Read Moba 1 Piɑl 4 Bible Online

1 Piɑl 4 - Moba bible

1 Piɑl 4

¹L pɑɑk, *Klistu nbɑ din dii fɑlɑ u gbɑnɑnt ni nɑ, ii mun ii mɔk l dudukt, k mɑɑn wun nbɑ di fɑlɑ u gbɑnɑnt ni ji k duki wɑɑ sɑɑ tun biit bɑnnu nbɑ.

²L pɑɑk, lɑɑ jii mɔtɑɑnɑ k ji sɑɑ, l ŋɑn k i jii yuo nbɑ tenn tingbounŋ ni kii tuun Yennu nbɑ luon lin nbɑ, ŋɑɑn nyik nisɑɑlk lonbiit.

³Yuo nbɑ gɑl, i din jii i yuo k tuun lin nbɑ k bin nbɑ k tie Klistuweilɑ luon bii tuun nɑ. I din tuun boncuncontuonɑ, k mɔk lonbiit, k nyu dɑɑn k yib, k mɔk jedicɑɑɔnŋ nɑn dɑnyucɑɑɔnŋ, k mɑnn pɑtɑ bonciɑnn.

⁴Ŋɑɑn mɔtɑɑnɑ, yɑɑ ji k wɑɑ bin nbɑ k tie Klistuweilɑ k k tuun l bonbiil nɑ, l bɑkt’b e, k b ji suki’i.

⁵Ŋɑɑn b sɑɑ nyinn b tuonɑ pɑɑnu ni k tul Yennu nbɑ tien siil k sɑɑ bu fuotb nɑn kpienm buut nɑ.

⁶Ŋɑnn e te k b din muɑnt lɑbɑmɑnn k tul bin nbɑ kpo nɑ. K b bu b buut suɑ kul nɑn wɑɑ tun lin nbɑ, nɑn nisɑɑli kul nɑ. Ŋɑɑn mɔtɑɑnɑ k Foŋɑnm te k b sei fit k be nɑn Yennu nbɑ luon k bii be bɑnnu nbɑ nɑ.

⁷Bont kul ɑ gbennu ji k fɔk. L pɑɑk, i suol i mɔnŋ kii sub k fit kii mei Yennu.

⁸Lin nbɑ gɑl bont kul tie, ɑ ii luon i lieb mɑn fɑnu, k mɑɑn lonm dɔknt biit bonciɑnn.

⁹Ii gɑɑn lieb sɑɑɔnŋ mɑn k dɑɑ buln.

¹⁰Yennu tul u niib piini buolu buolu, k suɑ kul n jii piini nbɑ k u lɑ Yennu buol nɑ, kii diɑ’l fɑnu kii tuun nɑn’n kii sonmt lieb.

¹¹Wun nbɑ yɑɑ piini tie wuu muɑntl lɑbɑmɑnn nɑ, wuu muɑntl lin nbɑ k Yennu tien’ɔ nɑ e, k wun nbɑ yɑɑ piini tie wuu sonmt niib, wuu sonmt’b nɑn u pɑnŋ kul nbɑ k Yennu tien’ɔ nɑ, ɑ Yennu n lɑ pɑku bonsiɑl kul ni Yiesu Klistu pɑɑk. Ŋuɑ Yiesu yen pɑku nɑn pɑnŋ kul yuo nbɑ kɑɑ gbennu. * Amenn.

¹²N yuɑsnbɑ, yɑɑ di fɑlgbenŋɑ nbɑ biki’i nɑ, i dɑɑ te k l bɑktl’i k l tie nɑn bonsɑɑnn nɑ i buol.

¹³Yɑɑ di fɑlɑ nɑn Klistu nbɑ din dii fɑlɑ bɑnnu nbɑ nɑ, ii mɔk pɑlpienn mɑn, k yuo nbɑ k u *yudɑnt tɑn sɑɑ nyi pɑɑnu nɑ, i tɑn sɑɑ lɑ pɑlpienn nbɑ kɑɑ pɑɑk.

¹⁴B i suki’i Klistu sɑnn pɑɑk, pɑlpienn tie i yɑl e, k mɑɑn Foŋɑnm nbɑ mɔk pɑnŋ bonciɑnn k biɑ tie Yennu Siek nɑ be i pɑɑk.

¹⁵Ŋɑɑn suɑ fɑldinu i be nikpinu ɑmi nɑn-yuk ɑmi biit tumu ɑmi kpikpiluk tuonɑ pɑɑk, l k ŋɑn.

¹⁶Ŋɑɑn fi i di fɑlɑ fɑɑ tie Klistuyuɑ nɑ pɑɑk, ɑ dɑɑ tiin fei, ŋɑɑn dont Yennu, bɑɑ pul’ɑ Klistu sɑnn nɑ pɑɑk.

¹⁷Yuo bɑɑl ɑ k Yennu sɑɑ piin k bu niib buut, k u sɑɑ bu u tiɑɔnŋ niib buut e sinsinn, k l i tie k u bu tinm nbɑ tie u niib nɑ buut sinsinn nɑ, bin nbɑ k sɑk u lɑbɑmɑnn nɑ sɑɑ juont nlee?

¹⁸L diɑn Yennu lolkpel kɑdɑɑɔk ni ɑ: «L i pɑɑl k niŋɑnm n lɑ fielu, k biitdɑnm nɑn bin nbɑ k tiin Yennu ji sɑɑ tien nlee k lɑ fielu?»

¹⁹L pɑɑk, bin nbɑ di fɑlɑ Yennu nbɑ luon lin nbɑ nɑ pɑɑk nɑ, bii tuun tuonŋɑnɑ, k jii b mɔnŋ k pet tul b nɑntuɑ Yennu nbɑ tie bɑlmɔni dɑɑnɔ nɑ.