Read Moba 1 Sɑn 4 Bible Online

1 Sɑn 4 - Moba bible

1 Sɑn 4

¹N yuɑsnbɑ, i dɑɑ tie nisiɑb kul nbɑ yɑɑ ɑ b mɔk Foŋɑnm nɑ mɑɑn yɑdɑ, ŋɑɑn biknt’b mɑn, k got lɑɑn sei mɑnŋ nyii Yennu buol ni ɑmi siɑl buol e? K mɑɑn fɑɑk sɔkniinbɑ yɑt gbie tingbounŋ nɑ wɑɑ.

²Gotl mɑn bɑnnu nbɑ k i sɑɑ fit bɑnn nɑn nilɔ mɔk Foŋɑnm. Wun nbɑ kul yet, ɑ Yiesu Klistu din kpɑnt nisɑɑlk e, ŋuɑ e mɔk Siek nbɑ nyii Yennu penŋ.

³Ŋɑɑn wun nbɑ kul yet ɑ lin nbɑ nɑ k tie mɔni k jiin Yiesu po nɑ, k mɔk Siek nbɑ nyii Yennu penŋ. L dɑɑnɔ siek tie *Klistu Dɑtɑɑk yɑl e. I ponŋ din gbɑt nɑn Klistu Dɑtɑɑk bɑɑt, k mɔtɑɑnɑ u ponŋ set be tingbounŋ nɑ ni.

⁴N wɑɑs, yinm tie Yennu yɑb e. I kɔn k nyɑnn fɑɑk sɔkniinbɑ wɑɑ. K mɑɑn siek nbɑ be i ni nɑ mɔk pɑnŋ k gɑl siek nbɑ be niib nbɑ tie *dulnyɑ nɑ yɑb ni nɑ.

⁵Fɑɑk sɔkniinbɑ nɑ e tie tingbounŋ nɑ yɑb. L pɑɑk e te k b piɑk tingbounŋ nnɑ mɑɑn, k tingbounŋ nɑ yɑb fiin b po.

⁶Ŋɑɑn tinm ŋɑnin tie Yennu yɑb e, k bin nbɑ mi Yennu, ŋɑnm e fiin t mɑɑn po. Ŋɑɑn bin nbɑ k tie Yennu yɑb, b k fiin t mɑɑn po. Ŋɑnn e te k t bɑnt bɑlmɔni Siek nɑn fɑɑk Siek.

⁷N yuɑsnbɑ, tii luon t lieb mɑn, k mɑɑn lonm nyii Yennu penŋ e, k wun nbɑ mɔk lonm nɑ, tie Yennu bik e k biɑ mi’u.

⁸Wun nbɑ k mɔk lonm u k mi Yennu, k mɑɑn Yennu tie lonm e.

⁹Gotl bɑnnu nbɑ k Yennu wɑnn’t u lonm. U din tun u Bijɑyenml tingbounŋ nɑ ni, ɑ tin lɑ mɑnfuol u pɑɑk.

¹⁰Lonm nbɑ tie lonm nɑn bɑlmɔni tie nnɑ e: l k tie ɑ tinm kɑɑ din luon Yennu, ŋɑɑn ŋuɑ e din luon tinm, k tun u Bijɑ, ɑ u *mɑlunŋ pɑɑk tin lɑ t biit nyikcɑbu.

¹¹N yuɑsnbɑ, Yennu nbɑ luon’t biɑnŋ nbɑ nɑ, l kpɑɑ tɑlɑs k tii mun ii luon t lieb nnɑ.

¹²Suɑ k mi lɑ Yennu, ŋɑɑn t i luon lieb i e, Yennu be t ni, k u lonm tuun t ni nɑn bɑlmɔni.

¹³Gotl bɑnnu nbɑ k t mi nɑn t be Yennu ni k u biɑ be t ni. U din tul’t Foŋɑnm e.

¹⁴K t din lɑ k biɑ muɑntl, ɑ Bɑɑ din tun u Bijɑ, ɑ Bijɑ mɑnŋ ii tie tingbounŋ nɑ ŋɑɑtieb Fietuɑ.

¹⁵L i tie k suɑ yet, ɑ Yiesu tie Yennu Bijɑ, Yennu be u ni, k u mun biɑ be Yennu ni.

¹⁶K t mɔnŋ mɔnŋ mun bɑnn Yennu nbɑ luon’t biɑnŋ nbɑ, k biɑ tien yɑdɑ nɑn u set luon’t. Yennu tie lonm e, k dɑɑnɔ nbɑ be lonm nɑ ni, ŋuɑ e be Yennu ni, k Yennu mun biɑ be u ni.

¹⁷L i tie k lonm be t ni nɑn bɑlmɔni, t sii mɔk pɑlcienn buut dɑɑl, k mɑɑn t binbenŋ dulnyɑ ni tie nɑn Yiesu yɑl nɑ e.

¹⁸T i mɔk lonm, jijiet sii kɑɑ. L i tie k lonm mɑntk be nɑn mɔni mɔni, jijiet kɑn lɑ yɑɑk kii be t ni. L i tie k nilɔ mɔk jijiet, u k mɔk lonm nɑn bɑlmɔni, k mɑɑn tubdɑtu pɑɑk e k t tuu jie.

¹⁹Ŋɑɑn tinm ŋɑnin, t mɔk lonm k mɑɑn Yennu e din sint mɔk lonm nɑn tinm.

²⁰Dɑɑnɔ nbɑ yɑɑ ɑ u luon Yennu, ŋɑɑn biɑ nɑn u nɑɑ bik, u tie fɑɑk dɑɑnɔ e. L i tie k u k luon u nɑɑ bik nbɑ k u lɑɑt’ɔ nɑ, nlee k u sii luon Yennu nbɑ k u k lɑɑt’ɔ nɑ?

²¹Sennu nbɑ k Klistu senn e nɑ: wun nbɑ luon Yennu, sie k u luon u nɑɑ bik.