Read Moba Fiitu 3 Bible Online

Fiitu 3 - Moba bible

Fiitu 3

¹«Diɑnt k tul Sɑɑlt jɑɑnti *mɑlɑkɑ ɑ: ‹Lɑbɑɑl nɑ nyii wun nbɑ mɔk Yennu Sei ŋɑnlole nɑn ŋmɑɑbilɑ ŋɑnlole nɑ buol e. N mi ɑ tuonɑ po, k biɑ mi nɑn niib duki ɑ ɑ fo, ŋɑɑn k ɑ kpo wɑɑ.

²Fiit k yɑbl k lin nbɑ tenn ɑ buol ni dɑɑ kpenn k gbent, k mɑɑn tuonɑ nbɑ k ɑ tuun nɑ k gbuot Yennu nunm.

³Ii tiɑn tumiu nbɑ k ɑ din gbɑt k biɑ din gɑɑl nɑ. Ii diɑ’l kii biɑ kii mɔ kuɑŋɑɑn kii lebtl binbenŋ. L i tie k ɑ k fiil, n sɑɑ bɑɑl ɑ buol ni nɑn nɑn-yukɔ nbɑ tuu bɑɑl biɑnŋ nbɑ nɑ e, k ɑ kɑn bɑnn n bɑɑlu yuo.

⁴Ŋɑɑn nisiɑb be Sɑɑld k b tiɑt k kuɑ jɑknt. Ŋɑnm e sɑɑ liɑ tɑpieni k ŋɑnm nɑn min ii sonm, k mɑɑn bɑɑ ŋɑn nɑn’n nɑ pɑɑk.

⁵Wun nbɑ nyɑnn nyɑnnu mɑnŋ nɑ, u tɑn sɑɑ liɑ tɑpieni nɑ, k n tɑn kɑn piin u sɑnn mɑnfopɑɑnn dɑnm kɑdɑɑɔk nɑ ni, k n tɑn sɑɑ yet n Bɑɑ nɑn u mɑlɑkɑɑnbɑ nɑ pɑɑnu ni ɑ l dɑɑnɔ tie n yuɑ e.›

⁶«Wun nbɑ mɔk tubɑ, wun gbiint lin nbɑ k Foŋɑnm nɑ yien k tien jiɑnti nɑ.»

⁷«Diɑnt k tul Fiilɑdelfi jɑɑnti mɑlɑkɑ ɑ: ‹Gotl, lɑbɑɑl nɑ nyii wun nbɑ tie Ŋɑnɔ, k biɑ tie Bɑlmɔni dɑɑnɔ nɑ buol e, k u diɑ kpɑnbɑl Dɑɑfiid pienu k lin nbɑ k u luot nɑ, suɑ kɑn fit luon, k lin nbɑ kul k u luon nɑ, suɑ kɑn fit luot.

⁸N mi ɑ tuonɑ po. Gotl, n senn gɑnn nbɑ yɑɑ e, ɑ tuɑnn k suɑ kɑn fit luon. N mi nɑn ɑ k mɔk pɑnŋ, ŋɑɑn ɑ sɑk n mɑɑn nɑ k dɑɑ kpet nɑn mɔbonn ɑ.

⁹Gotl, bin nbɑ tie *Sɑɑtɑn mɔtɑɑɔk niib, fɑidɑnm nbɑ yɑɑ ɑ b tie *Suifnbɑ ŋɑɑn k k tie nɑ, n sɑɑ te k bin bɑɑl k tɑn gbɑɑn ɑ tuɑnn po, k bɑnn nɑn n set luon’ɑ.

¹⁰K mɑɑn fɑɑ sɑk n mɑɑn k mɔk mintl nɑ pɑɑk, n sɑɑ diɑ’ɑ bonŋɑnn k ɑ tɑn kɑn kuɑ bonbiil nbɑ bɑɑt tingbounŋ nɑ kul pɑɑk, ɑ lin bikn tingbounŋ nɑ niib nɑ ni.

