Read Moba Suud 1 Bible Online

Suud 1 - Moba bible

Suud 1

¹Min Suud wun nbɑ tie Yiesu *Klistu tuontunnɔ, k biɑ tie Sɑɑk ninjɑ nɑ e dɑ kɑdɑɑɔk nɑ k tien niib nbɑ k Bɑɑ Yennu yiin’m k luon’m, k Yiesu Klistu guu’b nɑ.

²Yennu n tin’i ninbɑɑɔk k tul’i mɑnu nɑn lonm bonciɑnn.

³N yuɑsnbɑ, n ninbinn dɑɑn mɔn nɑn k n diɑn kɑdɑɑɔk k tul’i k sɑɑn gɑɑn fielu nbɑ tie t kul yɑl nɑ po. Ŋɑɑn mɔtɑɑnɑ l ji kpɑɑ tɑlɑs k n diɑn k cie i pɑlɑ. I yɑbl i mɔnŋ kii diɑ yɑdɑ nbɑ k Yennu din tul u niib kul tɑɑl yonm kuɑ nɑ.

⁴K mɑɑn nibiit din kuɑ i sinsuuk ni wuol ni e, k lebtl Yennu ninkpɑbɑɔnŋ lɑbɑɑl, ɑ bin bɔl b gbɑnɑnt lonbiiuk tuonɑ nɑ. B yet bin wei Yiesu Klistu, wun nbɑ kuukuɑ tie t yudɑɑnɔ nɑn Yonmdɑɑnɔ nɑ. L wei wɑɑ, k b tubdɑtu ponŋ diɑn Yennu lolkpel kɑdɑɑɔk ni.

⁵Mɑɑ yɑɑ n yet’i lin nbɑ nɑ, i ponŋ gbɑt l kul ɑ, k mi’l fɑnu, ŋɑɑn n luon k n tiɑl’i l po e. Yonmdɑɑnɔ din fɑt u niib k nyinn’b dɑɑbs ni Ejipt tinŋ ni, ŋɑɑn l puolpo u din kpii bin nbɑ din k tien’ɔ yɑdɑ nɑ wɑɑ.

⁶Ii tiɑn mɑlɑkɑɑnbɑ nbɑ din k diɑ yiikuo nbɑ k Yennu din tul’b nɑn l sɔnu, k biɑ din yɑɑt k nyik b binbebuol nɑ po. Yennu bɑɑn’m bɑnt nbɑ sii be nɑn yuo nbɑ kɑɑ gbennu nɑ k lu’b sɑlk buotsunsunŋ nbɑ bɔn ni, k guu dɑgbenŋl nbɑ k u sɑɑ bu b buut nɑ.

⁷Ii biɑk kii tiɑn doi nbɑ k b yi Suodonm nɑn Guomuɔl[1] nɑ nɑn digbɑnɑ nbɑ kpiɑ l doi nɑ po mɑn. L doi niib din tuun tuonbiit nnɑ e. B din be yɑnɑ yɑnɑ nnɑ e, k duɑ nɑn lin nbɑ kuɑ[2]. B tubdɑtu tie muu nbɑ di yuo nbɑ kɑɑ gbennu e mɔtɑɑnɑ, ŋɑnm e tie nyinn k tul’i.

⁸L nibuolu mun biɑ be i sinsuuk ni k tuun nɑn l doi ni niib nɑ. B duki fɑɑk bont po e, k wɑɑ b gbɑnɑnt niɑnbiit. B k cɔln Yomdɑɑnɔ yiikuo, k biɑ suki yɑbnt mɑlɑkɑɑnbɑ.

⁹Miisiɑl nbɑ din tie mɑlɑkɑɑnbɑ sɑɑkuɑ nɑ, din k tun nnɑ. Ŋɑɑn u din kɔn nɑn *Sɑɑtɑn e Muois gbɑnɑnt pɑɑk. Ŋɑɑn kɔnn mɑnŋ ni, u din k sukl’ɔ k pɑk k biil’ɔ, ŋɑɑn u din yet ɑ: «Yonmdɑɑnɔ n ŋmɑnn ɑ tubl.»

¹⁰Ŋɑɑn l nibiit ŋɑnin suki lin nbɑ k b k bɑn e. Bɑɑ mi lin nbɑ, nɑn muuk ni bonkobt nbɑ k mɔk dudukt nɑ, sɑɑ nɑn’m biilu e.

