit kii tuun tuonŋɑnɑ buolu kul ɑ.