Read Modern Hebrew Bible, compilation from Westmister (OT) and Salkinson-Ginsburg (NT) אל גלטים 1 Bible Online

אל גלטים 1 - Modern Hebrew Bible, compilation from Westmister (OT) and Salkinson-Ginsburg (NT) bible

אל גלטים 1

¹פּוֹלוֹס שָׁלִיחַ שֻׁלַּח לֹא מֵאֵת אֲנָשִׁים וְלֹא עַל־פִּי אֲנָשִׁים כִּי אִם־עַל־פִּי יֵשׁוּעַ הַמָּשִׁיחַ וֵאלֹהִים אֲבִי־כֹל אֲשֶׁר הֲקִימוֹ מִן־הַמֵּתִים׃

²וְכָל־הָאַחִים אֲשֶׁר אִתִּי אֶל־קְהִלּוֹת גָּלַטְיָא׃

³חֶסֶד וְשָׁלוֹם יִתֵּן לָכֶם אֱלֹהִים אָבִינוּ וְיֵשׁוּעַ הַמָּשִׁיחַ אֲדֹנֵינוּ׃

⁴אֲשֶׁר־נָתַן אֶת־נַפְשׁוֹ לְכַפֵּר עַל־חַטֹּאתֵינוּ וּלְהַצִּילֵנוּ מִן־הָעוֹלָם הָרָע הַזֶּה כִּרְצוֹן אֱלֹהִים אָבִינוּ׃

⁵אֲשֶׁר־לוֹ הַכָּבוֹד לְעוֹלָם וָעֶד אָמֵן׃

⁶תִּמָּהוֹן אֲחָזַנִי כִּי־כֹה מְהֵרָה סַרְתֶּם מֵאַחֲרֵי הַקֹּרֵא אֶתְכֶם בְּחֶסֶד מְשִׁחֵנוּ וַתֵּלְכוּ אַחֲרֵי בְשׂרָה אַחֶרֶת׃

⁷וְהִיא אֵינֶנָּה בְשׂרָה אֲבָל יֵשׁ אֲנָשִׁים הָעֹכְרִים אֶתְכֶם וְהַמְבַקְשִׁים לִבְלֹל בְּשׂרַת הַמָּשִׁיחַ בָּלֹל וְהָפֹךְ עַל־פָּנֶיהָ׃

⁸אָכֵן אִם־גַּם אֲנַחְנוּ אוֹ־מַלְאָךְ מִן־הַשָּׁמַיִם יַשְׁמִיעֲכֶם בְּשׂרָה אַחֶרֶת אֲשֶׁר לֹא הִשְׁמַעֲנוּהָ יָחֳרָם׃

⁹כָּזֶה אָמַרְנוּ מֵאָז וְכֵן אֲנִי אֹמֵר עוֹד־הַפָּעַם וְאִם יַשְׁמִיעֲכֶם אִישׁ בְּשׂרָה מִבַּלְעֲדֵי זוּ אֲשֶׁר קִבַּלְתֶּם יָחֳרָם׃

¹⁰כִּי הַמְפַתֶּה אֲנָשִׁים אֲנִי עַתָּה אוֹ מְדַבֵּר דְּבָרַי לִפְנֵי אֱלֹהִים הַאִם לְהָפִיק רָצוֹן מִבְּנֵי אָדָם אֲנִי מְבַקֵּשׁ כִּי לוּ־בִּקַּשְׁתִּי לְהָפִיק רָצוֹן מִבְּנֵי אָדָם לֹא הָיִיתִי עֶבֶד לַמָּשִׁיחַ׃

¹¹וַאֲנִי מַגִּיד לָכֶם אֶחָי כִּי הַבְּשׂרָה אֲשֶׁר נוֹדְעָה לָכֶם מִפִּי לֹא מִמְּקוֹר אָדָם יָצָאָה׃

¹²כִּי גַּם־אָנֹכִי לֹא מִפִּי אָדָם קִבַּלְתִּיהָ וְלֹא הֹרַנִי בֶן־אֱנוֹשׁ כִּי אִם־בֶּחָזוֹן מֵאֵת יֵשׁוּעַ הַמָּשִׁיחַ׃

¹³כִּי הֲלֹא־שְׁמַעְתֶּם הֲלִיכוֹתַי לְפָנִים בַּדָּת הַיְּהוּדִית וְאֶת־עֲדַת אֱלֹהִים רָדַפְתִּי לְבַלַּע וּלְהַשְׁחִית׃

¹⁴וְהוֹסַפְתִּי דַעַת בְּדֵעוֹת הַיְּהוּדִית מֵרַבִּים בִּבְנֵי גִילִי בְּקֶרֶב עַמִּי וְקִנְאָה גְדוֹלָה קִנֵּאתִי לְקַבָּלַת אֲבוֹתָי׃

¹⁵אַךְ הָאֱלֹהִים אֲשֶׁר הִבְדִּילַנִי מִמְּעֵי אִמִּי וַאֲשֶׁר קְרָאַנִי בְּחַסְדּוֹ׃

¹⁶כַּאֲשֶׁר חָפֵץ לְגַלּוֹת לִי אֶת־בְּנוֹ לְבַשֵּׂר יְשׁוּעָתוֹ בַגּוֹיִם לֹא נוֹעַצְתִּי עִם־בָּשָׂר וָדָם אַף לֹא כְּרָגַע׃

¹⁷וְגַם לֹא־עָלִיתִי יְרוּשָׁלַיְמָה אֶל־הַשְּׁלִיחִים אֲשֶׁר קִדְּמוּנִי כִּי אִם־הָלַכְתִּי לַעֲרָב וּמִשָּׁם שַׁבְתִּי לְדַמָּשֶׂק׃

¹⁸וּמִקֵּץ שָׁלֹשׁ שָׁנִים עָלִיתִי אָז יְרוּשָׁלַיְמָה לִרְאוֹת אֶת־פֶּטְרוֹס וָאֵשֵׁב עִמּוֹ חֲמִשָּׁה עָשָׂר יוֹם׃

¹⁹וְלֹא־רָאִיתִי אִישׁ אַחֵר מִן־הַשְּׁלִיחִים זוּלָתִי יַעֲקֹב אֲחִי הָאָדוֹן׃

²⁰וְזֹאת אֲנִי כֹתֵב פֹּה נֶגֶד אֱלֹהִים וְלֹא אֲכַזֵּב׃

²¹וְאַחֲרֵי־כֵן בָּאתִי אֶל־גְּלִילוֹת אֲרָם וְקִילִקְיָא׃

²²אֲבָל קְהִלּוֹת הַמָּשִׁיחַ אֲשֶׁר בְּאֶרֶץ יְהוּדָה לֹא נוֹדַעְתִּי לָהֶם פָּנִים בְּפָנִים׃

²³אַךְ־זֹאת שָׁמְעוּ כִּי־זֶה הָאִישׁ אֲשֶׁר רְדָפָם מֵאָז מְבַשֵּׂר כַּיּוֹם בְּשׂרַת הָאֱמוּנָה אֲשֶׁר הִכְחִידָהּ מִקֶדֶם׃

²⁴וַיִּתְּנוּ כָבוֹד לֵאלֹהִים בִּגְלָלִי׃