Read Moba Hebluonbɑ 11 Bible Online

Hebluonbɑ 11 - Moba bible

Hebluonbɑ 11

¹Yɑdɑ tie, tɑɑ k mɔk bilsuk nɑn bont nbɑ k t mɔk dindɑnn l pɑɑk nɑ set be, ŋɑɑn dɑɑ k lɑ’l nɑn t ninbinn nɑ e.

²Yennu din pɑk yɑɑyuo ni niib nɑ b yɑdɑ pɑɑk e.

³T yɑdɑ pɑɑk e k t bɑnn nɑn Yennu din tul mɔb k *dulnyɑ tien, k tɑɑ lɑɑt bonɑ nbɑ nɑ u din k jii bonsiɑl nbɑ k t lɑɑt nɑ kɑɑ k nɑn.

⁴Abel[5] yɑdɑ pɑɑk e k u din mɑnn mɑnnu tul Yennu k l mɑnnu ŋɑn k gɑl Kɑɑen yɑl. U yɑdɑ pɑɑk e k Yennu din yet ɑ u tie niŋɑnɔ ŋuɑ Yennu buol ni, k mɑɑn Yennu tiɑɔnŋ din gɑɑl u piini nɑ wɑɑ. Abel din kpo wɑɑ, ŋɑɑn u yɑdɑ pɑɑk e k u biɑ lek dɑɑ piɑk.

⁵Enɔk yɑdɑ pɑɑk e k u din tɑn k kpo, ŋɑɑn k Yennu din jii’u k duo nɑn’ɔ *Yendɔunŋ ni, k suɑ ji k lɑ’u, k mɑɑn Yennu e ponŋ din jii’u. K l diɑn Yennu lolkpel kɑdɑɑɔk ni, ɑ yuo nbɑ k Yennu dɑɑ din k jii’u nɑ, u din penn Yennu pɑl ni wɑɑ.

⁶Nilɔ i kii tien Yennu yɑdɑ, l dɑɑnɔ kɑn fit penn ŋuɑ Yennu pɑl ni, k mɑɑn wun nbɑ kul bɑɑt Yennu buol ni, l kpɑɑ tɑlɑs k l dɑɑnɔ n tien yɑdɑ nɑn Yennu set be k tien bin nbɑ kpɑɑn’ɔ nɑ nyuɑt.

⁷Noe yɑdɑ pɑɑk e din te k u gbɑt Yennu kpɑɑni nbɑ piɑk lin nbɑ k Noe dɑɑ din k fit lɑ’l nɑn u ninbinn nɑ po. U din sɑk Yennu mɔb k kpɑɑ ŋɑlngbenŋl, k ŋuɑ nɑn u ŋɑɑtieb kuɑ lenŋ k lɑ fielu wɑɑ. Ŋɑnn e din wɑnn nɑn tingbounŋ nɑ niib mɔk biit Yennu buol ni, ŋɑɑn k Noe yɑdɑ mɑnŋ pɑɑk k Yennu din yet, ɑ u tie niŋɑnɔ u buol ni.

⁸Yɑdɑ pɑɑk e din te k Ablɑɑhɑɑnm sɑk Yennu yiini, k sɑɑn tinŋ nbɑ k Yennu din senn mɔsonn k yɑɑ ɑ u sɑɑ tul’ɔ nɑ ni. U din nyik u mɔnŋ duo e, ŋɑɑn k k mi wɑɑ sɑɑ siɑn.

⁹U yɑdɑ pɑɑk e k u din dɑɑ tie sɑɑmɔ tinŋ nbɑ k Yennu din senn mɔsonn k yɑɑ ɑ u sɑɑ tul’ɔ nɑ ni. U din be bonkobgbɑnt lɑnbont ni e. U wɑɑs Isɑɑk nɑn Sɑɑkɔb nbɑ mun din tɑn gɑɑl Yennu mɔsonn nɑ din be l biɑnŋ e.

¹⁰K mɑɑn Ablɑɑhɑɑnm din guu, ɑ wun tɑn kuɑ duo nbɑ k Yennu din buɑn k mɑɑ k l fiɑkl wɑki hei nɑ ni e.

¹¹Ablɑɑhɑɑnm din gɑl nɑn mɑtuk ɑ, k Sɑɑlɑ mun din tie puokɑnmɑtl e, ŋɑɑn k Ablɑɑhɑɑnm yɑdɑ pɑɑk k u din fit lɑ bik, k mɑɑn u din mi nɑn wun nbɑ din senn mɔsonn mɑnŋ nɑ k ŋmɑt puol.

¹²L pɑɑk, Ablɑɑhɑɑnm nbɑ din tie nilɔ nbɑ ji tɑn k fɔk nɑn kuun nɑ, ŋɑɑn u kuukuɑ yɑɑbuonɑ e tɑn yɑb nɑn ŋmɑɑbilɑ nbɑ yɑb biɑnŋ nbɑ nɑ, k biɑ yɑb nɑn mɔkgbenŋl gbingbɑnn pɑɑk tɑnbiini nbɑ yɑb k kɑɑ kɑnn biɑnŋ nbɑ nɑ.

