Read Moba Fiitu 21 Bible Online

Fiitu 21 - Moba bible

Fiitu 21

¹K n biɑ lɑ sɑnpɑpɑɑnn nɑn tingbonpɑɑnn. K sɑnpɑkpel nɑ nɑn tingbonkpel nɑ din mil k bot, k mɔkgbenŋl ji kɑɑ.

²K n lɑ Yennu duo nbɑ tie Selusɑɑlenm pɑɑnn nɑ, k l nyii Yennu buol *Yendɔunŋ ni, k siik, k tie nɑn puoyuokl nbɑ tuu tien siil k fɑnŋt u mɔnŋ k tuokt u sɔlɔ nɑ.

³K n gbɑt k kunkɔsɑɑkɑl nyii nɑɑngbounŋ nɑ buol k yien ɑ: «Mɔtɑɑnɑ, Yennu lɑnbounŋ ji be nifosɑɑli buol e, k ŋuɑ Yennu sii be nɑn’m, k b sii tie u niib, k ŋuɑ Yennu mɔnŋ sii be b buol k sii tie b Yennu.

⁴U sɑɑ fiɑl b nyin-nyuut kul b ninbinɑ ni, k kuun nɑn pɑlbiil nɑn mɔni nɑn yiɑlu ji sii kɑɑ, k mɑɑn bonkpelɑ nɑ kul ji gɑl ɑ.»

⁵K wun nbɑ kɑl nɑɑngbounŋ mɑnŋ pɑɑk nɑ yet ɑ: «Mɔtɑɑnɑ, n tie bont kul bonpɑɑnn e.» Ŋɑnn e k u biɑ yet’n ɑ: «Diɑnt lin nbɑ nɑ, k mɑɑn mɔbonɑ nɑ tie mɔni e k niib sɑɑ fit tien’n yɑdɑ.»

⁶K u biɑ yet’n ɑ: «L ponŋ tun ɑ. Min e tie Alfɑ nɑn Omeegɑ k l pɑɑk tie piinu nɑn juontu. Wun nbɑ k nyun-nyuklu mɔk’ɔ nɑ, n sɑɑ pi’u mɑnfuol nyun nbɑ buni k nyi nyunkpɑnɑ ni nɑ k wun nyu yɑnn,

⁷k wun nbɑ nyɑnn nyɑnnu nɑ, u sɑɑ gɑɑl lin nbɑ nɑ n buol, k n sii tie u Yennu, k u mun sii tie n bik.

⁸Ŋɑɑn jɑŋmɑɑndɑnm nɑn bin nbɑ kɑɑ yɑdɑ nɑn bonbiildɑnm nɑn nikpiilt nɑn juonbɑɑlt nɑn jɑbɑɑbulɑ nɑn pɑtjiɑnt-dɑnm nɑn fɑi dɑnm kul, b binbebuol tie mɔkl nbɑ di muu k sɑlwuutɑ di nɑn’n nɑ e. Ŋɑnn e tie kuun nbɑ pukn munle nɑ.»

⁹L yuo nɑ k *mɑlɑkɑɑnbɑ bɑnlole nbɑ bo diɑ seni ŋɑnlole, k l gbie nɑn bonbiil ŋɑnlole nbɑ wɑɑ puol nɑ yenɔ yet’n, ɑ n bɑɑl k wun wɑnn’n Pebik nɑ puoyuokl nɑ.

¹⁰Ŋɑnn e k Foŋɑnm sik n pɑɑk k mɑlɑkɑ nɑ jii’n k duo nɑn’n juɑl nbɑ yɑb k biɑ fɔk nɑ yul pɑɑk, k wɑnn’n Selusɑɑlenm nbɑ tie Yennu duo nɑ, k l nyii Yendɔunŋ ni, Yennu buol, k siik,

¹¹k nyili nɑn Yennu yentsɑɑkɑl nɑ, k biɑ nyili nɑn tɑnŋɑnn nbɑ k b yi’l jɑsp nɑ, k nyɔkt nɑn miɑnu nɑ.

¹²K duo mɑnŋ mɔk juongbenŋfuot, k Juonɑ mɑnŋ mɔk gɑnɑ piik nɑn ŋɑnle, k mɑlɑkɑɑnbɑ piik nɑn bɑnle guu gɑnɑ mɑnŋ, k Islɑɑel buolu piik nɑn bɑnle nɑ sɑnɑ diɑn gɑnɑ piik nɑn ŋɑnle mɑnŋ pɑɑk.

¹³K gɑnɑ ŋɑntɑɑtɑɑ be juonɑ ŋɑnnɑ nɑ pɑɑk, k ŋɑntɑ be yendopo, k ŋɑntɑ be diitu po, k ŋɑntɑ be gɑnŋ po, k ŋɑntɑ be yenbɑɑpo.

