Read Moba Fiitu 13 Bible Online

Fiitu 13 - Moba bible

Fiitu 13

¹K n lɑ k muuk ni bonkobuk nyii mɔkgbenŋl ni, k mɔk yinɑ piik nɑn yulɑ ŋɑnlole, k nɑɑnfokli piik yil u yinɑ piik nɑ pɑɑk, k sɑnn nbɑ suki Yennu nɑ diɑn u yulɑ nɑ pɑɑk.

²K muuk ni bonkobuk nbɑ k n lɑ nɑ nɑɑn nɑn nɑɑmuuk nɑ, k mɔk tɑɑnyɑlgbenŋɑ, k u mɔb nɑɑn nɑn yɑnbɔl mɔb nɑ. K timunt nɑ tul muuk ni bonkobuk nɑ u mɔnŋ pɑnŋ nɑn u nɑɑngbounŋ nɑn u yiikuo nbɑ yɑb.

³K n lɑ k l nɑɑn nɑn dɑnŋ nbɑ jɑnŋ nɑn kuun be bonkobuk nɑ yuyenn pɑɑk, ŋɑɑn k u lek pɑɑk ɑ, k l ji bɑkt tingbounŋ nɑ tieb kul, k b ji wɑɑ’u,

⁴b din jiɑntl timunt nɑ, k mɑɑn u jii u yiikuo k tul muuk ni bonkobuk nɑ k yien ɑ: «Ŋmee tie nɑn muuk ni bonkobuk nɑ? Ŋmee sɑɑ fit kɔn nɑn muuk ni bonkobuk mɑnŋ i?»

⁵K b cɑb muuk ni bonkobuk nɑ ɑ wuu piɑk nɑn jɑpɑɑt kii suki Yennu, k biɑ cɑb’ɔ yiikuo nbɑ k u sii tuun k sɑɑ diɑn ŋmɑɑli piinnɑ nɑn ŋɑnle.

⁶K u piin k piɑk suki Yennu nɑn u sɑnn nɑn siɑn nbɑ k u be nɑ, nɑn bin nbɑ kul be *Yendɔunŋ ni.

⁷K b biɑ cɑb’ɔ yiikuo ɑ wun kɔn nɑn Yennu niib k nyɑnn’b, k biɑ cɑb’ɔ yiikuo k u sɑɑ yent buolu kul nɑn nibuolu kul nɑn mɑbuolu kul nɑn tini kul niib.

⁸Niib kul nbɑ be tingbounŋ nɑ ni, k b sɑnɑ din k diɑn mɑnfuol kɑdɑɑɔk ni yuo nbɑ k *dulnyɑ dɑɑ din kɑɑ nɑ, b sɑɑ jiɑnt muuk ni bonkobuk nɑ. Mɑnfuol kɑdɑɑɔk nɑ tie Pebik nbɑ k b din kpii’u nɑ yɑl e.

⁹Wun nbɑ mɔk tubɑ, wun gbiint.

¹⁰Wun nbɑ tie sɑɑ kuɑ dɑnsɑlk, u set sɑɑ kuɑ dɑnsɑlk ɑ. K wun nbɑ mun k b sɑɑ kpi’u nɑn *juk-bɑnjiɑk, b sɑɑ kpi’u wɑɑ. L pɑɑk, l ŋɑn k Yennu niib i mɔk mintl k tien’ɔ yɑdɑ fɑnu.

¹¹L puolpo k n biɑ lɑ muuk ni bonkobluɑ k u nyii tinŋ ni k mɔk yinɑ ŋɑnle nbɑ nɑɑn nɑn Pebik yinɑ nɑ, ŋɑɑn k u piɑk k u kunkɔl nɑɑn nɑn timunt kunkɔl nɑ,

¹²k u sie muuk ni bonkobsinsinn nɑ tuɑnn po, k jii muuk ni bonkobsinsinn mɑnŋ yiikuo nbɑ yɑb nɑ, k muks tingbounŋ nɑ tieb kul, ɑ bii jiɑntl muuk ni bonkobsinsinn nbɑ lɑ dɑnŋ nbɑ yɑɑ lin kpi’u k u tɑn pɑɑk nɑ.

¹³K muuk ni bonkobuk nbɑ pukn bɑnle nɑ biɑ tun bɑktnɔunŋ nyinɑ, k te k muu nɑ nyii sɑnpɑɑpo k sik tinŋ ni, k niib nɑ lɑ nɑn b ninbinɑ.

¹⁴K bɑɑ cɑb’ɔ k u tuun bɑktnɔunŋ nyinɑ nɑ muuk ni bonkobsinsinn tuɑnn nɑ, k u kpɑnn tingbounŋ nɑ tieb, k yet’b ɑ bin mɑɑ pɑtl k lii nɑɑn muuk ni bonkobuk nbɑ lɑ juk-bɑnjiɑk dɑnŋ ŋɑɑn tɑn k kpo nɑ.

¹⁵K b cɑb muuk ni bonkobuk nbɑ pukn bɑnle nɑ yiikuo k u fuont k tien pɑtl nbɑ nɑɑn nɑn muuk ni bonkobsinsinn nɑ, k pɑtl mɑnŋ tɑn fit piɑk k te k b kpi bin nbɑ k sɑk ɑ bin jiɑnt’ɔ nɑ.

¹⁶K muuk ni bonkobuk mɑnŋ biɑ muks niib kul, bin nbɑ tie nitɑli nɑn bin nbɑ tie nijɑɑnɑ, mɔktɑ nɑn fɑlɑ dɑnm, dɑɑbɑ nɑn yent-n-mɔnŋ dɑnm, ɑ wun dɔk b niidiitu ɑmi b yugbiɑ pɑɑk.

¹⁷L i tie k dɔuk nɑ kɑɑ nilɔ pɑɑk, u k fit dɑɑ siɑl ɑmi k kɔi siɑl, k dɔuk nɑ tie muuk ni bonkobuk nɑ sɑnn ɑmi u sɑnn nɑnml.

¹⁸Lin nbɑ nɑ tie yɑnfɑntl yɑl e. Wun nbɑ kul mɔk yɑn, wun dukn bɑnn k muuk ni bonkobuk mɑnŋ nɑnml pɑɑk, k nɑnml mɑnŋ tie jɑsuɑ sɑnn e, k l nɑnml tie kobi ŋɑnluob nɑn piinluob nɑn ŋɑnluob.