Read Moba Tiit 2 Bible Online

Tiit 2 - Moba bible

Tiit 2

¹Ŋɑɑn fin ii wɑnt lin nbɑ tɑɑ nɑn bɑlmɔni wɑnnu.

²A kpɑɑn jɑkpelɑ, ɑ bii be suon nnɑ, kii be bɑnnu nbɑ k b jɑnŋ nɑn nibɑɑkl, kii diɑ b mɔnŋ, kii diɑ lɑbɑmɑnn wɑnnu fɑnu, kii mɔk lonm nɑn niib, kii mɔk gbɑnkul.

³A biɑ kpɑɑn puokpelɑ, ɑ bii be bɑnnu nbɑ k niib ii mi nɑn b tie Yennu yɑb e, k dɑɑ tie sɑnjɑɑnjɑnnɑ, k biɑ dɑɑ nyu dɑɑn k yib, ŋɑɑn bii wɑnt kpɑɑni nbɑ ŋɑn.

⁴Nnɑ e k b sɑɑ fit wɑnn puobis ɑ bii luon b sɔlb nɑn b wɑɑs,

⁵kii piɑk bɑlmɔni, kii be binbenŋ nbɑ gbuot Yennu nunm nɑ ni, kii tuun tuonn fɑnu ŋɑɑk ni, kii mɔk bulcint, kii sɑɑk b sɔlb mɔi, ɑ suɑ dɑɑ fit piɑk bonbiil k jiint Yennu mɑɑn po.

⁶A biɑ kpɑɑn nɑɑsinm k bii diɑ b mɔnŋ fɑnu.

⁷Bonsiɑl kul ni, fii tuun tuonŋɑnɑ nbɑ sii wɑnt niib bɑɑ sii be biɑnŋ nbɑ. Fii wɑnt niib *Klistu lɑbɑɑl nɑn ninmɔnn nɑn bɑlmɔni,

⁸nɑn mɔbonɑ nbɑ k niib kɑn fit pɑk bonbiil k jiin l po, k bin nbɑ kɔn nɑn’ɑ nɑ ii di fei k mɑɑn b kɑn fit tɑɑl’t siɑl pɑɑk.

⁹L ŋɑn k dɑɑbɑ ii sɑɑk b yonmdɑnm mɔi, kii pent b pɑlɑ bonsiɑl kul ni. B dɑɑ noi nɑn b yonmdɑnm mɔniɑt,

¹⁰k dɑɑ jɑɑn b siɑl, ŋɑɑn kii tie dɑnm nbɑ sɑɑk b yonmdɑnm mɔi yuo kul k ŋɑn e sɑɑ te k niib n tul wɑnnu nbɑ piɑk t Fietuɑ Yennu po nɑ bɑɑkl.

¹¹K mɑɑn Yennu wɑnn u ninkpɑbɑɔnŋ nbɑ k niib kul fielu nyii lenŋ nɑ wɑɑ.

¹²L ninkpɑbɑɔnŋ e wɑnn’t nɑn tin nyik binbenŋ nbɑ k gbuot Yennu nunm nɑn tingbounŋ nɑ lonbiiuk, ŋɑɑn kii be binbenŋ nbɑ wɑnt nɑn t tie bɑlmɔnpɑklɑ, k biɑ tuɑk bɑlmɔni sɔnu, k biɑ tie Yennu yɑb e.

¹³Nnɑ e k t sii guu mɑnu nbɑ k t dɑɑn nɑ, dɑɑl nbɑ k Yiesu Klistu, wun nbɑ tie t Yenjɑɑnn nɑn t Fietuɑ nɑ, tɑn sɑɑ dɔkt yentsɑɑkɑl ni nɑ.

¹⁴Ŋuɑ e din gɑɑl t pɑɑk k kpo, ɑ wun fɑt’t biit kul dɑɑbs ni, k te k tii tie niib nbɑ be binbenŋ nbɑ gbuot Yennu nunm nɑ ni, k biɑ kii tie u tiɑɔnŋ yɑb, k biɑ kii tie niib nbɑ nunm mɔn nɑn tuonŋɑnɑ tumu.

¹⁵Lin nbɑ nɑ e tie lin nbɑ k ɑ sii wɑnt’b nɑ. Ii cien b pɑlɑ, kii biɑ kii kpɑɑn’m nɑn Yennu nbɑ tul’ɑ yiikuo nɑ. A dɑɑ ŋɑɑnt k b suɑ goli’ɑ yɑnn.