Read ახალი ქართულით, Modern Georgian Bible, 1982 ეზეკიელ წინასწარმეტყველი 5 Bible Online

ეზეკიელ წინასწარმეტყველი 5 - ახალი ქართულით, Modern Georgian Bible, 1982 bible

ეზეკიელ წინასწარმეტყველი 5

¹ადამის ძევ! აიღე გალესილი მახვილი და დალაქთა სამართებელივით მოიტარე თავზე და წვერზე. აიღე სასწორი და გაჰყავი თმა.

²მესამედი ცეცხლში დაწვი ქალაქის შუაგულში, როცა ალყისდღეები შესრულდება. აიღე მესამედი და დააქუცმაცე მახვილით ქალაქის ირგვლივ.მესამედი ქარში გაფანტე და მე მახვილს ვიშიშვლებ მათ კვალზე.

³აიღე აქედან მცირეოდენი და კალთაში გამოიკარი.

⁴კიდევ აიღე მათგან, ჩაყარე ცეცხლში და დაწვი ცეცხლში.მისგან მოედება ცეცხლი ისრაელის მთელ სახლს.

⁵ასე ამბობს უფალი ღმერთი: ეს არის იერუსალიმი; ხალხებისშუაგულში დავსვი იგი და ქვეყნებია მის გარშემო.

⁶ეურჩა ჩემს წესებს წარმართებზე უფრო ბოროტად და ჩემსმცნებებს გარეშემო ქვეყნებზე უარესად, რადგან შეიძულეს ჩემი წესები და არგაჰყვნენ ჩემს მცნებებს.

⁷ამიტომ ასე ამბობს უფალი ღმერთი: რაკი თქვენს გარეშემოხალხებზე უფრო ბობოქრობთ, არ მიჰყვებით ჩემს მცნებებს და ჩემს წესებს არასრულებთ, არ ასრულებთ თქვენს გარეშემო ხალხების წესებსაც კი,

⁸ამიტომ, ასე ამბობს უფალი ღმერთი: აჰა, მე თავად წამოვალშენზე და აღვასრულებ შენს წიაღში სამართალს ხალხების თვალწინ.

⁹ისეთ რამეს გაგიკეთებ შენს სისაძაგლეთა გამო, რაცარასოდეს გამიკეთებია და რის მსგავსსაც არასოდეს გავაკეთებ.

¹⁰ამიტომ მამები შვილებს დაუწყებენ ჭამას თქვენ შორის და შვილები მამებს შეჭამენ. აღვასრულებ სამართალს თქვენზე და ყველა ქარის მიმართ გავფანტავ თქვენს ნატამალს.

¹¹ამიტომ, ცოცხალი ვარ! აცხადებს უფალი: იმის გამო, რომ გააუწმიდურეთ ჩემი საწმიდარი ყოველი თქვენი სისაძაგლით და ყოველი თქვენი სიბილწით, მეც გაგწყვეტ შენ. არ შეგიბრალებს ჩემი თვალი და მეც არ დაგინდობ.

¹²შენი მესამედი ჭირისგან დაიხოცება და შიმშილით გაწყდება შენ შორის; მესამედი მახვილით დაეცემა შენს გარშემო; მესამედს ყველა ქარის მიმართ გავფანტავ და მახვილს ვიშიშვლებ მათ კვალზე.

¹³ამოიწურება ჩემი რისხვა და დაცხრება ჩემი წყრომა მათდამი, და დავმშვიდდები; მაშინ მიხვდებიან, რომ მე, უფალი ვლაპარაკობდი შურით, როცა ამოვწურავ ჩემს წყრომას მათდამი.

¹⁴მიგცემ გასაოხრებლად და შესარცხვენად ხალხებში, შენს გარშემო რომ არიან, და ყოველი გამვლელის თვალში.

¹⁵იქნები შესარცხვენად და საკიცხველად, საარაკოდ და შესაზარად ხალხებისთვის, შენს გარშემო რომ არიან, როცა აღვასრულებ შენზე მსჯავრს რისხვით, წყრომით და სასტიკი სასჯელებით. მე, უფალი, ვლაპარაკობ ამას.

¹⁶როცა მოვავლენ თქვენზე შიმშილის ბოროტ ისრებს, რომლებიც დამღუპველი იქნება, რადგან თქვენს დასაღუპად მოვავლენ მათ, გავასასტიკებ თქვენზე შიმშილს და პურის კვერთხს გადაგიმტვრევთ.

¹⁷მოგივლენთ შიმშილს და სასტიკ მხეცებს და შვილმკვდარნი იქნებით; ჭირი და სისხლი ჩაივლის შენში და მახვილს მოვიღებ შენზე. მე, უფალი, ვლაპარაკობ ამას.