Read Moba Hebluonbɑ 2 Bible Online

Hebluonbɑ 2 - Moba bible

Hebluonbɑ 2

¹L pɑɑk, l kpɑɑ tɑlɑs e k tin gbiint bɑlmɔni nbɑ k t din gbɑt nɑ fɑnu k tɑn dɑɑ buol.

²Lɑbɑɑl nbɑ k mɑlɑkɑɑnbɑ din muɑnt k tul t yejɑnm nɑ din tie bɑlmɔni e, k wun nbɑ din tuu k sɑk k wei’l din tuu lɑ tubdɑtu nbɑ jɑnŋ’ɔ e.

³L pɑɑk, t i kii sɑk k gbiint fieljɑɑnn mɑnŋ lɑbɑɑl fɑnu, t sɑɑ tien nlee k nyi tubdɑtu ni? Yonmdɑɑnɔ tiɑɔnŋ o din dɔnŋ muɑnt fielu mɑnŋ lɑbɑɑl nɑ po, k bin nbɑ din gbɑt nɑ din wɑnn’t ɑ l set tie bɑlmɔni e.

⁴Yennu tiɑɔnŋ din wɑnn nɑn mɑɑn mɑnŋ tie bɑlmɔni e, k din tuun bɑktnɔunŋ nɑn yɑɑl-lituk tuonɑ, k biɑ tien’m Foŋɑnm piini nɑn wɑɑ luon biɑnŋ nbɑ nɑ.

⁵*Dulnyɑ nbɑ bɑɑt k t pɑk l po nɑ, Yennu din k yɑɑ ɑ mɑlɑkɑɑnbɑ e tie l yudɑnm.

⁶L diɑn siɑl po Yennu lolkpel kɑdɑɑɔk ni ɑ: «Yennu, nisɑɑlk tie bee k ɑ duki u po, k nilɔ bik tie bee k ɑ bɑkɑ be u ni?

⁷A din sikn’ɔ yuo wɑɑnm-nnɑ mɑlɑkɑɑnbɑ buol, k biɑ te k u lɑ dontl nɑn pɑku,

⁸k ɑ te k u mɔk yiikuo bonsiɑl kul pɑɑk.» L i tie k b yet ɑ Yennu tul nilɔ yiikuo «bonsiɑl kul pɑɑk,» l wɑnt nɑn u set mɔk yiikuo bonsiɑl kul pɑɑk k siɑl k tenn. Ŋɑɑn mɔtɑɑnɑ t dɑɑ k lɑ nɑn u mɔk yiikuo bonsiɑl kul pɑɑk.

⁹Ŋɑɑn t lɑ nɑn Yennu din sikn Yiesu yuo wɑɑnm-nnɑ mɑlɑkɑɑnbɑ buol, ɑ k Yennu ninkpɑbɑɔnŋ pɑɑk, wun kpo niib kul pɑɑk, k mɔtɑɑnɑ k t lɑ k u mɔk *yudɑnt nɑn sɑnn u kuun mɑnŋ pɑɑk.

¹⁰K mɑɑn Yennu nbɑ din nɑn bonsiɑl kul k biɑ diɑ l kul nɑ, wɑɑ jii u wɑɑs bonciɑnn k kuɑn’m u nɑɑn ni nɑ, l din tokn u buol ni, ɑ wun te k b fielu dɑɑnɔ Yiesu n tien b Fietuɑ nɑn bɑlmɔni u fɑlɑ dinu ni.

¹¹Yiesu, wun nbɑ wu nisɑɑli biit nɑ, nɑn bin nbɑ kul k u wuul b biit nɑ tɑɑ Bɑɑ e. L pɑɑk e k Yiesu k tiin fei nɑn wun yiin’m u nɑɑ wɑɑs.

¹²U yet Yennu ɑ: «N tɑn sɑɑ muɑnt ɑ sɑnn n nɑɑ wɑɑs buol ni; n tɑn sɑɑ pɑk’ɑ ɑ niib tintɑɑnu ni.»

¹³U biɑ yet ɑ: «N tɑn sii duu Yennu pɑɑk,» k biɑ yet ɑ: «Min nɑn wɑɑs nbɑ k Yennu din tul’n nɑ e be nɑ.»

¹⁴Tɔn, wɑɑs mɑnŋ nbɑ tie nisɑɑli nɑ pɑɑk, Yiesu mun din tie nisɑɑlk e nɑn ŋɑnm nɑ, ɑ u kuun ni wun tɑn biil *Sɑɑtɑn nbɑ diɑ kuun yiikuo nɑ,

¹⁵k biɑ fɑt bin nbɑ be dɑɑbs ni b mɑnfuol kul ni, bɑɑ tiin kuun jɑŋmɑɑni nɑ pɑɑk nɑ.

¹⁶Bɑlmɔni e, l k tie mɑlɑkɑɑnbɑ kɑɑ k u sonmt, ŋɑɑn Ablɑɑhɑɑnm yɑɑbuonɑ e k u sonmt.

¹⁷Ŋɑnn e l din kpɑɑ tɑlɑs nɑn wuu tie wɑɑs mɑnŋ ninnɑɔnŋ dede, k fit tien b *mɑnntɔyudɑɑnɔ nbɑ mɔk ninbɑtinu k biɑ tie bɑlmɔni dɑɑnɔ, k fit jii u mɔnŋ k tien *mɑlunŋ k tul Yennu, k wɑɑs nɑ n lɑ nyikcɑbu b biit pɑɑk.

¹⁸K mɔtɑɑnɑ, u sɑɑ fit k sonm bin nbɑ lɑ jinjɑnmi, k mɑɑn u tiɑɔnŋ din lɑ jinjɑnmi k biɑ dii fɑlɑ wɑɑ.