Read Moba Fiitu 12 Bible Online

Fiitu 12 - Moba bible

Fiitu 12

¹L puolpo k nyingbenŋl dɔkt sɑnpɑɑpo, k puo gbɑb yennu nɑn cincenn nɑ, k sie ŋmɑɑlk pɑɑk, k yil ŋmɑɑbilɑ piik nɑn ŋɑnle nɑn foklk nɑ,

²k puo mɑnŋ mɔk puol k bui mɑtyiɑlu.

³Ŋɑnn e k nyinliel biɑ dɔkt sɑnpɑɑpo, k timunt nnɑ sie k mɔk yulɑ ŋɑnlole nɑn yinɑ piik, k nɑɑnfokli ŋɑnlole yil u yulɑ ŋɑnlole nɑ pɑɑk.

⁴K u jii u juol k dɑt ŋmɑɑbilɑ nɑ bɔktu ŋɑntɑ ni yenn k nyinn’l sɑnpɑɑpo k lu’l tingbounŋ nɑ ni, k ji sie puo nbɑ mɔ mɑtyiɑlu nɑ tuɑnn, k guu ɑ, wun mɑl gbenn ɑ, k wun ji ŋmɑn sɑnpɑntk nɑ.

⁵K puo mɑnŋ tɑn mɑl bonjɑk nbɑ sii diɑ kut dɑnml kii yen i buolu kul nɑn pɑnŋ, k b nyiiɑl bik nɑ k sɑɑn nɑn’ɔ Yennu buol, u nɑɑngbounŋ pɑɑk.

⁶K puo nɑ mun ciɑl k sɑɑn pɑɑnpieonŋ ni siɑn nbɑ k Yennu tien siil k guun’ɔ nɑ, k sii dint’ɔ k sɑɑ diɑn dɑɑ tusl nɑn kobi ŋɑnle nɑn piinluob.

⁷Ŋɑnn e k tɔb fiil *Yendɔunŋ ni. K *mɑlɑkɑ wun nbɑ k u sɑnn yi Miisiɑl nɑ, k ŋuɑ nɑn u mɑlɑklieb kɔn k tuokt timunt nɑ nɑn u mun yɑɑ mɑlɑkɑɑnbɑ nɑ,

⁸k b nyɑnn timunt nɑn u mɑlɑkɑɑnbɑ nɑ, k k cɑb’b ɑ bii be Yendɔunŋ ni.

⁹K b jii timunt nɑ k lu’u nɑn-yel po. U ponŋ tuu tie wɑɑɔk nbɑ tuu be e wɑɑ, k u sɑnn yi Sɑnbiiltuɑ ɑmi *Sɑɑtɑn, k tuu kpɑnn tingbounŋ nɑ tieb kul nɑ. K b nyinn ŋuɑ nɑn u mɑlɑkɑɑnbɑ k lu’b tingbounŋ nɑ ni.

¹⁰L yuo k n gbɑt kunkɔsɑɑkɑl sɑnpɑɑpo k l yien ɑ: «Mɔtɑɑnɑ, Yonmdɑɑnɔ Yennu fielu nɑn u yiikuo nɑn u nɑɑn nɑn u *Klistu yiikuo bɑɑl nɑ, k mɑɑn wun nbɑ tuu tɑɑl t nɑɑ wɑɑs Yennu tuɑnn, yennu nɑn nyiɑɔk nɑ, b ji nyinn’ɔ k lu’u wɑɑ.

¹¹Pebik nɑ sɔn nɑn u lɑbɑmɑnn nbɑ k b muɑntl nɑ pɑɑk e k b nyɑnn nyɑnnu, k b din yit b mɑnfuol sɑlk e k gɑɑl kuun.

¹²L pɑɑk, yinm nbɑ be Yendɔunŋ ni nɑ, ii mɔk mɑn pɑlpienn. Ŋɑɑn tingbounŋ nɑ niib nɑn bin nbɑ be mɔkgbenŋl ni ŋɑnin, pɑlbiil be b pɑɑk, k mɑɑn Sɑɑtɑn sik b pɑɑk nɑn wutogbenŋl, wɑɑ mi nɑn u yuo ji k yɑb nɑ pɑɑk.»

¹³*Timunt nɑ nbɑ bɑnn nɑn b jii’u k lu tingbounŋ nɑ ni nɑ, k u ji wɑɑ puo nbɑ mɑl bonjɑk nɑ, ɑ wun suol’ɔ.

¹⁴K b jii kɑnbɑgbenŋl kpinkpɑnt ŋɑnle k tul puo nɑ, ɑ wun yukl k sɑɑn muuk ni kii sɑɑ kii be siɑn nbɑ k b sii dint’ɔ k jɑnŋ binɑ ŋɑntɑ nɑn binjinn k wɑɑɔk nɑ ji dɑɑ fit k so’u.

¹⁵K timunt nɑ puut nyunpɑnɑ puo nɑ pɑɑk k l nɑɑn nɑn mɔkl ni nyun nɑ, ɑ nyun nɑ n di’u,

¹⁶ŋɑɑn k tinŋ sonm puo nɑ k yɑɑt ŋɑɑn jiin mubn nyun nbɑ nyii timunt mɔb ni nɑ pɑɑk.

¹⁷K timunt nɑ wutuol duo nɑn puo nɑ bonciɑnn, k u sɑɑn ɑ wun sɑɑ kɔn nɑn puo nɑ yɑɑbuonɑ nbɑ biɑl k wɑɑ Yennu *senni k diɑ Yiesu lɑbɑmɑnn nɑ,

¹⁸ŋɑɑn sɑɑn sie mɔk-kpinŋ.