Read Moba Fiitu 20 Bible Online

Fiitu 20 - Moba bible

Fiitu 20

¹K n biɑ lɑ mɑlɑksuɑ k u nyii *Yendɔunŋ ni k siik, k diɑ buotsunsunŋ nbɑ kɑɑ telk nɑ pieni nɑn jɑlgbenŋl u nuu ni,

²k u suol timunt nbɑ din tuu be nɑ wɑɑ, k tie Sɑnbiiltuɑ ɑmi *Sɑɑtɑn nɑ, k lol’ɔ k u sii be binɑ tusl,

³k jii’u k lu buotsunsunŋ nɑ ni binɑ tusl, ŋɑɑn kpɑl k pɔl ɑ u ji kɑn fit k kpɑnn tingbounŋ nɑ tieb buolu kul, sie k binɑ tusl n tɑn gɑl. L puolpo b sɑɑ luot’ɔ yuo wɑɑnm-nnɑ.

⁴K n lɑ nɑɑngbɑnt k bin nbɑ k b tul’b yiikuo ɑ bin bu buut nɑ kɑl l pɑɑk. K n biɑ lɑ bin nbɑ k b din pot b yulɑ bɑɑ din tie *siɑlɑ k tul Yiesu k biɑ muɑntl Yennu mɑɑn nɑ pɑɑk. B din k jiɑnt bonkobuk nɑ, ɑmi l nɑɑɔnŋ nɑ. B biɑ din k gɑɑl bonkobuk mɑnŋ dɔk b yugbiɑ pɑɑk ɑmi b nii ni. B fiil kuun ni e k lɑkn dii nɑɑn nɑn *Klistu binɑ tusl.

⁵Nɑ e tie sinsinn kuun fiilu. (Kpienm nbɑ biɑl nɑ ŋɑnin k fiil kuun ni, sie binɑ tusl nɑ n tɑn gɑl ɑ.)

⁶Bin nbɑ dɔnŋ sinsinn kuun fiilu nɑ tie Yennu yɑb e k pɑlpienn tie b yɑl. Kuun nbɑ pukn munle nɑ k mɔk yiikuo b pɑɑk. B sii tie Yennu nɑn Klistu mɑnntieb e, k sɑɑ lɑkn k di nɑɑn nɑn Klistu binɑ tusl.

⁷Binɑ tusl nɑ i tɑnŋ i gɑl, b sɑɑ luot Sɑɑtɑn buotsunsunŋ nɑ ni k ŋɑɑ’u,

⁸k u sɑɑ nyi k kpɑnn tingbounŋ nɑ yent kul niib nbɑ k b yi’b Gɔg nɑn Mɑɑgɔg[9] nɑ. Sɑɑtɑn sɑɑ tikl b kul ɑ k bin tuok tɑb, k b kɑnn tie nɑn mɔkgbenŋl tɑnbiini kɑnn nɑ e.

⁹K b nyii k tiɑ k lint lokl kul po, k tɑnt k sɑɑ biɑ lint Yennu niib nbɑ be siɑn nɑ nɑn duo nbɑ k Yennu mɑntk luon nɑ. Ŋɑɑn k muu nyii Yendɔunŋ ni k tɑn dii niib nbɑ k Sɑɑtɑn tikl’b nɑ.

¹⁰K b jii Sɑɑtɑn nbɑ kpɑnn tingbounŋ nɑ niib nɑ, k lu’u buotsunsunŋ nbɑ gbie nɑn muu k sɑlwuutɑ di nɑn’n nɑ ni, siɑn nbɑ k b dɔnŋ lu bonkobuk nɑ nɑn u fɑɑk sɔkni nɑ. Lenŋ e k l sɑɑ muks’b yennu ni nɑn nyiɑɔk mɔkmɔk nɑn yuo nbɑ kɑɑ gbennu.

¹¹Ŋɑnn e k n lɑ nɑɑngbongbenŋl nbɑ pien bonciɑnn nɑn wun nbɑ kɑl l pɑɑk. Tingbounŋ nɑn sɑnpɑɑk mil bot u tuɑnn, k suɑ ji kɑn mi k lɑ’b.

¹²K n lɑ bin nbɑ din kpo nɑ, nijɑɑnɑ nɑn nitɑli nɑ, k b sie nɑɑngbounŋ nɑ tuɑnn po, k suɑ pɔbt kɑdɑɑt k biɑ pɔbt kɑdɑlieok nbɑ tie mɑnfuol kɑdɑɑɔk K b bu bin nbɑ kpo nɑ buut nɑn bɑɑ din tun biɑnŋ nbɑ nɑ, k l diɑn kɑdɑɑt mɑnŋ ni.

¹³K mɔkgbenŋl nyinn kpienm nbɑ be nyun ni, k kuun nɑn kpientinŋ mun nyinn bin nbɑ kpo k be b ni nɑ. K b bu b buut nɑn bɑɑ tun biɑnŋ nbɑ nɑ.

¹⁴K b jii kuun nɑn kpientinŋ k lu’b buotsunsunŋ nbɑ gbie nɑn muu nɑ ni. Kuun nbɑ pukn munle nɑ e tie mɔkl nbɑ di muu mɑnŋ.

¹⁵K wun nbɑ yɑɑ sɑnn kul k diɑn mɑnfuol kɑdɑɑɔk nɑ ni, b jii’u k lu mɔkl nbɑ di muu nɑ ni.