Read Moba Fiitu 18 Bible Online

Fiitu 18 - Moba bible

Fiitu 18

¹L puolpo k n biɑ lɑ mɑlɑksuɑ k u nyii *Yendɔunŋ ni k siik, k mɔk yiikuo bonciɑnn, k u yentu ŋɑnm yent tingbounŋ nɑ lokl kul po.

²U yien nɑn kunkɔsɑɑkɑl ɑ: «Dogbenŋl Bɑbiilonn nɑ bɑɑ wɑɑ, l set bɑɑ wɑɑ. U ji kpɑnt siɑn nbɑ k polɑ kuɑ lenŋ k nɑlnbiit kul nɑn nuɑnbiit kul nbɑ mɔk sinsint bɔl b mɔnŋ lenŋ.

³K mɑɑn u te k nibuolu kul nyuu u boncunconsn dɑɑn k l nɑɑn nɑn u tul’b dɑmunŋ nbɑ pɑɑl k b nyuu k yib k wɑɑt, k tingbounŋ kpɑnbɑlɑ conm nɑn’ɔ, k tingbounŋ nɑ kpinkpentɑ kpɑnt mɔktɑ u niɑnbiiuk nbɑ mɑntk yɑbt nɑ pɑɑk.»

⁴Ŋɑnn e k n biɑ gbɑt kunkɔsɑɑkɑl k l nyii Yendɔunŋ ni k yien ɑ: «N niib, nyint i mɔnŋ mɑn duo nɑ ni, ɑ i dɑɑ lɑknt tuun tuonbiit nɑn’ɔ, k bonbiil nbɑ k u sɑɑ lɑ u biit pɑɑk nɑ dɑɑ tɑɑbt’i ni,

⁵k mɑɑn duo nɑ biit nɑ yɑb k duo bonciɑnn k bɑɑl sɑnpɑgbɑnt ɑ, k Yennu tiɑn u biit mɑnŋ po.

⁶Tɔn, tient k jiin’ɔ nɑn wɑɑ tuu tie biɑnŋ nbɑ nɑ, k pɑ jiin’ɔ u biit pɑnn tɑɑl munle, k gbien u senŋ nɑn dɑmunŋ nbɑ k u din tul’i, k l pɑnŋ ii yɑb tɑɑl munle.

⁷Tient’ɔ muksuk nɑn pɑlbiil k lin jɑnŋ nɑn dontl nɑn mɔktuk nbɑ k u din tul u mɔnŋ nɑ. U yien u pɑl ni ɑ: ‹N kɑl k tie puo nbɑ tie kpɑnbɑl. N k tie pɑkuɑk kɑɑ, k n kɑn mi lɑ kuun pɑlbiil.›

⁸L pɑɑk e, bonbiil nbɑ tie u yɑl nɑ, k tie kuun nɑn l pɑlbiil nɑn kon nɑ tɑn sɑɑ suol’ɔ dɑyenn kuɑ ni, k duo mɑnŋ n di muu, k mɑɑn Yonmdɑɑnɔ Yennu nbɑ bu nɑn’ɔ nɑ tie yiikuo dɑɑnɔ e.»

⁹Tingbounŋ nɑ kpɑnbɑlɑ nbɑ conm nɑn’ɔ k di u mɑnt nɑ, b i tɑnŋ i lɑ u muu dinu munyuut nɑ, b tɑn sɑɑ bui k fɑbn u pɑɑk.

¹⁰B tɑn sii tiin jɑŋmɑɑni u fɑlɑ nɑ pɑɑk, k sie bɑnfɔkl ɑ k ji yien ɑ: «Abɑ, dogbenŋl nɑ. Abɑ, Bɑbiilonn, duo nbɑ mɔk pɑnŋ nɑ, yuo wɑɑnm-nnɑ jɑnŋ nɑn ɑ tubdɑtu wɑɑ.»

¹¹K tingbounŋ nɑ kpinkpentɑ tɑn sɑɑ bui k fɑbn u pɑɑk, k mɑɑn suɑ nbɑ k dɑɑ b tiɑt nɑ pɑɑk.

¹²Suɑ ji kɑn mi k dɑɑ b kuɑtn nbɑ tie sɑlmɑ nɑ, nɑn likli kut, nɑn tɑnɑ nbɑ nyili k l dɑɑɔk pɑɑl, nɑn pelilnbɑ, nɑn cɑbfɑlmi, nɑn tiɑt nbɑ k b mɔnt k l dɑɑɔk pɑɑl nɑ, nɑn cɑbɑ nbɑ k b yi soɑ nɑ, nɑn cɑbɑ nbɑ mɔn k nyili, nɑn tɑɑbi nbɑ k l nublu mɑn, nɑn lin nbɑ k b jii luobuk nyɑnɑ k nɑn nɑ, nɑn lin nbɑ k b jii tɑɑbi nbɑ k l dɑɑɔk pɑɑl k nɑn nɑ, nɑn lin nbɑ k b jii kut nbɑ k b yi blɔns k nɑn nɑ, nɑn lin nbɑ k b jii kut k nɑn nɑ, nɑn lin nbɑ k b jii tɑnɑ nbɑ k b yi mɑɑlbl[7] k nɑn nɑ,

¹³nɑn kɑɑnel[8], nɑn bonliɑ nbɑ mɑnŋt kpint nɑ, nɑn tulɑɑli nbɑ tie nyun nɑ, nɑn tulɑɑli nbɑ tie kpɑn nɑ, nɑn tulɑɑli nbɑ k b jokt muu k l munyuut nublu mɑn nɑ, nɑn dɑmunŋ, nɑn kpɑn, nɑn yon, nɑn * ble, nɑn nei, nɑn pei, nɑn tɑɑni nɑn l tolt, nɑn dɑɑbɑ, nɑn bin nbɑ k b suol’b tɑb ni nɑ.

