Read Moba 2 Piɑl 2 Bible Online

2 Piɑl 2 - Moba bible

2 Piɑl 2

¹Ŋɑɑn fɑɑk sɔkniinbɑ din be *Suifnbɑ sinsuuk ni siɑn-yuo k fɑɑk wɑntieb mun biɑ sii be i sinsuuk ni. B sɑɑ lon wuol ni sɔnu k fit bɑɑl nɑn fɑɑk wɑnnu nbɑ sɑɑ buon’i. B set sɑɑ yet wɑntuɑ Yiesu, wun nbɑ din fiel’b nɑ, k b sɑɑ te k Yennu n biil’b yiɑn ɑ.

²Niib bonciɑnn sɑɑ wei b binbenŋ nbɑ mɔk fei nɑ. B pɑɑk k niib sɑɑ tien mɔniɑɔk nɑn bɑlmɔni sɔnu nɑ.

³B sii mɔk niɑnciɑɔnŋ, k sii kpɑnn’i k ŋmɑb’i nɑn lɑbɑɑl nbɑ nyi b tiɑɔnŋ dudukt ni nɑ. L pɑɑk, l ponŋ wei wɑɑ, k b Bɑlbuulɔ tien siil, ɑ wun bu b buut k l ji kɑn wei k b biilu sɑɑ bɑɑl.

⁴K mɑɑn Yennu din k nyik mɑlɑkɑɑnbɑ nbɑ din tun biit nɑ tubdɑtu. Ŋɑɑn u din lol’b jɑlt k lu’b buotuk nbɑ sumi bonciɑnn k biɑ mɔk muu nbɑ kɑn mi kpien nɑ ni, k b sii be l ni mɔkmɔk nɑn dɑɑl nbɑ k u tɑn sɑɑ bu b buut.

⁵Nnɑ e biɑk, u din k nyik yɑɑyuo ni *dulnyɑ niib nɑ. Ŋɑɑn u din te k nyungbiebiiuk[1] o dii dulnyɑ mɑnŋ, k kpii bin nbɑ kul k tiin’ɔ nɑ. U din fiel Noe, wun nbɑ din muɑntl Yenweiu po, k din fiel u ŋɑɑtieb bɑnlole k pukn u pɑɑk.

⁶Ŋuɑ Yennu biɑ din biil doi nbɑ yi Suodonm nɑn Guomuɔl, k te k b dii muu k kɑb kpɑnt tɑnpent. Lin nbɑ nɑ e tie *siɑlɑ k wɑnt biitdɑnm wɑɑ tɑn sɑɑ dɑt b tubɑ biɑnŋ nbɑ.

⁷U biɑ din tɑn fiel Lɔt, wun nbɑ din tie niŋɑnɔ nɑ. Biit dɑnm nbɑ din tuun b gbɑnɑnt lonbiit biɑnŋ nbɑ nɑ, l din biil ŋuɑ Lɔt pɑl ni bonciɑnn.

⁸Lɔt, jɑŋɑnɔ mɑnŋ, din be b duo ni e, k lɑɑt b biit, k gbiɑ bɑɑ piɑk b mɔbonbiit biɑnŋ nbɑ dɑɑ kul, k l din dɑmi’ɔ u pɑl ni bonciɑnn, k mɑɑn u din tie niŋɑnɔ e.

⁹Ŋɑnn e k Yonmdɑɑnɔ Yennu mi biɑnŋ nbɑ k u sɑɑ fɑt niib nbɑ tiin’ɔ, k nyinn’b muksuk ni, ŋɑɑn dɑt biitdɑnm tubɑ mɔkmɔk nɑn dɑɑl nbɑ k u tɑn sɑɑ bu b buut nɑ.

¹⁰Bin nbɑ wɑɑ lonbiiuk nbɑ nyii b binbenbiiuk nɑ ni nɑ, k siɑn Yennu yiikuo nɑ, Yennu set sɑɑ dɑt b tubɑ. Fɑɑk wɑntieb nbɑ k n ponŋ piɑk b po nɑ, tie tubkɑngbɑtɑ dɑnm e, k b k tiin suɑ. B k cɔln bin nbɑ be *Yendɔunŋ ni k mɔk *yudɑnt nɑ, ŋɑɑn b suki’b e.

