Read Modern Hebrew Bible, compilation from Westmister (OT) and Salkinson-Ginsburg (NT) אל גלטים 2 Bible Online

אל גלטים 2 - Modern Hebrew Bible, compilation from Westmister (OT) and Salkinson-Ginsburg (NT) bible

אל גלטים 2

¹וּמִקֵּץ אַרְבַּע עֶשְׂרֵה שָׁנָה עָלִיתִי עוֹד יְרוּשָׁלַיְמָה עִם בַּר־נַבָּא וְגַם אֶת־טִיטוֹס לָקַחְתִּי עִמָּדִי׃

²וַאֲנִי עָלִיתִי שָׁמָּה כַּאֲשֶׁר צֻוֵּיתִי בֶחָזוֹן וְדִבְרֵי הַבְּשׂרָה כַּאֲשֶׁר קָרָאתִי בְקֶרֶב הַגּוֹיִם שַׂמְתִּי לִפְנֵיהֶם וְאַחֲרֵי־כֵן לִפְנֵי קְרִיאֵי הָעֵדָה לְבָד לְמַעַן לֹא יִהְיֶה לָרִיק אֲשֶׁר אָחִישׁ לַעֲשׂוֹת וַאֲשֶׁר חַשְׁתִּי מֵאָז׃

³וְגַם־טִיטוֹס אָשֶׁר עִמָּדִי כִּי־יְוָנִי הוּא לֹא נָטַל עָלָיו לְהִמּוֹל׃

⁴בַּעֲבוּר אֲחֵי שֶׁקֶר אֲשֶׁר הִתְגַּנְּבוּ וַיָּבֹאוּ לָתוּר אֶת־הַחֹפֶשׁ אָשֶׁר־לָנוּ בְּיֵשׁוּעַ הַמָּשִׁיחַ לְמַעַן הַעֲבִידֵנוּ׃

⁵וְלֹא־נִפְתָּה לִבֵּנוּ לְהִכָּנַע מִפְּנֵיהֶם אַף־לֹא כְרָגַע לְמַעַן יַעֲמֹד עִמָּכֶם קֹשְׁטְ הַבְּשׂרָה לְעוֹלָם׃

⁶וְלָאֵלֶּה הַמְסֻלָּאִים בְּעֶרְכָּם אִם עֶרְכָּם כֵּן אוֹ כֵן לֹא שַׂמְתִּי אֶת־לִבִּי אֱלֹהִים לֹא יִשָּׂא פְנֵי־אִישׁ וְהַמְסֻלָּאִים הַאֵלֶּה לֹא הוֹסִיפוּ לִי מְאוּמָה׃

⁷אַךְ לְהֶפֶךְ הֵם רָאוּ כִּי־פְקֻדָּה נִתְּנָה־לִּי לְבַשֵּׂר בְּקֶרֶב הָעֲרֵלִים כַּאֲשֶׁר נִתְּנָה לְפֶטְרוֹס לְבַשֵּׂר בְּקֶרֶב הַנִּמּוֹלִים׃

⁸כִּי־הַנֹּתֵן כֹּחַ לְפֶטְרוֹס לִהְיוֹת שָׁלוּחַ אֶל־הָנִּמּוֹלִים הוּא נָתַן לִי כֹּחַ לִהְיוֹת שָׁלוּחַ אֶל־הַגּוֹיִם׃

⁹וְכַאֲשֶׁר רָאוּ יַעֲקֹב וְכֵיפָא וְיוֹחָנָן הַנֶּחֱשָׁבִים לְעַמּוּדֵי הַקְּהִלָּה כִּי־חֶסֶד אֵל עָלָי נָתְנוּ לִי וּלְבַר־נַבָּא אֶת־יַד יְמִינָם לְאוֹת אַחֲוָה לֵאמֹר כִּי אֲנַחְנוּ נֵלֵךְ אֶל־הַגּוֹיִם וְהֵם אֶל־הַנִּמּוֹלִים׃

¹⁰אַךְ אִם־נִזְכֹּר אֶת־הָעֲנִיִּים אֲשֶׁר גַּם־שָׁקַדְתִּי לַעֲשׂוֹת כֵּן׃

¹¹אֲבָל בְּבֹא פֶּטְרוֹס לְאַנְטִיּוֹכְיָא הוֹכַחְתִּיו עַל־פָּנָיו כִּי נִמְצָא בוֹ דְּבַר אַשְׁמָה׃