¹⁴Duo mɑnŋ juonɑ sie tɑnɑ piik nɑn ŋɑnle pɑɑk e, k Pebik nɑ tuomiinbɑ *piik nɑn bɑnle nɑ sɑnɑ diɑn tɑnɑ piik nɑn ŋɑnle nɑ pɑɑk.

¹⁵K mɑlɑkɑ nbɑ piɑk k tien’n nɑ diɑ sɑlmɑ pɑtu nbɑ k b diɑ k biki nɑ, ɑ wun bikn duo mɑnŋ nɑn l tɑnmɔi nɑn l juonɑ nɑ.

¹⁶K l mɔk juonɑ ŋɑnnɑ, k juonɑ mɑnŋ fɔknt kul tie yonm. K mɑlɑkɑ nɑ bikn duo nɑ nɑn u pɑtu, k l yɑlimu tie stɑɑdnbɑ tusɑ piik nɑn ŋɑnle (stɑɑdnbɑ 12.000), k l fɔknt nɑn l dokiu nɑn l yɑlimu kul tie yonm.

¹⁷K u biɑ bikn l juonɑ, k l kpɑkiu tie kuudenbɑ kobik nɑn piinnɑ nɑn ŋɑnnɑ. Mɑlɑkɑ mɑnŋ bikn k l tie nɑn nifosɑɑlk nbɑ tuu biki bonɑ biɑnŋ nbɑ nɑ e.

¹⁸K Juonɑ nɑ mɑɑ nɑn tɑnɑ nbɑ k b yi jɑsp, ŋɑɑn k duo nɑ mɔnŋ tie sɑlmɑ nbɑ ŋɑn k nyili nɑn miɑnu nɑ,

¹⁹k b jii tɑnɑ nbɑ dɑɑɔk pɑɑl bonciɑnn, l buolu buolu, k tɑbn fiɑkl tɑnɑ pɑɑk, k tɑnbuolu mɑnŋ te k l ŋɑn bonciɑnn. Sinsinn tɑnn nbɑ k b tɑbn fiɑkl pɑɑk nɑ yi jɑsp, k tɑnn nbɑ pukn munle nɑ yi sɑɑfiil, k muntɑ ni yɑl yi ɑgɑt, k munnɑ ni yɑl yi emeluod, k munŋmu ni yɑl yi oniiks, k munluob ni yɑl yi sɑldoenn, k munlole ni yɑl yi kliisoliit, k munniin ni yɑl yi beliil, k mun-yiɑ ni yɑl yi topɑɑs, k piik ni yɑl yi kliisoplɑɑs, k lin nbɑ pukn piik nɑn yenn nɑ yi tulkuɑs[10], k piik nɑn ŋɑnle ni yɑl mun yi ɑmetiist[11].

²¹K l gɑnɑ piik nɑn ŋɑnle nɑ tie pelilnbɑ nɑ, k gɑnɑ kul tie pelil mɑnŋ yenn yenn k sɑɑ diɑn piik nɑn ŋɑnle mun, k duo nɑ sɔnu tie sɑlmɑ nbɑ ŋɑn, k yien nɑn miɑnu nɑ.

²²N k lɑ Yennu jɑɑnti ŋɑsɑɑkɑk duo mɑnŋ ni, k mɑɑn duo nɑ Yennu jɑɑnti ŋɑsɑɑkɑk tie Yonmdɑɑnɔ nbɑ mɔk yiikuo kul nɑn Pebik nɑ e.

²³K duo mɑnŋ k luon yennu ɑmi ŋmɑɑlk yentu lenŋ, k mɑɑn Yennu *yudɑnt nɑ e tie l yentu, k Pebik nɑ mun tie l fitl.

²⁴K tingbounŋ nɑ nibuolu sii be l yentu ni k sonm, k tingbounŋ nɑ kpɑnbɑlɑ sɑɑ kuɑ nɑn b mɔktuk k bil lenŋ.

²⁵Duo mɑnŋ tɑnmɔi k luo, k mɑɑn nyiɑɔk kɑɑ lenŋ.

²⁶K b sɑɑ bɑɑl nɑn lin nbɑ tie tingbounŋ nɑ tini kul niib dontl nɑn yudɑnt k bil duo nɑ ni.

²⁷K lin nbɑ tie jɑknt nɑn wun nbɑ tuun fei tuonn nɑn fɑi dɑnm, kɑn kuɑ duo mɑnŋ ni, sie bin nbɑ yɑɑ sɑnɑ diɑn Pebik nɑ mɑnfuol kɑdɑɑɔk ni nɑ kuukuɑ e sɑɑ kuɑ duo mɑnŋ ni.