Read Moba 1 Piɑl 1 Bible Online

1 Piɑl 1 - Moba bible

1 Piɑl 1

¹Min Piɑl nbɑ tie Yiesu *Klistu *tuomi nɑ e dɑ kɑdɑɑɔk nɑ k tien bin nbɑ k Yennu lukt’b k b yɑt k be Pɔn nɑn Gɑɑlɑɑti nɑn Kɑpɑdos nɑn Asii nɑn Biitiini tini ni k tie sɑɑnm nɑ.

²Yennu, Bɑɑ nɑ, din dɔnŋ lol k lukt’i, ɑ yii tie u yɑb Foŋɑnm yiikuo pɑɑk kii sɑɑk Yiesu Klistu mɔb k u sɔn n wuul i pɑl ni. Yennu ii mɔk ninkpɑbɑɔnŋ nɑn’i k biɑ tul’i mɑnu nbɑ kɑɑ pɑɑk.

³Pɑkn mɑn Yennu nbɑ tie t Yonmdɑɑnɔ Yiesu Klistu Bɑɑ nɑ, k mɑɑn u tin’t ninbɑɑɔk bonciɑnn k tul’t mɑnfopɑɑnn Yiesu Klistu kuun fiilu pɑɑk. Lin nbɑ nɑ e te k t mɔk dindɑnn nɑn t tɑn sii mɔk mɑnfuol,

⁴k lɑ lin nbɑ tie Yennu wɑɑs yɑl, k l sii be yuo nbɑ kɑɑ gbennu, k kɑn biil, k l fɑnt biɑ kɑn siil, k l be *Yendɔunŋ ni

⁵k guu yinm nbɑ k Yennu yiikuo diɑ’i i yɑdɑ pɑɑk, ɑ yin lɑ i fielu nbɑ tien siil k sɑɑ nyi pɑɑnu dɑɑjuonti nɑ.

⁶L pɑɑk, i ji mɔk pɑlpienn bonciɑnn. L i lek i tie ɑ i mɔk pɑlbiil yuo wɑɑnm-nnɑ mɔtɑɑnɑ k mɑɑn yɑɑ lɑ fɑlbuolu buolu nɑ pɑɑk, i mɔk pɑlpienn e.

⁷Fɑlɑ mɑnŋ biki’i, ɑ lin lɑɑn i tien Klistu yɑdɑ fɑnu ɑmi ii? Sɑlmɑ sɑɑ fit k biil, ŋɑɑn b tuu jii’l k tien muu ni e, ɑ bin lɑɑn l ŋɑn ɑmi l k ŋɑn. L mun biɑ tie nnɑ e nɑn i yɑdɑ. I yɑdɑ ŋɑn k cie sɑlmɑ, ŋɑɑn k Yennu biki i yɑdɑ mɑnŋ. L pɑɑk, Yiesu Klistu nbɑ tɑn sɑɑ dɔkt, i sɑɑ lɑ sɑnn nɑn dontl nɑn *yudɑnt, i yɑdɑ ŋɑnt pɑɑk.

⁸I k mi lɑ Yiesu ŋɑɑn luon’ɔ, i biɑ k lɑɑt’ɔ mɔtɑɑnɑ, ŋɑɑn k biɑ lek tien’ɔ yɑdɑ. L pɑɑk e k i gbie nɑn pɑlpienn nbɑ yɑb k kɑɑ pɑɑk k nilɔ kɑn fit k bign.

⁹K mɑɑn i lɑɑt lin nbɑ k i yɑdɑ tien’i k ŋɑnn e tie i sei fielu.

¹⁰Fielu nɑ e k sɔkniinbɑ din luon bin bɑnn l pɑɑk nɑn ninmɔnn, k din sɔknt ɑ l tɑn sii tie yinm e k Yennu sii mɔk ninkpɑbɑɔnŋ nɑn’i.

¹¹Klistu Siek nbɑ din be b ni din wɑnn’b ɑ u tɑn sɑɑ lɑ fɑlɑ, k l puolpo k u biɑ tɑn sɑɑ lɑ dontl bonciɑnn, k b kol k luon bin bɑnn yuo nbɑ k l tɑn sɑɑ tun, k biɑ luon bin bɑnn lɑ tɑn sɑɑ tun biɑnŋ nbɑ.