¹¹Mɑlɑkɑɑnbɑ set mɔk pɑnŋ k gɑl fɑɑk wɑntieb mɑnŋ, ŋɑɑn b k tɑɑl bin nbɑ be Yendɔunŋ ni, k biɑ k suki’b Yonmdɑɑnɔ tuɑnn.

¹²Ŋɑɑn jɑb nɑ k mɔk dudukt; b nɑɑn nɑn muuk ni bonkob-biit nbɑ be, k niib tɑn sɑɑ suol’b k kpi’b nɑ e. B tuu suki lin nbɑ k b k gbiɑ l pɑɑk e. B tɑn sɑɑ kpi’b nɑn bɑɑ tuu kpi muuk ni bonkob-biit bɑnnu nbɑ nɑ e.

¹³Bɑɑ tuu te k niib n lɑ fɑlɑ nɑ, b nyuɑt mun sii tie fɑlɑ e. Lin nbɑ pent b pɑlɑ ni tie bii tuun b gbɑnɑnt lonbiit yennu ni. Bɑɑ tuu be i sinsuuk ni nɑ, l mɔk fei k biɑ tie bonbiil, k mɑɑn bɑɑ di jiet nɑn’i nɑ, b tuu wɑnt b mɔnŋ b biit pɑɑk.

¹⁴B goli puob e k duki * boncuncontuonn po kuukuɑ. B k fit tuun biit k l jɑnŋt’b, k dɑɑk bin nbɑ k b yɑdɑ k mɔk pɑnŋ nɑ. Yuo kul b luon nyuɑt e. Setk nɑn mɔni, Yennu mɔpol be b pɑɑk.

¹⁵B nyik sɔnu nbɑ tuok, ŋɑɑn bot ɑ. B wɑɑ Buosol bijɑ Bɑɑlɑɑnm[2] nbɑ din wɑɑ sɔnu nbɑ nɑ e. U din luon biit nyuɑt e,

¹⁶ŋɑɑn Yennu din kpil’ɔ u mɔyetu nɑ pɑɑk. U bonŋ set din pɑk nɑn’ɔ nɑn nisɑɑlk kunkɔl k kpil’ɔ k te k sɔkni nɑ nyik u jɑti tuonn mɑnŋ.

¹⁷Niib mɑnŋ buolu tie nɑn bunbunn nbɑ kɑɑ nyun nɑ e, k b tie nɑn sɑyunŋ nbɑ k wounŋ tuu gɑɑn’ɔ nɑ e. Yennu tɑn sɑɑ jii’b k lu’b bunbɔnciɑɔnŋ ni.

¹⁸B piɑk kɑlnbɑɑni mɑɑn nbɑ k mɔk nyuɑt e, k tuun nɑn b tiɑɔnŋ lonbiiuk k pii bɑlt ɑ bin suol bin nbɑ fɑt b mɔnŋ niib nbɑ tuun biit nɑ buol ni k l dɑɑ k wei nɑ.

¹⁹B tuu senn mɔsonn k yet, ɑ b sii mɔk yent-n-mɔnŋ, ŋɑɑn b mɔnŋ tie b gbɑnɑnt lonm nbɑ biil’b nɑ dɑɑbɑ e k be sɔnu nbɑ sɑɑ juont nɑn kuun nɑ ni. Suɑ kul tie lin nbɑ yen’ɔ nɑ dɑɑbl.

²⁰Bin nbɑ din fit fɑt b mɔnŋ tingbounŋ nɑ biit nɑ ni, k mɑɑn b din bɑnn t Yonmdɑɑnɔ Yiesu *Klistu nbɑ tie t Fietuɑ nɑ e, l biit i ŋɑnm suol’b k nyɑnn’b, b juontu tɑn sii bi k gɑl b pinpiik nbɑ din tie biɑnŋ nbɑ nɑ wɑɑ.

²¹B i bo i kii mi binbenŋ nbɑ gbuot Yennu nunm, l bo sii sɔ nɑn bɑɑ bɑnn’l ŋɑɑn ji k sɑk Yennu sennu nbɑ k b din gbɑt nɑ.

²²Bɑɑ tuun lin nbɑ nɑ wɑnt nɑn bɑljokt tie mɔni e ɑ: «Bɔk e tuu ŋmɑt k di u mɔnŋ siit,» k: «Duolk i wul nyun ŋɑɑn u tuu ŋmɑt k gbɑl u mɔnŋ nɑn bɑkl e.»