¹¹N sɑɑ bɑɑl mɔtɑɑnɑ. I diɑ lin nbɑ k ɑ mɔk nɑ fɑnu k suɑ tɑn dɑɑ fiɑl ɑ nɑɑn foklk.

¹²Wun nbɑ nyɑnn nyɑnnu nɑ, n sɑɑ tien’ɔ n Yennu jɑɑnti ŋɑsɑɑkɑk ni jɑɑntɑlk, k u ji kɑn nyi lenŋ. K n biɑ sɑɑ diɑn n Yennu sɑnn u pɑɑk, k diɑn n Yennu duo sɑnn u pɑɑk, k biɑ diɑn n mɔnŋ sɑnpɑɑnn nɑ u pɑɑk. Yennu duo mɑnŋ e tie Selusɑɑlenm pɑɑnn nbɑ sɑɑ nyi *Yendɔunŋ ni Yennu buol ni nɑ, k tɑn sik tinŋ nɑ ni.› »

¹³«Wun nbɑ mɔk tubɑ, wun gbiint lin nbɑ k Foŋɑnm nɑ yien k tien jiɑnti nɑ.»

¹⁴«Diɑnt k tul Lɑodiise jɑɑnti mɑlɑkɑ ɑ: ‹Lɑbɑɑl nɑ nyii wun nbɑ sɑnn yi * Amenn nɑ buol e, k u tie bɑlmɔni siɑlɑɑdɑɑnɔ k ɑ fit tien u mɑɑn nɑ yɑdɑ. Ŋuɑ e tie Yennu nɑɑmi nɑ kul ɑ yudɑɑnɔ:

¹⁵N mi ɑ tuonɑ po. A k mei, k biɑ k ton. N bo sii luon k fii tie l yenn e.

¹⁶L pɑɑk, fɑɑ k ton k biɑ k mei nɑ, n sɑɑ siil’ɑ n mɔb ni.

¹⁷A yien ɑ, ɑ tie mɔktɔ e k mɔk lin nbɑ kul k ɑ luon, ɑ k siɑl kɑn pɔt’ɑ ni. Ŋɑɑn ɑ k mi fɑɑ mɔk pɑlbiil nɑn ninbɑɑɔk biɑnŋ nbɑ. A tie nɑndɑɑnɔ e, k sonm yɑnn, k tie juɑnŋ.

¹⁸L pɑɑk, n kpɑɑn’ɑ e, bɑɑt n buol k dɑɑ sɑlmɑ nbɑ k b kuɑn muu ni k nyinn l jɑknt nɑ k set lɑ mɔktuk, k biɑ dɑɑ tɑpieni k dɔkn ɑ fei nɑ, k biɑ dɑɑ kpɑn k bɑnŋ ɑ ninbinɑ nɑ kii lɑɑt.

¹⁹Bin nbɑ kul k n luon’m nɑ, n kpɑɑn’m kpɑɑni k dɑɑl b tubɑ. L pɑɑk, ɑ dɑɑ jeln, ŋɑɑn mɔ kuɑŋɑɑn k lebt binbenŋ.

²⁰Nnɑlɑ, n sie tɑnmɔb nɑ ni k kpɑɑn gɑnn. Wun nbɑ gbɑt n kunkɔl k luot gɑnn mɑnŋ, n sɑɑ kuɑ, k min nɑn ŋuɑ sɑɑ lɑkn di.

²¹Wun nbɑ nyɑnn nyɑnnu nɑ, n sɑɑ tul’ɔ yiikuo k wun tɑn lɑkn kɑl nɑn’n n nɑɑngbounŋ nɑ pɑɑk nɑn mɑɑ nyɑnn nyɑnnu kul k lɑkn kɑl nɑn n Bɑɑ u nɑɑngbounŋ nɑ pɑɑk biɑnŋ nbɑ nɑ.’»

²²«Wun nbɑ mɔk tubɑ, wun gbiint lin nbɑ k Foŋɑnm nɑ yien k tien jiɑnti nɑ.»