Read Moba 1 Piɑl 2 Bible Online

1 Piɑl 2 - Moba bible

1 Piɑl 2

¹L pɑɑk, i nyik bonbiil kul tumu mɑn, nɑn fɑɑk kul, nɑn kpinkpɑnni, nɑn *funfunn, nɑn sɑnjɑɑɔnŋ.

²Ii tie nɑn sɑnpɑnti nɑ mɑn, kii tun kii luon mɑnfuol biin nbɑ be Foŋɑnm buol ni nɑ, k l i tie k i nyu’l yii kpɑɑtl k tɑn lɑ fielu.

³Tɔn, l diɑn Yennu lolkpel kɑdɑɑɔk ni ɑ: «I mi bɑnnu nbɑ k Yonmdɑɑnɔ ŋɑn.»

⁴Bɑɑt Yonmdɑɑnɔ buol ni mɑn. Ŋuɑ e tie tɑnn nbɑ fo, wun nbɑ k niib yet, ɑ u k mɔk nyuɑt, ŋɑɑn k Yennu lukt’ɔ k yet, ɑ u ŋɑn k tul’ɔ nɑ.

⁵Ii mun i tie nɑn tɑnɑ nbɑ fo k bin jii’i k mɑɑ Foŋɑnm ŋɑɑk. K yii tie Yennu tiɑɔnŋ mɑnntieb, kii mɑnn *mɑlunŋ nɑn Foŋɑnm nbɑ luon bɑnnu nbɑ, k Yiesu *Klistu pɑɑk, Yennu sɑɑ gɑɑl i mɑlunŋ ɑ.

⁶K mɑɑn l diɑn Yennu lolkpel kɑdɑɑɔk ni, ɑ u yet ɑ: «Gotl, n lukt tɑnn k bil *Siiɔn duo ni, k l tie tɑnn nbɑ tien fiɑkl pɑnŋ, k l biɑ ŋɑn bonciɑnn, k wun nbɑ kul tien’ɔ yɑdɑ nɑ, u kɑn di fei.»

⁷Tɑnn mɑnŋ mɔk nyuɑt bonciɑnn k tul yinm nbɑ tien’ɔ yɑdɑ nɑ, ŋɑɑn l k tie nnɑ kɑɑ k tul bin nbɑ k tien’ɔ yɑdɑ nɑ. «Tɑnn nbɑ k tɑnmɑɑlɑ yet’ɔ nɑ, ŋɑnn e set tie tɑnn nbɑ tien fiɑkl pɑnŋ.»

⁸L biɑ diɑn ɑ: «Tɑnn mɑnŋ e k niib gbiɑtl, tɑnpiiuk mɑnŋ e lubn niib.» Bɑɑ k sɑk Yennu mɑɑn pɑɑk e k b gbiɑtl nɑn wɑɑ din senn’b biɑnŋ nbɑ nɑ.

⁹Ŋɑɑn yinm ŋɑnin tie nigɑnnkɑb e, k biɑ tie mɑnntieb nbɑ tuun k tien kpɑnbɑl, k biɑ tie nibuolu nbɑ tie Yennu yɑb, k biɑ tie u tiɑɔnŋ niib, ɑ yii muɑntl u bulcint po, ŋuɑ nbɑ nyinn’i bunbɔnn ni, k bɑɑl nɑn’i u bɑktnɔunŋ yentu ni.

¹⁰Siɑn-yuo i din k tie niib, ŋɑɑn mɔtɑɑnɑ i tie Yennu niib e. Siɑn-yuo u din k tin’i ninbɑɑɔk, ŋɑɑn mɔtɑɑnɑ u tin’i ninbɑɑɔk ɑ.

¹¹N yuɑsnbɑ, yɑɑ tie sɑɑnm k biɑ tie kunsɑnnɑ tingbounŋ nɑ ni nɑ, n kpɑɑn’i e ɑ yi nyik gbɑnɑnt lonbiit nbɑ kɔn nɑn i sei nɑ,

¹²ŋɑɑn kii be bɑnnu nbɑ k tingbounŋ niib i lek i tɑɑl’i e, ŋɑɑn b sɑɑ lɑ i tuonŋɑnɑ k dont Yennu sɑnn, dɑɑl nbɑ k u tɑn sɑɑ bɑɑl nɑ.

