Read Moba 1 Sɑn 5 Bible Online

1 Sɑn 5 - Moba bible

1 Sɑn 5

¹Wun nbɑ kul tien yɑdɑ nɑn Yiesu tie *Klistu nɑ, l dɑɑnɔ tie Yennu bik e. K dɑɑnɔ nbɑ luon nisuɑ, u biɑ sii luon nilɔ mɑnŋ wɑɑs e.

²L i tie k t luon Yennu k tuun u *senni nbɑ wɑnt bɑnnu nbɑ, ŋɑnn e wɑnt nɑn t luon u wɑɑs,

³k l ii biɑ kii tie k t diɑ u senni, ŋɑnn e wɑnt nɑn t luon’ɔ, k u senni mɑnŋ k pɑɑl,

⁴k mɑɑn Yennu wɑɑs kul sɑɑ fit nyɑnn *dulnyɑ wɑɑ. Tɑɑ tien yɑdɑ nɑ pɑɑk e, k t nyɑnn dulnyɑ.

⁵K ŋmee sɑɑ fit nyɑnn dulnyɑ? Wun nbɑ tien yɑdɑ nɑn Yiesu tie Yennu Bijɑ kuukuɑ.

⁶Ŋuɑ Yiesu Klistu e tie wun nbɑ din bɑɑl nɑn nyun nɑn sɔn. U din k bɑɑl nɑn nyun kuukuɑ kɑɑ, ŋɑɑn u din bɑɑl nɑn sɔn mun biɑk. K Foŋɑnm tie siɑlɑɑdɑɑnɔ, k mɑɑn Foŋɑnm tie bɑlmɔni e.

⁷Tɔn, bonɑ ŋɑntɑ e be k tie *siɑlɑ,

⁸Foŋɑnm nɑn nyun nɑn sɔn, k l bonɑ ŋɑntɑ mɑnŋ kul tɑɑn tie *siɑlɑ mɑnŋ.

⁹T gɑɑn niib *siɑlɑ, ŋɑɑn Yennu siɑlɑ e ŋɑn k cie niib yɑl k mɑɑn l tie siɑlɑ nbɑ k Yennu tien k jiin u Bijɑ mɑnŋ po.

¹⁰Wun nbɑ tien Yennu Bijɑ mɑnŋ yɑdɑ, ŋuɑ e mɔk Yennu siɑlɑ mɑnŋ u pɑl ni, k wun nbɑ k tien u siɑlɑ mɑnŋ yɑdɑ, u tien’ɔ fɑɑk dɑɑnɔ e nɑ, k mɑɑn u k tien yɑdɑ nɑn siɑlɑ nbɑ k Yennu tien u Bijɑ po nɑ tie mɔni.

¹¹Yennu siɑlɑ mɑnŋ tie nnɑ e, u tul’t mɑnfuol nbɑ kɑɑ gbennu, k mɑnfuol mɑnŋ nyi u Bijɑ Yiesu ni e.

¹²Wun nbɑ mɔk Yennu Bijɑ nɑ, ŋuɑ e mun mɔk mɑnfuol mɑnŋ, ŋɑɑn wun nbɑ k mɔk Yennu Bijɑ mɑnŋ, u k mɔk l mɑnfuol.

¹³N dɑ kɑdɑɑɔk nɑ k tien yinm nbɑ tien Yennu Bijɑ sɑnn yɑdɑ, k mɑɑn n luon k i bɑnn nɑn i mɔk mɑnfuol nbɑ kɑɑ gbennu.

¹⁴Gotl lin nbɑ te k t mɔk pɑlcienn Yennu tuɑnn. T mi nɑn t i miɑl’ɔ lin nbɑ tɑɑ nɑn wɑɑ luon lin nbɑ nɑ po, u gɑɑn t miɑlu.

¹⁵K t i mi nɑn u gɑɑn t miɑlu, tɑɑ miɑl’ɔ lin nbɑ kul po nɑ, t mi nɑn t ponŋ gɑɑl lin nbɑ k t mei’ɔ l po nɑ wɑɑ.

¹⁶Suɑ i lɑɑt u nɑɑ bik k u tuun biit nbɑ kɑn bɑɑl nɑn kuun, l dɑɑnɔ ii mei Yennu u pɑɑk, k Yennu sɑɑ tul biitdɑɑnɔ mɑnŋ mɑnfuol. Nɑ tie mɔni k tul bin nbɑ yɑɑ biit k bɑɑt nɑn kuun. Ŋɑɑn bisiɑt be, k bɑɑt nɑn kuun, k n k yɑɑ yii mei Yennu kii tien bin nbɑ tuun l biit buolu kɑɑ.

¹⁷Tuonɑ kul nbɑ k ŋɑn lek tie biit e, ŋɑɑn bisiɑt be k kɑn bɑɑl nɑn kuun.

¹⁸T mi nɑn bin nbɑ tie Yennu wɑɑs ji k tuun biit, k mɑɑn Yennu Bijɑ Yiesu guu’b, k Klistu dɑtɑɑk kɑn tien’m siɑl.

¹⁹K t mi nɑn tinm tie Yennu yɑb e, k tingbounŋ nɑ ŋɑɑtieb kul nɑ be Klistu dɑtɑɑk yiikuo ni.

²⁰T mi nɑn Yennu Bijɑ din bɑɑl tingbounŋ nɑ ni, k tɑn tul’t yɑn, ɑ tii bɑnt bɑlmɔni Yennu. T be u ni u Bijɑ Yiesu Klistu nɑ pɑɑk e, k ŋuɑ e tie bɑlmɔni Yennu k biɑ tie mɑnfuol nbɑ kɑɑ gbennu.

²¹N wɑɑs, I dɑɑ mɑnn pɑtɑ.