¹²כִּי עַד־לֹא בָּאוּ אֲנָשִׁים מֵאֵת יַעֲקֹב אָכַל יַחְדָּו אֶת־הַגּוֹיִם אַךְ אַחֲרֵי בֹאָם נִבְדַּל מֵהֶם וַיִּפָּרֵד מִיִּרְאָתוֹ אֶת־הַנִּמּוֹלִים׃

¹³וְכֵן גַּם־שְׁאָר הַיְּהוּדִים הִתְכַּחֲשׁוּ עִמּוֹ עַד כִּי־גַם־בַּר־נַבָּא נִתְפַּשׂ בְּכַחֲשָׁם׃

¹⁴וַאֲנִי בִרְאֹתִי כִּי לֹא יֵלְכוּן נְכֹחָה לְפִי בְשׂרַת הָאֶמֱת אָמַרְתִּי אֶל־פֶּטְרוֹס לְעֵינֵי־כֹל אִם־אַתָּה הַיְּהוּדִי תֵּלֵךְ בְּדֶרֶךְ הַגּוֹיִם וְלֹא בְדֶרֶךְ הַיְּהוּדִים מַדּוּעַ זֶה תְּאַלֵּץ אֶת־הַגּוֹיִם לְהִתְיַהֵד׃

¹⁵הֵן מִזֶּרַע הַיְּהוּדִים נוֹלָדְנוּ וְלֹא מִזֶּרַע הַגּוֹיִם הַחַטָּאִים בְּנַפְשׁוֹתָם׃

¹⁶וְאַחֲרֵי אֲשֶׁר יָדַעְנוּ כִּי לֹא־יִצְדַּק אִישׁ בְּחֻקּוֹת הַתּוֹרָה כִּי אִם־בֶּאֱמוּנַת יֵשׁוּעַ הַמָּשִׁיחַ גַּם־אֲנַחְנוּ בָאנוּ לְהַאֲמִין בְּיֵשׁוּעַ הַמָּשִׁיחַ לְמַעַן נִצְדַּק בֶּאֱמוּנַת הַמָּשִׁיחַ וְלֹא בְחֻקּוֹת הַתּוֹרָה כִּי בְחֻקּוֹת הַתּוֹרָה לֹא יִצְדַּק כָּל־בָּשָׁר׃

¹⁷וְעַתָּה כִּי נְבַקֵּשׁ צִדְקָתֵנוּ בַּמָּשִׁיחַ וּבְכָל־זֹאת עָוֹן יִמָּצֵא בָנוּ הֲיִהְיֶה הַמָשִׁיחַ כֹּהֵן לֶעָוֹן חָלִילָה׃

¹⁸כִּי אִם־אָשׁוּב וְאֶבְנֶה אֶת־אֲשֶׁר הָרָסְתִּי הִנְנִי מֵעִיד בְּנַפְשִׁי כִּי פֹשֵׁעַ אָנִי׃

¹⁹כִּי־כַּמֵּת נֶחֱשַׁבְתִּי לַתּוֹרָה עַל־פִּי הַתּוֹרָה לְמַעַן אֶחְיֶה לֵאלֹהִים׃

²⁰הִנְנִי צָלוּב עִם־הַמָּשִׁיחַ וְחַי אָנֹכִי אַךְ לֹא־אָנֹכִי כִּי אִם־הַמָּשִׁיחַ חַי בִּי וְרוּחַ הַחַיִּים אֲשֶׁר בִּבְשָׂרִי כַּיּוֹם קָנִיתִי בֶאֱמוּנָתִי בְּבֶן־הָאֱלֹהִים אֲשֶׁר אָהַב אֹתִי וַיִּתֵּן אֶת־נַפְשׁוֹ כָּפְרִי׃

²¹לֹא אֶעֱשֶׂה אֶת־חֶסֶד הָאֱלֹהִים לְאָיִן כִּי אִם־תִמָּצֵא צְדָקָה עַל־יְדֵי הַתּוֹרָה אָז הַמָּשִׁיחַ מֵת חִנָּם׃