¹³Yonmdɑɑnɔ pɑɑk, ii sɑɑk mɑn yiikuo-dɑnm mɔi kii sɑɑk kpɑnbɑl nbɑ mɔk yiikuo kul mɔb,

¹⁴nɑn *senni dɑnm nbɑ k u tun’m, ɑ bin dɑt bin nbɑ tuun bonbiil nɑ tubɑ, ŋɑɑn kii pɑk bin nbɑ tuun bonŋɑnn nɑ.

¹⁵K mɑɑn lin nbɑ k Yennu luon tie, ɑ i tuonŋɑnɑ n guɑl jɑtt mɑɑn nbɑ k mɔk nyuɑt nɑ e.

¹⁶Ii be nɑn yent-n-mɔnŋ dɑnm nɑ mɑn, ŋɑɑn i dɑɑ diɑ i yent-n-mɔnŋ binbenŋ mɑnŋ k l tien’i yɑɑk nbɑ k i sii tuun bonbiil. Ii mɔk mɑn Yennu tuontunnɑ binbenŋ mɑn.

¹⁷Ii tien suɑ kul nibɑɑkl, kii luon bin nbɑ tie i nɑɑ wɑɑs Klistu ni nɑ, kii tiin Yennu, kii tien kpɑnbɑl nbɑ mɔk yiikuo kul nɑ nibɑɑkl.

¹⁸Yinm nbɑ tie dɑɑbɑ, ii sɑɑk i yudɑnm mɔi ŋɑɑn biɑ kii tien’m nibɑɑkl, k l k tie bin nbɑ tuun bonŋɑnɑ k biɑ mɔk bulcint nɑ kuukuɑ kɑɑ, ŋɑɑn i mun biɑ sii tuun nnɑ e kii tien tondɑnm.

¹⁹L i tie k ɑ tuun bonŋɑnn ŋɑɑn k b biɑ dint’ɑ fɑlɑ, k ɑ lɑ fɑlɑ mɑnŋ nɑn suklu fɑɑ duki Yennu po nɑ, l wɑnn nɑn ɑ tuun l nbɑ ŋɑn e nɑ.

²⁰Ŋɑɑn fi i tun biit k b dɑt ɑ tubl, k ɑ gɑɑl tubdɑtu nɑ suon nnɑ, nlee k b sɑɑ pɑk’ɑ ni? Ŋɑɑn fi i tuun bonŋɑnn, ŋɑɑn di fɑlɑ l pɑɑk suon nnɑ, l tie bonŋɑnn e Yennu tuɑnn.

²¹Ŋɑnn e tie binbenŋ nbɑ k Yennu din yiin’i, ɑ yii be lenŋ, k mɑɑn Klistu tiɑɔnŋ din dii fɑlɑ i pɑɑk, ɑ yii goli u binbenŋ kii wɑɑ u tɑɑ.

²²U k tun biit. Suɑ biɑ k mi gbɑt k fɑɑk nyii u mɔb ni.

²³Bɑɑ din suki’ɔ nɑ, u din k sukl jiin. Wɑɑ biɑ din be fɑlɑ ni, u k jiin suɑ, ŋɑɑn din jii u mɔnŋ k tien Yennu nbɑ bu niib buut fɑnu nɑ nuu ni.

²⁴Ŋuɑ Klistu mɔnŋ mɔnŋ e din jii t biit u gbɑnɑnt ni, k b kpɑɑ’u dɑpunpunn pɑɑk, ɑ t dɑɑ tie biit tuontunnɑ ŋɑɑn kii be Yennu nbɑ luon bɑnnu nbɑ. U dɑni pɑɑk e k i lɑ lɑɑfiɑ.

²⁵I din tuu tie nɑn pebotkɑi nɑ e, ŋɑɑn mɔtɑɑnɑ i jen i kpɑɑltuɑ nbɑ guu i sei nɑ buol ɑ.