¹¹Pɑlbiil be b pɑɑk. K mɑɑn b wei Kɑɑen[3] sɔnu nɑ wɑɑ. Likli pɑɑk e k b k tɔkn sɔnu nbɑ tuok nɑ nɑn Bɑɑlɑɑnm nbɑ din tun biɑnŋ nbɑ nɑ. B biɑ yet Yennu mɔb nɑn Kole nbɑ din tun biɑnŋ nbɑ nɑ e k l biil’b.

¹²Ŋɑnm e jɑkn jiet nbɑ k yinm Klistuweilɑ di nɑ. B bɑkɑ be b ni kuukuɑ e, k b k tiin fei. B tie nɑn sɑnpɑgbɑnt nbɑ k wounŋ gɑɑn’n k l k bɑɑt nɑn sɑɑk nɑ e. B tie nɑn tiini nbɑ k luon luɑnɑ l lonm yuo nɑ e, b kpo e k sɑɑ tɔl, k mɑɑn b jiinɑ kul fikt, k b kuol ɑ.

¹³B tie nɑn mɔkgbenŋl nyunpɑnɑ nbɑ fi k pukl nɑn jɑknt nɑ e. B biɑ tie nɑn ŋmɑɑbilɑ nbɑ tuu ŋɑbl k lin nɑ e, k bunbɔnciɑɔnŋ nbɑ kɑɑ gbennu be k guu’b.

¹⁴Enɔk, wun nbɑ wɑɑ Adɑn yɑɑbuonɑ bɑnlole ni nɑ din sɔkn k yet b po ɑ: «T Yonmdɑɑnɔ nɑn u mɑlɑkŋɑnm tusɑ tusɑ bɑɑt,

¹⁵ɑ wun bu nifosɑɑlk kul buut, k biil bin nbɑ k tiin’ɔ nɑ b biit pɑɑk, nɑn b mɔyetu pɑɑk, nɑn bɑɑ piɑk biil Yennu nɑ pɑɑk.»

¹⁶B tie bunbulmi dɑnm e, k b nunm k mi gbuo. B tuun b mɔnŋ lonbiit nbɑ wɑnt’b bɑnnu nbɑ e, k piɑk nɑn pɑlbifɑɑnt, k koln niib ɑ bin lɑ siɑl.

¹⁷N yuɑsnbɑ, i tiɑn mɑn mɑɑn nbɑ k t Yonmdɑɑnɔ Yiesu Klistu tuomiinbɑ din yet nɑ.

¹⁸B din yet ɑ: «Dɑɑjuonti dɑɑ mɑnŋ ni, niib tɑn sii lɑɑ’i, k wɑɑ b mɔnŋ mɔnŋ gbɑnɑnt lonbiit.»

¹⁹L nibuolu e bɑɑt nɑn bɔktu i sinsuuk ni. B gbɑnɑnt lonm kuukuɑ e diɑ’b, k Foŋɑnm kɑɑ b ni.

²⁰Ŋɑɑn n yuɑsnbɑ, i cie i pɑlɑ mɑn, i yɑdɑ nbɑ nyii Yennu tiɑɔnŋ buol ni nɑ pɑɑk, kii mei Yennu Foŋɑnm yiikuo ni,

²¹kii tie niib nbɑ be Yennu lonm ni, kii guu yuo nbɑ k t Yonmdɑɑnɔ Yiesu Klistu sɑɑ tul’i mɑnfuol nbɑ kɑɑ gbennu, u ninbɑtinu pɑɑk nɑ.

²²I tin bin nbɑ k b dudukt lɑnŋ nɑ ninbɑɑɔk,

²³k suol’b k nyinn’b muu ni. Lieb mun, i tin’m ninbɑɑɔk, k biɑ kii tiin’m jɑŋmɑɑni, ŋɑɑn kii nɑn b biit binbenŋ, kii sɑɑ kii nɑn, nɑn b tiɑt nbɑ mɔk b lonbiit dɔuk nɑ.

²⁴Yennu ii guu’i k i dɑɑ bɑɑ, k bɑɑl nɑn’i u tuɑnn yentsɑɑkɑl ni, k i dɑɑ mɔk biit, ŋɑɑn kii mɔk pɑlpienn bonciɑnn.

²⁵Ŋuɑ nbɑ tie Yen-yenɔ kuɑ k fiel’t t Yonmdɑɑnɔ Yiesu Klistu pɑɑk nɑ, u yen dontl nɑn yɑbnt nɑn yiikuo nɑn *yudɑnt, yuo nbɑ din gɑl nɑ, nɑn mɔtɑɑnɑ, nɑn yuo nbɑ kɑɑ gbennu. * Amenn.