¹⁴K kpinkpentɑ nɑ yien ɑ: «Tiɑt nbɑ kul k ɑ bo luon fii mɔk nɑ, nɑn ɑ mɔktuk kul, nɑn tɑŋɑnt nɑ kul gɑl ɑ, k ɑ ji kɑn mi k lɑ.»

¹⁵K kpinkpentɑ nbɑ kpentl k tɑn lɑ nyuɑt bonciɑnn duo mɑnŋ ni nɑ tɑn sii sie bɑnfɔkl ɑ k mɔ ŋɑɑn fɑbn, k mɑɑn b tiin jɑŋmɑɑni u fɑlɑ nɑ pɑɑk.

¹⁶B sɑɑ bui k fɑbn k yien ɑ: «Abɑ, dogbenŋl nbɑ nɑɑn nɑn puo nbɑ gbɑb cɑbfɑlmi nɑn tiɑt nbɑ k b mɔnt k l dɑɑɔk pɑɑl nɑn cɑbɑ nbɑ mɔn k nyili nɑn sɑlmɑ nɑn tɑnɑ nbɑ nyili k l dɑɑɔk pɑɑl nɑn pelilnbɑ nɑ,

¹⁷yuo wɑɑnm-nnɑ sinsuuk ni k ɑ mɔktuk nɑ kul biil.» K bin nbɑ tie ŋɑlnt yudɑnm nɑn bin nbɑ kuɑ k sɑɑ b sɑɑnu nɑ nɑn ŋɑlnkɑnnɑ nɑn bin nbɑ kul tuun mɔkgbenŋl ni, k b ji sie bɑnfɔkl,

¹⁸ŋɑɑn yikn, bɑɑ lɑ k muu di’u k l munyuut do sɑnpɑɑpo nɑ, k b yien ɑ: «T k mi lɑ dogbenŋl nɑ buolu.»

¹⁹K b fini tɑnt k pukn b mɔnŋ pɑɑk, k bui ŋɑɑn fɑbn k yien ɑ: «Abɑ, dogbenŋl nbɑ k niib mɔk ŋɑlnt k lin mɔkgbenŋl ni k kpentl k lɑɑt gol lenŋ nɑ, k l tɑɑn bɑɑ k biil yuo wɑɑnm-nnɑ nuɑk ni.»

²⁰Yendɔunŋ ni tieb nɑn Yennu niib nɑn Yiesu tuomiinbɑ nɑn *Yennu sɔkniinbɑ, ii mɔk mɑn pɑlpienn, k mɑɑn Yennu bu dogbenŋl mɑnŋ buut k biil’ɔ, wɑɑ din tuun bonbiil k tien’i nɑ pɑɑk.

²¹K mɑlɑk-pɑɑlɔ tɔkl tɑnn nbɑ gbenŋ nɑn nɑgbenŋl nɑ, k lu’l mɔkgbenŋl ni, k yet ɑ: «B tɑn sɑɑ wokt dogbenŋl Bɑbiilonn nɑ k lu’u nnɑ e wun biil, k suɑ ji kɑn mi k lɑ’u,

²²k suɑ ji kɑn mi k gbɑt k bɑfɑɑlɑ fɑɑ biɑɔk, ɑmi k yɑn-yinnɑ yiin *yɑni, ɑmi k yelpeblɑ pieb yeli, ɑmi k kɑtkɑpeblɑ pieb kɑtkɑi duo mɑnŋ ni. Suɑ kɑn mi lɑ tuontunnɔ lenŋ, k suɑ biɑ kɑn mi k gbɑt nɑɑl fuut lenŋ.

²³Fitl yentu ji kɑn yent duo mɑnŋ ni. Suɑ ji kɑn mi gbɑt jɑb nbɑ kuɑn puob nɑn puob nbɑ kun jɑb nɑ kunkɔlɑ. Duo mɑnŋ ni kpinkpentɑ e din tie pɑɑlb k cie tingbounŋ nɑ kpinkpentɑ kul ɑ, k duo mɑnŋ niib din tuu diɑ nyɔku k kpɑnn nibuolu kul.

²⁴Bɑbiilonn lɑ tubdɑtu k mɑɑn b lɑ sɔkniinbɑ nɑn Yennu niib nɑn bin nbɑ kul k b kpii’b tingbounŋ nɑ ni nɑ sɔn e duo mɑnŋ ni.»