Read Moba Fiitu 1 Bible Online

Fiitu 1 - Moba bible

Fiitu 1

¹Mɑɑn nbɑ k Yiesu *Klistu din fiit nɑ diɑn kɑdɑɑɔk nɑ ni e. Yennu din tul’ɔ mɑɑn mɑnŋ ɑ wun wɑnn u tuontunnɑ lin nbɑ sɑɑ tien l i yɑnn wɑɑn. Klistu din tun u *mɑlɑkɑ u tuontunnɔ Sɑn buol ni, ɑ wun yet’ɔ mɑɑn mɑnŋ kul.

²Sɑn din muɑnt lin nbɑ k u din lɑ nɑ kul k l tie mɑɑn nbɑ nyii Yennu buol ni, nɑn bɑlmɔni nbɑ k Yiesu Klistu din fiit k wɑnn’ɔ nɑ.

³Wun nbɑ lii mɑɑn nbɑ nyii Yennu buol ni, k be kɑdɑɑɔk nɑ ni, pɑlpienn tie u yɑl e, k bin nbɑ gbiɑ mɑɑn mɑnŋ k sɑɑk’l, pɑlpienn tie b yɑl e mun, k mɑɑn yuo pel, ɑ k lin nbɑ sɑɑ tun nɑ n tun.

⁴Min Sɑn, min e dɑ kɑdɑɑɔk nɑ, k tien jiɑnti ŋɑnlole nbɑ be Asii tinŋ ni nɑ. Yennu n tul’i yetŋɑnm k biɑ tul’i mɑnu, ŋuɑ nbɑ be, k din be, k biɑ bɑɑt nɑ. U sei ŋɑnlole nbɑ be u nɑɑngbounŋ tuɑnn nɑ,

⁵nɑn Yiesu Klistu n tul’i l bonɑ. Ŋuɑ Yiesu e tie siɑlɑɑdɑɑnɔ nɑn mɔni. U tie bikpelk e, k biɑ din fiil kpienm sinsuuk ni. U biɑ tie tingbounŋ kpɑnbɑlɑ Kpɑnbɑl e. Yiesu Klistu luon’t k biɑ din nyinn tinm t biit ni nɑn u sɔn.

⁶U din te k t tie Yennu nɑɑn ni niib, k biɑ te k t tie mɑnntieb ɑ tii tuun kii tien u Bɑɑ Yennu. Ŋuɑ Yiesu e yen *yudɑnt nɑn yiikuo yuo kul ɑ. * Amenn.

⁷Gotl mɑn, ŋuɑ e be sɑnpɑgbɑnt ni k bɑɑt nɑ. Suɑ kul ninbinɑ tɑn sɑɑ lɑ’u nɑn bin nbɑ din ŋmuu’u nɑ, k tingbounŋ nɑ nibuolu kul tɑn sɑɑ bui u pɑɑk. L sɑɑ tien nnɑ wɑɑ. Amenn

⁸Yonmdɑɑnɔ Yennu, nbɑ mɔk yiikuo kul, k be, k din be, k biɑ tɑn sii be yuo nbɑ kɑɑ gbennu nɑ, ŋuɑ e yien ɑ: «Min e tie Alfɑ nɑn Omeegɑ.»

⁹Min e tie Sɑn, i nɑɑ bik nɑ, k mɑɑ be Klistu ni nɑ, n tɑɑ nɑn’i k di fɑlɑ, k biɑ be Yennu nɑɑn ni, k guu nɑn suklu. Mɑɑ din lin k muɑntl Yennu mɑɑn nɑn Yiesu *siɑlɑ nɑ, k b din jii’n k sɑɑn nɑn’n Pɑɑtmuos tinŋ nbɑ k nyun lint’l nɑ ni.

¹⁰L din tie Yonmdɑɑnɔ dɑɑl k Foŋɑnm fiil n ni, k n gbɑt kunkɔpɑɑll n puolpo k l bui nɑn kɑtkɑɑk nɑ.

¹¹Kunkɔl mɑnŋ yet ɑ: «Diɑnt lin nbɑ k ɑ lɑɑt nɑ k tien kɑdɑɑɔk ni, k nɑkn k tul Klistu mɔtɑɑɔk niib nbɑ be digbɑnɑ ŋɑnlole nɑ ni. Bin nbɑ be Efes nɑn Simiilinn nɑn Pelgɑnm nɑn Tiɑtiil nɑn Sɑɑlt nɑn Fiilɑdelfi nɑn Lɑodiise nɑ.»

¹²K n ŋmɑnt k yɑɑ n got wun nbɑ piɑk k tien’n nɑ. Ŋɑnn e k n lɑ sɑlmɑ fitɑ ŋɑnlole k l sie.

¹³K suɑ be l sinsuuk ni k nɑɑn nɑn nisɑɑlk nɑ, k liɑ liɑtfuouk k l tɑn siit u tɑɑbilɑ, k sɑlmɑ gbɑnn buob u nyɑɑɔk ni,

¹⁴k u yut pien nɑn gungunt nɑ, k u ninbinɑ nɑɑn nɑn mupienu nɑ. K u tɑɑ nyili nɑn kut nbɑ k b tuu yɑkn muu pɑɑk k lin nɑnn k nyili biɑnŋ nbɑ nɑ. K kunkɔl guɑl nɑn kpenu ni nyunmɔnn nbɑ tuu kuon biɑnŋ nbɑ nɑ.

¹⁵K u tɑɑ nyili nɑn kut nbɑ k b yi’l blɔns nɑ, k u kunkɔl guɑl nɑn kpenu ni nyunmɔnn nbɑ tuu kuon biɑnŋ nbɑ nɑ.

¹⁶K u kub ŋmɑɑbilɑ ŋɑnlole u niidiitu ni, k juk-bɑnjiɑk nbɑ di mɔliemi tɑnt nyii u mɔb ni, k u nunpo yien nɑn yennu nbɑ tuu yien yensuuk ni nɑ.

¹⁷Mɑɑ lɑ’u yuo nbɑ k n bɑɑ duɑl u tuɑnn nɑn kpiemɔ nɑ. K u jii u niidiitu k yii n pɑɑk, ŋɑɑn yet ɑ: «Dɑɑ tiin jɑŋmɑɑni. Min e tie bont kul ɑ pinpiik nɑn l gbennu.

¹⁸N tie Fuotɔ nɑ e. N din kpo wɑɑ, k n ji fo k sii fo nɑn yuo nbɑ kɑɑ gbennu, k n mɔk yiikuo kuun nɑn kpientinŋ pɑɑk.

¹⁹L pɑɑk, diɑnt lin nbɑ k ɑ lɑ mɔtɑɑnɑ nɑn lin nbɑ tun mɔtɑɑnɑ nɑn lin nbɑ tɑn sɑɑ tun yuo nbɑ wɑɑ.

²⁰Ŋmɑɑbilɑ ŋɑnlole nbɑ k ɑ lɑ n niidiitu ni nɑ nɑn sɑlmɑ fitɑ ŋɑnlole nɑ wuol ni pɑɑk tie nnɑ e: ŋmɑɑbilɑ ŋɑnlole nɑ e tie n mɔtɑɑɔk niib nbɑ be digbɑnɑ ŋɑnlole nɑ mɑlɑkɑɑnbɑ, k fitɑ ŋɑnlole nɑ mun tie n mɔtɑɑɔk niib nbɑ be digbɑnɑ ŋɑnlole mɑnŋ nɑ.»