¹²K Yennu fiit wɑnn’b, ɑ b k sɔknt b mɔnŋ po kɑɑ, ŋɑɑn yinm po e k b sɔknt. Foŋɑnm nbɑ k u din tun’ɔ ɑ wun nyi Yendɔunŋ ni nɑ e mun te k bin nbɑ muɑntl lɑbɑmɑnn nɑ yien’i mɑɑn mɑnŋ. Lin nbɑ nɑ e k mɑlɑkɑɑnbɑ mun luon bin bɑnn l pɑɑk.

¹³L pɑɑk, i tien i dudukt siil, k suol i mɔnŋ, kii mɔk dindɑnn nɑn bɑlmɔni, ɑ i tɑn sɑɑ lɑ ninbɑtinu nɑ yuo nbɑ k Yiesu Klistu tɑn sɑɑ nyi pɑɑnu nɑ.

¹⁴Ii tie mɑn nɑn wɑɑs nbɑ sɑɑk b bɑɑ mɔb nɑ, k dɑɑ wɑɑ lonbiit nbɑ k i din wɑɑ yuo nbɑ k i din k mi Yiesu Klistu nɑ.

¹⁵Yennu nbɑ yiin’i nɑ tie *Ŋɑnɔ e, l pɑɑk, ii mun i tie niŋɑnm mɑn,

¹⁶k mɑɑn l diɑn Yennu lolkpel kɑdɑɑɔk ni ɑ: «Ii tie niŋɑnm mɑn, k mɑɑn n tie Ŋɑnɔ e.»

¹⁷L i tie k i mei Yennu, i yi’u Bɑɑ e, k ŋuɑ e bu niib kul buut nɑn bɑɑ tun biɑnŋ nbɑ nɑ, k ningɑnni kɑɑ. L pɑɑk, yɑɑ be tingbounŋ nɑ ni, ii tiin’ɔ mɑn yuo kul.

¹⁸K mɑɑn i mi nɑn Yennu nbɑ nyinn’i binbenbiiuk nbɑ kɑɑ nyuɑt nbɑ k i din gɑɑl i yejɑnm buol nɑ, u k jii bont nbɑ sɑɑ biil nɑn sɑlmɑ kuo likli nɑ kɑɑ k pɑ,

¹⁹ŋɑɑn u din jii Klistu sɔn nbɑ ŋɑn nɑ e k dɑɑ’i, Yiesu nbɑ tie nɑn mɑnnu pebik nbɑ k mɔk dɑnŋ k biɑ k mɔk jɑknt nɑ.

²⁰Yennu nbɑ dɑɑ din k nɑn *dulnyɑ yuo nbɑ nɑ, ŋɑɑn k u ponŋ din lukt Klistu, k tɑn nyinn’ɔ pɑɑnu dɑɑjuonti ni k tul’i.

²¹Klistu ni e k i tien Yennu yɑdɑ, k Yennu tie wun nbɑ din fiin’ɔ kuun ni k tul’ɔ yudɑnt. L pɑɑk, k i yɑdɑ nɑn i dindɑnn be Yennu ni.

²²Mɔtɑɑnɑ yɑɑ sɑɑk bɑlmɔni lɑbɑɑl k i ji nyii biit sɔnu ni, ɑ yin fit kii luon i nɑɑ wɑɑs nɑn bɑlmɔni nɑ, ii luon i lieb mɑn nɑn i pɑlɑ kul ɑ.

²³I lɑ mɑnfopɑɑnn ɑ, k l mɑnfuol k nyii bonbuolk nbɑ kpenn ni kɑɑ, ŋɑɑn l nyii bonbuolk nbɑ k kpenn nɑ buol e. Yennu mɑɑn nbɑ tien’t mɑnfuol k sii be mɔkmɔk nɑn yuo nbɑ kɑɑ gbennu nɑ e, tul’i mɑnfopɑɑnn mɑnŋ.

²⁴L diɑn Yennu lolkpel kɑdɑɑɔk ni ɑ: «Nisɑɑli kul tie nɑn muɑt nɑ e, k b fɑnt tie nɑn tipuuk nɑ. Muɑt juɑkt k l puut suul bɑɑ,

²⁵ŋɑɑn Yonmdɑɑnɔ mɑɑn nɑ ŋɑnin kɑɑ gbennu.» Mɑɑn mɑnŋ e tie lɑbɑmɑnn nbɑ k b din muɑntl k tien’i nɑ.