¹³Niib nbɑ nɑ kul din tuu tɑn kpo nɑn b yɑdɑ ŋɑɑn dɑɑ k gɑɑl lin nbɑ k Yennu din senn mɔsonn, ɑ u sɑɑ tul u niib nɑ, ŋɑɑn b yɑdɑ mɑnŋ pɑɑk, b din dɔnŋ lɑ’l bɑnfɔkl e wɑɑ k biɑ gɑɑl nɑn l tie bonŋɑnn e. B din bɑnn k sɑk nɑn b tie sɑɑnm e k tie kunsɑnnɑ tingbounŋ nɑ ni.

¹⁴Niib nbɑ yien lin nbɑ nɑ, fiit k wɑnt nɑn b lek dɑɑ kpɑɑn b tiɑɔnŋ duo siɑl po e.

¹⁵Niib mɑnŋ ii dinŋ ii pɑbi bɑɑ ponŋ nyii duo nbɑ nɑ po i e, b din bo sɑɑ fit ŋmɑt ɑ.

¹⁶Ŋɑɑn b bɑkɑ din be Yendɔunŋ ni duo nbɑ cie nɑ po e. K l pɑɑk Yennu k tiin fei nɑn bin yiin’ɔ b Yennu, k mɑɑn u ponŋ din ŋɑnm dosɑu e k guun’m.

¹⁷Yuo nbɑ k Yennu din bikn’ɔ nɑ, Ablɑɑhɑɑnm yɑdɑ pɑɑk e biɑk, k u din jii u bijɑ Isɑɑk, ɑ wun mɑnn *mɑlunŋ k tul Yennu. Ŋuɑ Ablɑɑhɑɑnm e k Yennu din senn’ɔ mɔsonɑ, ŋɑɑn k u biɑ wɑnn Yennu nɑn u tien siil k sɑɑ jii u bijɑyenml k tien mɑlunŋ k tul’ɔ.

¹⁸Ŋɑɑn Yennu din ponŋ yet’ɔ ɑ: «Isɑɑk ni e k ɑ tɑn sɑɑ lɑ yɑɑbuonɑ nbɑ k n din senn mɔsonn, ɑ n sɑɑ tul’ɑ nɑ.»

¹⁹Ŋɑɑn Ablɑɑhɑɑnm din dukn nɑn Yennu mɔk yiikuo nbɑ sɑɑ fiin nilɔ kuun ni e. L pɑɑk e k Yennu din jiin u bik k tul’ɔ, k l nɑɑn nɑn u fiil kuun ni nɑ e.

²⁰Isɑɑk yɑdɑ pɑɑk e din te k u yɑt yetŋɑnm Sɑɑkɔb nɑn Esɑɑu pɑɑk k jiin lin nbɑ sɑɑ bɑɑl nɑ.

²¹Yuo nbɑ k Sɑɑkɔb din yɑɑ wun kpo nɑ, u yɑdɑ pɑɑk e din te k u yɑt yetŋɑnm Suosiɑf bonjɑi nɑ pɑɑk, k din tɑn diin u pɑtu k jiɑnt Yennu.

²²Suosiɑf mɑnfuol nbɑ din tɑn yɑɑ lin gbenn yuo nbɑ nɑ, u yɑdɑ pɑɑk e k u din pɑk Islɑɑeltieb nyinu po Ejipt tinŋ ni, k biɑ din wɑnn’b bɑɑ tɑn sɑɑ tien u kpɑbɑ biɑnŋ nbɑ.

²³B yɑdɑ pɑɑk e k Muois bɑɑ nɑn u nɑɑ nbɑ din mɑl’ɔ yuo nbɑ nɑ, b din bɔl’ɔ k tɑn jɑnŋ ŋmɑɑli ŋɑntɑ, k mɑɑn b din lɑ k u fɑn, k b k tiin kpɑnbɑl *senni nɑ jɑŋmɑɑni.

²⁴Muois nbɑ din tɑn kpɑɑt yuo nbɑ, u yɑdɑ pɑɑk e k u din k sɑk bii yi’u Fɑɑlɑɑɔn nɑ bipuo nɑ bijɑ.

²⁵U din sɑk nɑn wun di fɑlɑ nɑn Yennu niib e, ŋɑɑn k k sɑk biit pɑlpienn nbɑ tuu be yuo wɑɑnm-nnɑ nɑ.

²⁶U din dukn ɑ b i suki’ɔ *Klistu pɑɑk, l mɔk nyuɑt bonciɑnn k cie Ejipt tinŋ ni mɔktuk kul ɑ, k mɑɑn u ninbinn din kpɑɑ nyuɑt nbɑ bɑɑt nɑ pɑɑk e.

