Read Moba Fiilemɔn 1 Bible Online

Fiilemɔn 1 - Moba bible

Fiilemɔn 1

¹Min Pɔul wun nbɑ be dɑnsɑlk Yiesu *Klistu sɑnn pɑɑk nɑ, nɑn t nɑɑ bik Tiimuote dɑ kɑdɑɑɔk nɑ k tien t tuontunluɑ Fiilemɔn wun nbɑ k t luon’ɔ nɑ,

²nɑn Yiesu mɔtɑɑɔk niib nbɑ lɑki lieb ɑ ŋɑɑk ni nɑ; k biɑ tien t niipuo Apiɑ[1] nɑn t tuontunluɑ Alkiip nbɑ mun lɑɑt muksuk u tuonn nɑ pɑɑk.

³T Bɑɑ Yennu nɑn Yonmdɑɑnɔ Yiesu Klistu n yɑt yetŋɑnm i pɑɑk k biɑ tul’i mɑnu.

⁴N nɑɑ bik, yuo kul, n Yenmiɑlu kul ni n tiɑn ɑ po k tien Yennu niipuouk,

⁵k mɑɑn n ponŋ gbiɑ fɑɑ tien Yonmdɑɑnɔ Yiesu yɑdɑ k luon u yɑb kul biɑnŋ nbɑ.

⁶N mei Yennu ɑ tinm nɑn fin nbɑ tɑɑn k tien Klistu yɑdɑ nɑ pɑɑk sɑɑ te k tin bɑnn fɑnu piisn nbɑ k t mɔk tɑɑ tɑɑ Klistu po nɑ pɑɑk.

⁷N nɑɑ bik, ɑ lonm mɑnŋ tul’n pɑlpienn nɑn pɑlcienn k ŋɑnm cie n pɑl bonciɑnn, k mɑɑn ɑ cie Yennu niib kul pɑlɑ.

⁸L pɑɑk, Klistu pɑɑk n bo kii mɔk jɑŋmɑɑni nɑn mɑn yet’ɑ fɑɑ sɑɑ tun lin nbɑ tuok,

⁹ŋɑɑn lonm pɑɑk k n bɑln’mɑ, min Pɔul nbɑ tie sɑɑkuɑ k biɑ be dɑnsɑlk ni mɔtɑɑnɑ Yiesu Klistu pɑɑk nɑ,

¹⁰n bɑln’mɑ k jiin Onesiinm po. U ji kpɑnt k tie n bik Klistu ni tɑɑ be dɑnsɑlk ni nɑ.

¹¹Sinsinn nɑ, u dɑɑn tuu k mɔk nyuɑt k tul’ɑ ni, ŋɑɑn mɔtɑɑnɑ u ji mɔk nyuɑt bonciɑnn k tien min nɑn fin kul ɑ.

¹²Mɔtɑɑnɑ, n tuun’ɔ ɑ wun ŋmɑt ɑ buol ni; k n pɑl lonm kul ɑ be u ni.

¹³N bo sii luon k mii diɑ’u n buol ni nnɑ nɑ k wuu tuun ɑ sienu ni kii sonmt’n mɑɑ be dɑnsɑlk ni Klistu lɑbɑmɑnn pɑɑk nɑ.

¹⁴Ŋɑɑn n dɑɑn k luon k n tun siɑl k ɑ k tɑɑ n po. N k luon k n mɑb’ɑ kɑɑ, ŋɑɑn n luon k lin nbɑ kul k ɑ sɑɑ tun n nyi ɑ mɔnŋ lonm ni e.

¹⁵Pɑsiɑl, Onesiinm siet ɑ buol yuo wɑɑnm-nnɑ e, ŋɑɑn ɑ sɑɑ lɑ’u k wuu be ɑ buol yuo kul.

¹⁶K mɑɑn mɔtɑɑnɑ u ji k tie dɑɑbl kɑɑ, ŋɑɑn u gɑl dɑɑbl ɑ, u tie t nɑɑ bilonkɑk e. N luon’ɔ bonciɑnn, ŋɑɑn ɑ sii luon’ɔ k gɑl nnɑ, k mɑɑn u tie nisɑɑlk e k biɑ tie Klistuyuɑ.

¹⁷L pɑɑk, l i tie k ɑ duki ɑ n tie ɑ yuɑk i e, fɑn gɑɑl’ɔ nɑn fɑɑ bo sɑɑ gɑɑl’n biɑnŋ nbɑ nɑ.

¹⁸L i tie k u biil ɑ siɑl ɑmi u diɑ ɑ pɑnsiɑl i e, fɑn te k mɑn pɑ l pɑnn.

¹⁹Nɑnn nɑ, n dɑ nɑn n mɔnŋ mɔnŋ nuu e; min Pɔul sɑɑ pɑ’ɑ. Ŋɑɑn min kɑɑ sɑɑ yet’ɑ, ɑ mɔnŋ mi nɑn ɑ diɑ n pɑnn ɑ mɑnfuol pɑɑk.

²⁰L pɑɑk, n ninjɑ, tun nnɑ Yonmdɑɑnɔ pɑɑk, k duɑn n pɑl, k mɑɑn t set tie wei-nɑn-lieb e Klistu ni.

²¹Mɑɑ dɑ kɑdɑɑɔk mɑnŋ k tien’ɑ nɑ, n k mɔk bilsuk nɑn ɑ sɑɑ sɑk tun k lin gɑl mɑɑ bɑln’mɑ lin nbɑ nɑ kul nɑ.

²²A biɑ sɑɑ tien dieok siil k guun’n, k mɑɑn i Yenmiɑlu pɑɑk, n mɔk dindɑnn nɑn Yennu sɑɑ te k n bɑɑl fuont’i.

²³Epɑɑflɑɑs wun nbɑ k min nɑn ŋuɑ be dɑnsɑlk Yiesu Klistu pɑɑk nɑ tien’ɑ u fuonti,

²⁴k n tuontunlieb, Mɑɑlk, nɑn Aliistɑɑlk, nɑn Demɑɑs, nɑn Luk, mun biɑ tien’ɑ b fuonti.

²⁵Yonmdɑɑnɔ Yiesu Klistu n yɑt yetŋɑnm i pɑɑk.