Read Moba Hebluonbɑ 5 Bible Online

Hebluonbɑ 5 - Moba bible

Hebluonbɑ 5

¹Tɔn, b lukt *mɑnntɔyudɑɑnɔ kul niib sinsuuk ni ɑ wuu tuun Yennu tuonn k sonm niib k biɑ gɑɑl b pɑɑk k mɑnn *mɑlunŋ k tul Yennu b biit pɑɑk.

²Wɑɑ mun tie butmɔ nɑ, u fit gbiɑ bin nbɑ puɑl yɑn nɑn bin nbɑ kpet sɔnu ni nɑ dudukt pɑɑk,

³k u mɔnŋ nbɑ tie butmɔ nɑ pɑɑk, l kpɑɑ tɑlɑs k wun mɑnn mɑlunŋ u mɔnŋ biit pɑɑk nɑn wɑɑ mɑnn mɑlunŋ niib nɑ biit pɑɑk biɑnŋ nbɑ nɑ.

⁴Suɑ kɑn fit pɑk u mɔnŋ k yet, ɑ u tie mɑnntɔyudɑɑnɔ k k gɑɑl l nibɑɑkl, sie k Yennu n lukt’ɔ nɑn wɑɑ din lukt *Aɑlɔn k tien’ɔ mɑnntɔyudɑɑnɔ biɑnŋ nbɑ nɑ.

⁵Nnɑ e mun k *Klistu din k lukt u mɔnŋ k yet, ɑ u tie mɑnntɔyudɑɑnɔ k gɑɑl l nibɑɑkl, ŋɑɑn Yennu e din yet’ɔ ɑ: «A tie n Bijɑ e, k dinnɑ n tie ɑ Bɑɑ.»

⁶K biɑ yet siɑl buol ɑ: «A sii tie mɑnntuɑ nɑn yuo nbɑ kɑɑ gbennu, kii tie Melkiisedek pɑɑbu ni mɑnntuɑ.»

⁷Tɔn, Yiesu nbɑ din be tingbounŋ nɑ ni yuo nbɑ nɑ u din mei Yennu k bɑln’mɔ, k bui nɑn nyin-nyuut Yennu nbɑ sɑɑ fit fɑt’ɔ kuun ni nɑ buol ni. K wɑɑ din bɑɑkt Yennu nɑ pɑɑk k Yennu din gbɑt u miɑlu mɑnŋ.

⁸Wɑɑ lek din tie Yennu Bijɑ nɑ, ŋɑɑn u tumi cɔlnt u fɑldinu ni.

⁹Wɑɑ din tɑn dii fɑlɑ gbenn yuo nbɑ, bin nbɑ kul cɔln’mɔ ji din fit lɑ fielu nbɑ kɑɑ gbennu u buol ni,

¹⁰k Yennu yiin’ɔ mɑnntɔyudɑɑnɔ, Melkiisedek pɑɑbu ni.

¹¹T bo sɑɑ pɑk bonciɑnn lin nbɑ nɑ po, ŋɑɑn l pɑɑl nɑn k t wɑnn’i, k mɑɑn i k bɑnt l pɑɑk yiɑn.

¹²Nnɑ yuo l ji bo kpɑɑ tɑlɑs e k yii tie wɑntieb, ŋɑɑn i biɑ luon k suɑ n wɑnn’i Yennu mɑɑn pinpiik ni sɔni nɑ. I luon biin e, k k luon jeŋmɑnkɑt.

¹³Wun nbɑ dɑɑ muɑl biin tie bibunn e, k dɑɑ k mi fɑnu lin nbɑ ŋɑn nɑn lin nbɑ bi.

¹⁴Ŋɑɑn jeŋmɑnkɑt tie sɑɑkɑb yɑl e, k ŋɑnm e fit bɑnt lin nbɑ tie bonbiil nɑn lin nbɑ tie bonŋɑnn, bɑɑ tuu dukn l po b pɑlɑ ni nɑ.