²⁷Ŋuɑ Muois yɑdɑ pɑɑk e din te k u nyii Ejipt, k k jie kpɑnbɑl nɑ wutuol jɑŋmɑɑni, ŋɑɑn lek sɑɑ tuɑnn k mɑɑn l nɑɑn nɑn u lɑɑt Yennu nbɑ k suɑ k lɑɑt’ɔ nɑn ninbinn nɑ.

²⁸U yɑdɑ pɑɑk e din te k u din piin *yuktgɑltiɑlu jɑɑnm, k din senn senni, ɑ bin mii sɔn b ŋei tɑnmɔi pɑɑk, ɑ k kuun mɑlɑkɑ nɑ tɑn dɑɑ kpi Islɑɑeltieb bijɑkpelɑ.

²⁹Islɑɑeltieb yɑdɑ pɑɑk e k mɔkmunŋ nɑ din bɔkt k tien tinkuonŋ k tul’b k b puot, ŋɑɑn k Ejipt-tieb mun din bikn ɑ bin puot, k mɔkl mɑnŋ nyun nɑ jiin mubn k dii’b.

³⁰Islɑɑeltieb nbɑ din tɑn bɑɑl Seliiko yuo nbɑ, b yɑdɑ pɑɑk e, k b din sonm lint l juonɑ dɑɑ ŋɑnlole, k l bɑɑ.

³¹Puocunconn nbɑ k b yi’u Lɑɑhɑɑb nɑ yɑdɑ pɑɑk e din te k Islɑɑeltieb din k kpii’u, ŋɑɑn kpii bin nbɑ din k sɑk Yennu mɔb nɑ, k mɑɑn Lɑɑhɑɑb din gɑɑl Islɑɑeltieb niib nbɑ din bɑɑl, ɑ bin diit duo mɑnŋ ni nɑ sɑɑɔnŋ.

³²N sɑɑ pɑk bee k pukn i? Yuo sɑɑ pɔt’n nɑn k n wɑnn’i Sedeɔn[6] lɑbɑɑl, nɑn Bɑɑlɑɑk[7] lɑbɑɑl, nɑn Sɑnmsɔn lɑbɑɑl, nɑn Sefte lɑbɑɑl, nɑn Dɑɑfiid lɑbɑɑl, nɑn Sɑɑmuel lɑbɑɑl, nɑn *Yennu sɔkniinbɑ lɑbɑɑl.

³³B yɑdɑ pɑɑk k b siɑb din kɔn k nyɑnn tini, k siɑb tun lin nbɑ k Yennu luon k lɑ lin nbɑ k Yennu din senn mɔsonn nɑn u sɑɑ tul’b nɑ. K siɑb suol yɑnbɔlɑ mɔi,

³⁴k siɑb mun kpien mupieunŋ, k siɑb tin nyii juk-bɑnjɑi kuun ni. K siɑb mun din tie tɑli e ŋɑɑn din tɑn kpɑnt pɑɑlb, k siɑb mun din tuok tɑb nɑn pɑnŋ k kɔn nyɑnn dɑtɑi.

³⁵K puosiɑb din lɑ b nikpiinm nbɑ din kpo nɑ fiil kuun ni. K siɑb din be k niib buo’b k kpii’b, k b k yet Yennu weiu ɑ bin nyi kuun mɑnŋ ni, k mɑɑn b luon bin fiil kuun ni k lɑ mɑnfuol nbɑ cie tingbounŋ nɑ yɑl.

³⁶K niib din dɑɑn siɑb nyɑtuk, k biɑ buo’b gbɑnn, k b bɑɑn b siɑb jɑlt, k jii’b sɑɑn kuɑn’m dɑnsɑli ni.

³⁷B din jɑɑt b siɑb tɑnɑ e, k ŋmɑ b siɑb nɑn kɑnpintɑnbɑ juki k poli’b, k b jikt juk-bɑnjɑi k kpi b siɑb, k lieb din liɑ pegbɑnt, k lieb biɑ liɑ bugbɑnt k lin nɑn nɑmu, k niib muks’b k dint’b fɑlɑ biɑk.

³⁸Tingbounŋ nɑ tieb din k jɑnŋ nɑn bii be nɑn’m. K b din lin yiek kunkuot pɑɑk nɑn juɑt ni, k lin duɑ tɑnfiɑt nɑn fɔli ni.

³⁹Bin nbɑ nɑ kul yɑdɑ pɑɑk e k Yennu din yet ɑ b tie niŋɑnm, ŋɑɑn k b din k gɑɑl lin nbɑ k u din senn mɔsonn, ɑ u sɑɑ tul u niib nɑ,

⁴⁰k mɑɑn t pɑɑk e k u din mɑntk duki bonsiɑl nbɑ cie nɑ po, ŋɑnn e tie ɑ u sɑɑ te k tinm nɑn ŋɑnm n tɑn lɑkn kii be binbenŋ nbɑ k b mɔk nɑ ni.