Read Moba 3 Sɑn 1 Bible Online

3 Sɑn 1 - Moba bible

3 Sɑn 1

¹Min nbɑ tie jɑɑnti sɑɑkuɑ nɑ e, dɑ kɑdɑɑɔk nɑ k tien n yuɑk Gɑius nbɑ k n luon’ɔ bonciɑnn nɑ.

²N yɔmɔnŋ, n bo luon nɑn fii be lɑɑfiɑ ni, k ɑ bonɑ kul i ŋɑn nɑn lɑɑ ŋɑn bɑnnu nbɑ fin nɑn Yennu sinsuuk ni nɑ.

³N dɑɑn lɑ pɑlpienn bonciɑnn nɑn t nɑɑ wɑsiɑt nbɑ dɑɑn bɑɑl nnɑ, k tɑn yet’n fɑɑ wɑɑ bɑlmɔni fɑnu biɑnŋ nbɑ nɑ, nɑn fɑɑ tuu wɑɑ’l fɑnu nɑ.

⁴Siɑl k penn n pɑl ni k mɑntk bɑɑl mɑɑ gbɑt ɑ n wɑɑs wɑɑ bɑlmɔni nɑ.

⁵N yuɑk, fɑɑ sonmt t nɑɑ wɑɑs nbɑ tie sɑɑnm biɑnŋ nbɑ nɑ, ɑ tuun lin nbɑ k bɑlmɔni sɔnu wɑnt’ɑ.

⁶B dɑɑn pɑk ɑ bulcint mɑnŋ po *Klistu mɔtɑɑɔk niib sinsuuk ni. N bɑln’mɑ e, fii sonmt’b kii ŋɑnmt b sɔnu bɑnnu nbɑ sɑɑ penn Yennu pɑl.

⁷Setk nɑn mɔni, b dɑɑn sɑɑn sɔnu Yonmdɑɑnɔ sɑnn pɑɑk k k gɑɑl sonmsiɑl bin nbɑ k tie Klistuweilɑ nɑ buol ni.

⁸L pɑɑk, l kpɑɑ tɑlɑs e k tinm Klistuweilɑ ii gɑɑn l nibuolu sɑɑɔnŋ. Nnɑ e k t nuu sii be tuonn nbɑ k b tuun k tien bɑlmɔni muɑntu nɑ ni.

⁹N ponŋ mi diɑn bɑlsɑi nnɑ k tul Klistu mɔtɑɑɔk niib nbɑ be ɑ buol ni nɑ, ŋɑɑn k Diotlef nbɑ luon wun pul u mɔnŋ nijɑɑnn nɑ yien n mɔb.

¹⁰L pɑɑk, mi i tɑnŋ i bɑɑl, n sɑɑ fiit lin nbɑ kul k u tun, nɑn bonbisiɑl nɑn fɑɑk nbɑ k u pɑk k jiin t po nɑ. Ŋɑɑn biit mɑnŋ nbɑ k u tun nɑ, l lek k jɑnŋ’ɔ. U biɑ tuu yet wun gɑɑl t nɑɑ wɑɑs nbɑ tuu tɑn bɑɑl u buol ni, k biɑ k luon k u lieb ii gɑɑn’m, k tuu bel nyinn bin nbɑ gɑɑl sɑɑnm mɑnŋ sɑɑɔnŋ nɑ Klistu mɔtɑɑɔk niib sinsuuk ni.

¹¹N yuɑk, dɑɑ toki suɑ biit, ŋɑɑn kii tuun lin nbɑ ŋɑn. Wun nbɑ tuun bonŋɑnn, u tie Yennu yuɑ e, ŋɑɑn wun nbɑ tuun biit, u k mi Yennu.

¹²Suɑ kul piɑk Demetlius, k u benu nɑ e biɑ wɑnt nɑn u wɑɑ bɑlmɔni, k t mɔnŋ mun piɑk’ɔ, k ɑ mun mi nɑn t set tie bɑlmɔni dɑnm e.

¹³N biɑ mɔk mɑɑn bonciɑnn k luon k n pɑk k tul’ɑ, ŋɑɑn n k luon k n diɑn kɑdɑɑɔk ni kɑɑ k tul’ɑ ni.

¹⁴Ŋɑɑn n mɔk dindɑnn nɑn l kɑn wei k n tɑn sɑɑ bɑɑl k lɑ’ɑ, k tin tɑn pɑk nɑn lieb mɔi ni.

¹⁵Mɑnu ii be ɑ pɑɑk. T yuɑsnbɑ fuont’ɑ. T yuɑsnbɑ nbɑ mun biɑ be ɑ buol ni nɑ, ɑ fuont b suɑ kul.