Read Modern Hebrew Bible, compilation from Westmister (OT) and Salkinson-Ginsburg (NT) אל הקולוסים 3 Bible Online

אל הקולוסים 3 - Modern Hebrew Bible, compilation from Westmister (OT) and Salkinson-Ginsburg (NT) bible

אל הקולוסים 3

¹וְעַתָּה אִם־קַמְתֶּם עִם־הַמָּשִׁיחַ בַּקְּשׁוּ אֵת אֲשֶׁר לְמָעְלָה אֲשֶׁר שָׁם הַמָּשִׁיחַ יֹשֵׁב לִימִין אֱלֹהִים׃

²שִׂימוּ לִבְּכֶם לַאֲשֶׁר מֵעָל וְלֹא לַאֲשֶׁר בָּאָרֶץ׃

³כִּי־מֵתִים אַתֶּם וְחַיֵּיכֶם צְפוּנִים עִם־הַמָּשִׁיחַ בֵּאלֹהִים׃

⁴וְכַאֲשֶׁר יוֹפִיעַ הַמָּשִׁיחַ אֲשֶׁר הוּא חַיֵּינוּ אָז גַּם־אַתֶּם תּוֹפִיעוּ עִמּוֹ בִּכְבוֹדוֹ׃

⁵עַל־כֵּן הַכְחִידוּ כְּלֵי תַאֲוַתְכֶם בָּאָרֶץ זְנוּנִים שִׁקּוּצִים וּתְשׁוּקוֹת זָרוֹת יֵצֶר רָע וְאַהֲבַת בֶּצַע אֲשֶׁר דָּמְתָה לַעֲבֹדַת אֱלִילִים׃

⁶כִּי בִגְלַל אֵלֶּה שְׁפוּכָה חֲמַת אֱלֹהִים עַל־בְּנֵי הַמֶּרִי׃

⁷וְגַם־אַתֶּם לְפָנִים כַּאֲשֶׁר יְשַׁבְתֶּם בְּתוֹכָם כֵּן הֲלַכְתֶּם בְּדַרְכֵיהֶם׃

⁸אַךְ־עַתָּה הָסִירוּ כָל־אֵלֶּה מֵעֲלֵיכֶם גַּם־אַתֶּם זַעַף וְעֶבְרָה וְרִשְׁעָה וַחֲרָפוֹת וְדִבְרֵי נְבָלָה מִפִּיכֶם׃

⁹אַל־תְּשַׁקְּרוּ אִישׁ בַּעֲמִיתוֹ אַחֲרֵי אֲשֶׁר פְּשַׁטְתֶּם אֶת־הָאָדָם הַקַּדְמֹנִי עִם־פְּעָלָיו׃

¹⁰וּלְבַשְׁתֶּם אֶת־הָאָדָם הֶחָדָשׁ הוּא אֲשֶׁר הִתְחַדֵּשׁ בְּדַעַת כְּצֶלֶם יֹצְרוֹ׃

¹¹אֲשֶׁר אֵין־בּוֹ יְוָנִי אוֹ יְהוּדִי נִמּוֹל אוֹ עָרֵל נִלְעַג לָשׁוֹן פֶּרֶא אָדָם עֶבֶד אוֹ בֶן־חוֹרִים כִּי הַכֹּל וּבַכֹּל הוּא הַמָּשִׁיחַ׃

¹²וְאַתֶּם כִּבְחִירֵי הָאֱלֹהִים כִּקְדֹשָׁיו וִידִידָיו לִבְשׁוּ רַחֲמִים וַחֲסָדִים מִמְּקוֹר לִבְּכֶם רוּחַ שְׁפָלָה עֲנָוָה וְאֹרֶךְ אַפָּיִם׃

¹³לָשֵׂאת אִישׁ אֶת־פְּנֵי רֵעֵהוּ וְלִסְלֹחַ לוֹ לִדְבַר רִיב כִּי־יִמָּצֵא בֵינֵיכֶם וּכְמוֹ הַמָּשִׁיחַ סָלַח לָכֶם כֵּן תִּסְלְחוּ גַּם־אַתֶּם׃

¹⁴וְעַל־כָּל־אֵלֶּה לִבְשׁוּ אַהֲבָה אֲשֶׁר הִיא אֲגֻדַּת הַתְּמִימִים׃

¹⁵וּשְׁלוֹם הָאֱלֹהִים אֲשֶׁר־נִבְחַרְתֶּם לוֹ בְּגוּף אֶחָד יִמְשֹׁל בְּקֶרֶב לִבְּכֶם וְאֶת־טוּבוֹ תַּכִּירוּ׃

¹⁶וְתוֹרַת הַמָּשִׁיחַ תִּהְיֶה בְפִיכֶם תָּמִיד בְּכָל־חָכְמָה לְלַמֵּד וּלְעוֹרֵר אִישׁ אֶת־אָחִיהוּ בִּתְהִלּוֹת וְשִׁירוֹת וְזִמְרוֹת־יָהּ וּמִקֶּרֶב לִבְּכֶם תָּשִׁירוּ לֵאלֹהִים בְּתוֹדָה׃

¹⁷וְכֹל אֲשֶׁר־תַּעֲשׂוּ גַּם־בִּדְבַר שְׂפָתַיִם גַּם־בְּמַעֲשֵׂה יָדָיִם עָשׂוּ כֹל בְּשֵׁם יֵשׁוּעַ אֲדֹנֵינוּ וּלְהֹדוֹת עַל־יָדוֹ לֵאלֹהִים אָבִינוּ׃

¹⁸וְאַתֵּנָה נָשִׁים הִכָּנַעְנָה לְבַעֲלֵיכֶן כַּמִּשְׁפָּט לִפְנֵי אֲדֹנֵינוּ׃

¹⁹בַּעֲלֵי אִשָּׁה אֶהֱבוּ אֶת־נְשֵׁיכֶם וְלֹא תִהְיוּ לָהֶן לְמֹרַת רוּחַ׃

²⁰שִׁמְעוּ בָנִים אֶל־יֹלְדֵיכֶם לְכֹל אֲשֶׁר יֹאמֵרוּן כִּי לְרָצוֹן הוּא לַאֲדֹנֵנוּ׃

²¹אָבוֹת אַל־תַּכְעִיסוּ אֶת־בְּנֵיכֶם פֶּן־יֹאמְרוּ נוֹאָשׁ׃

²²וְאַתֶּם עֲבָדִים שִׁמְעוּ אֶל־אֲדֹנֵיכֶם אֲדֹנֵי הַבָּשָׂר לְכֹל אֲשֶׁר יֹאמֵרוּן וְלֹא בַעֲבֹדָה לְמַרְאֵה עֵינַיִם לְהָפִיק רָצוֹן מִבְּנֵי אָדָם כִּי אִם־בְּתָם־לֵב כְּיִרְאֵי יְהוָֹה׃

²³וְכֹל אֲשֶׁר תַּעֲשׂוּ עֲשׂוּ בְכָל־נַפְשְׁכֶם כְּמוֹ לַיהוָֹה וְלֹא לִבְנֵי־אָדָם׃

²⁴הֵן יְדַעְתֶּם כִּי מֵאֵת יְהוָֹה תִּקְחוּ שְׂכַרְכֶם וְנַחֲלַתְכֶם כִּי אֶת־אֲדֹנֵינוּ הַמָּשִׁיחַ אַתֶּם עֹבְדִים׃

²⁵כִּי הַמְעַוֵּל יִקְצָר־עָוֶל כַּאֲשֶׁר עָשָׂה וְאֵין מַשּׂוֹא פָנִים׃