Read Moba Hebluonbɑ 6 Bible Online

Hebluonbɑ 6 - Moba bible

Hebluonbɑ 6

¹L pɑɑk, ŋɑɑnt mɑn k tin tumi lin nbɑ tie sɑɑkɑb yɑl *Klistu ni k sɑɑn tuɑnn po. Ŋɑɑn t ji dɑɑ goli sinsinn tumiu nɑ kɑɑ. T ji k ŋɑnm fɔkn fiɑkl nbɑ sɑɑ te k nilɔ n nyik tuonɑ nbɑ sɑɑ biil’ɔ nɑ kɑɑ, kuo wɑɑ sɑɑ tien Yennu yɑdɑ bɑnnu nbɑ nɑ kɑɑ.

²L ji k kpɑɑ tɑlɑs k tin ŋɑnm tumi Yennu nyunwulu po, nɑn niiyiinu niib pɑɑk, nɑn kpienm fiilu po, nɑn tubdɑtu nbɑ kɑɑ gbennu nɑ po kɑɑ.

³Yennu i sɑk, t sɑɑ sɑɑn tuɑnn e.

⁴Ŋɑɑnt mɑn k tin got bin nbɑ ŋmɑt bɑɑ binbenbiik ni nɑ: b din lɑ Yennu yentu nɑ wɑɑ. B din lenm **Yendɔunŋ ni piini k biɑ din gɑɑl Foŋɑnm ɑ.

⁵B din luon Yennu mɑɑn nbɑ ŋɑn nɑ, k din mi *dulnyɑ nbɑ bɑɑt nɑ yiikuo buolu buolu po.

⁶Ŋɑɑn nɑn lin nbɑ nɑ kul, k b lek tɑn ŋmɑt bɑɑ binbenbiik ninŋ. L nibuolu, suɑ ji kɑn fit te k bin ŋɑnm k mɔ kuɑŋɑɑn k lebt binbenŋ. Bɑlmɔni, b ŋɑnmt kpɑɑn Yennu Bijɑ dɑpunpunn pɑɑk e, k tien lieb yɑɑk nbɑ k b sii suki’ɔ.

⁷Tɔn, tinŋ nbɑ k sɑɑk tuu bɑɑ l pɑɑk k l mɑɑkt k tie jiet k tien bin nbɑ ŋɑnmt’l nɑ, Yennu e yɑt yetŋɑnm tinŋ mɑnŋ pɑɑk.

⁸Ŋɑɑn tinŋ mɑnŋ i tie kunkoni nɑn mɔbiit, l k mɔk nyuɑt, l kɑn wei k Yennu tɑn sɑɑ pol’l mɔb. K juontu ni lin di muu.

⁹T yɔnimɔni, tɑɑ lek piɑk lin nbɑ nɑ, ŋɑɑn t k mɔk bilsuk i po. T mi nɑn i tɔk sɔnŋɑnu e, fielu sɔnu.

¹⁰Yennu k tuun lin nbɑ k ŋɑn. U kɑn tɑnm i tuonn po, k biɑ kɑn tɑnm yɑɑ luon’ɔ biɑnŋ nbɑ tuonɑ nbɑ k i tun k tul’ɔ nɑn tuonɑ nbɑ k i tuun i nɑɑ wɑɑs Klistuyɑb nɑ ni.

¹¹T luon k i suɑ kul n yɑbl u mɔnŋ pɑɑk nɑn ninmɔnn e nɑn yɑɑ tuu tuun bɑnnu nbɑ mɔkmɔk nɑn l juontu, k yɑɑ mɔk dindɑnn biɑnŋ nbɑ nɑ, l set sɑɑ tien mɔni k tul’i.

¹²T k luon k yii tie gbɑn-nyɑkdɑnm kɑɑ, ŋɑɑn t luon k yii wɑɑ bin nbɑ mɔk yɑdɑ nɑn suklu e. Ŋɑnm e gɑɑn bonŋɑnɑ nbɑ k Yennu din senn mɔsonn nɑ.

¹³Yennu nbɑ din senn u mɔsonn tul Ablɑɑhɑɑnm yuo nbɑ nɑ, u din lol *lol, ɑ u tɑn sɑɑ tun wɑɑ din senn mɔsonn nbɑ nɑ wɑɑ. Suɑ din k be k cie Yennu tiɑɔnŋ, k l pɑɑk, u din jii u mɔnŋ sɑnn e k lol u lol mɑnŋ.

¹⁴U din yet’ɔ ɑ: «L tie bɑlmɔni e, n yɑt yetŋɑnm ɑ pɑɑk k biɑ sɑɑ tul’ɑ yɑɑbuonɑ bonciɑnn.»

¹⁵K Ablɑɑhɑɑnm din mɔk suklu e, k tɑn gɑɑl lin nbɑ k Yennu din senn mɔsonn ɑ u sɑɑ tul’ɔ nɑ.

¹⁶Nilɔ i lol lol, u tuu jii wun nbɑ gɑl’ɔ sɑnn e k lol, k lol mɑnŋ tie nyinn nbɑ kpi mɔniɑɔk kul ɑ.

¹⁷Tɔn, bin nbɑ din yɑɑ bin gɑɑl Yennu nbɑ din senn mɔsonn nbɑ nɑ, u din luon wun wɑnn’b, ɑ u kɑn mi lebt u dudukt, k l pɑɑk k u din pukn u lol u mɔsonn mɑnŋ pɑɑk.

¹⁸L pɑɑk, bonɑ ŋɑnle be k kɑɑ lebtu k Yennu biɑ kɑn fit fɑɑl fɑɑk l pɑɑk. Ŋɑnn mɑnŋ pɑɑk, tinm nbɑ lɑ gungulbuol u buol ni nɑ, t mɔk pɑlcienn nbɑ sɑɑ te k tin tin k suol dindɑnn nbɑ k Yennu din senn’t mɔsonn nɑ nɑn pɑnŋ.

¹⁹Dindɑnn nbɑ k t mɔk nɑ tie nɑn mɑnfuol jɑɑntɑlk nbɑ diɑ t mɑnfuol fɑnu. L tie dindɑnn nbɑ gɑl Yendɔunŋ ni Yennu jɑɑnti ŋɑsɑɑkɑk cincenn nbɑ tuu juɑn k puun nɑ e, k kuɑ dieok mɑnŋ linn po.

²⁰Lenŋ e k Yiesu ponŋ din gɑɑl t pɑɑk k gɑl k tie t sɔnliitɔ, k tien t *mɑnntɔyudɑɑnɔ nɑn yuo nbɑ kɑɑ gbennu, Melkiisedek pɑɑbu ni.