Read Modern Hebrew Bible, compilation from Westmister (OT) and Salkinson-Ginsburg (NT) ההתגלות 9 Bible Online

ההתגלות 9 - Modern Hebrew Bible, compilation from Westmister (OT) and Salkinson-Ginsburg (NT) bible

ההתגלות 9

¹וַיִּתְקַע הַמַּלְאָךְ הַחֲמִישִׁי וָאֵרֶא כוֹכָב נֹפֵל מִן־הַשָּׁמַיִם אַרְצָה וַיִּנָּתֶן־לוֹ מַפְתֵּחַ לִבְאֵר הַתְּהוֹם׃

²וַיִּפְתַּח אֶת־בְּאֵר הַתְּהוֹם וַיַּעַל קִיטֹר מִן־הַבְּאֵר כְּקִיטֹר הַכִּבְשָׁן רַב־מְאֹד וַתֶּחְשַׁךְ הַשֶּׁמֶשׁ וּפְנֵי הַשָּׁמַיִם מִקִּיטֹר הַבְּאֵר׃

³וּמִתּוֹךְ הַקִּיטֹר יָצָא אַרְבֶּה עַל־הָאָרֶץ וְכֹחַ נִתַּן לָהֶם כְּכֹחַ הָעַקְרַבִּים בָּאָרֶץ׃

⁴וְהֵם צֻוּוּ לְבִלְתִּי שַׁחֵת אֶת־עֵשֶׂב הָאָרֶץ וְלֹא אֶת־הַיָּרָק וְלֹא אֶת־עֵץ הַשָּׂדֶה כִּי אִם־אֶת־הָאֲנָשִׁים לְבַדָּם אֲשֶׁר אֵין־לָהֶם חוֹתַם אֱלֹהִים עַל־הַמֶּצַח׃

⁵וְלֹא נִתַּן לָהֶם לַהֲמִיתָם כִּי אִם־רַק לְעַנֹּתָם חֲמִשָּׁה חֳדָשִׁים בְּמַכְאוֹב קָשֶׁה כְּמַכְאוֹב אָדָם אֲשֶׁר הָעַקְרָב יַכֶּנּוּ׃

⁶בַּיָּמִים הָהֵם יְבַקְשׁוּ בְנֵי־הָאָדָם אֶת־הַמָּוֶת וְלֹא יִמְצָאֻהוּ יִשְׁאֲלוּ אֶת־נַפְשָׁם לָמוּת וְהַמָּוֶת יִבְרַח מֵהֶם׃

⁷וּמַרְאֵה הָאַרְבֶּה כְּמַרְאֵה סוּסִים עֲרוּכִים לְמִלְחָמָה וְעַל־רָאשֵׁיהֶם כְּעַטְרוֹת זָהָב וְכִפְנֵי אֲנָשִׁים פְּנֵיהֶם׃

⁸וְשֵׂעָר לָהֶם כִּשְׂעַר נָשִׁים וְשִׁנֵּיהֶם שִׁנֵּי אֲרָיוֹת׃

⁹וַעֲלֵיהֶם שִׁרְיֹנִים כְּשִׁרְיֹנֵי בַרְזֶל וְקוֹל כַּנְפֵיהֶם כְּקוֹל מַרְכְּבוֹת הֲמוֹן סוּסִים אֲשֶׁר יְרֻצוּן לַקְּרָב׃

¹⁰וּזְנָבוֹת לָהֶם כְּמוֹ עַקְרַבִּים וּבְזַנְבוֹתָם דָּרְבֹנוֹת אֲשֶׁר אוֹנָם בָּם לְעַנּוֹת אֶת־בְּנֵי אָדָם חֲמִשָּׁה חֳדָשִׁים׃

¹¹וַעֲלֵיהֶם מֶלֶךְ הוּא מַלְאַךְ הַתְּהוֹם אֲשֶׁר שְׁמוֹ בִּשְׂפַת עֵבֶר אֲבַדּוֹן וְהַיְּוָנִים יִקְרְאוּ־לוֹ אַפּוֹלְיוֹן׃

¹²נְהִי אֶחָד חָלַף הָלַךְ־לוֹ וּנְהִי שֵׁנִי שְׁלִישִׁי הִנָּם בָּאִים׃

¹³וַיִּתְקַע הַמַּלְאָךְ הַשִּׁשִּׁי וָאֶשְׁמַע קוֹל קֹרֵא מִבֵּין קַרְנוֹת מִזְבַּח הַזָּהָב אֲשֶׁר לִפְנֵי אֱלֹהִים׃

¹⁴אֶל־הַמַּלְאָךְ הַשִּׁשִּׁי אֲשֶׁר הַשּׁוֹפָר בְּיָדוֹ לֵאמֹר הַתֵּר אֶת־אַרְבָּעָה הַמַּלְאָכִים הָאֲסוּרִים עַל־הַנָּהָר הַגָּדוֹל נְהַר־פְּרָת׃

¹⁵וְאַרְבָּעָה הַמַּלְאָכִים הֻתָּרוּ אֲשֶׁר עֲרוּכִים הָיוּ לַשָּׁעָה וְלַיּוֹם וְלַחֹדֶשׁ וְלַשָּׁנָה לְהָמִית אֶת־הַשְּׁלִישִׁית מִן־בְּנֵי הָאָדָם׃

¹⁶וּמִסְפַּר צִבְאוֹת הַפָּרָשִׁים עָלָה לִשְׁתֵּי רִבֹּאוֹת רְבָבוֹת כִּי־כֵן שָׁמַעְתִּי מִסְפָּרָם׃

¹⁷וְכֵן רָאִיתִי בֶחָזוֹן אֶת־הַסּוּסִים וְאֶת־רֹכְבֵיהֶם אֲשֶׁר שִׁרְיֹנֵיהֶם כְּמַרְאֵה אֵשׁ תְּכֵלֶת וְגָפְרִית וְרָאשֵׁי הַסּוּסִים כְּרָאשֵׁי אֲרָיוֹת וּמִפִּיהֶם עָלְתָה אֵשׁ עָשָׁן וְגָפְרִית׃

¹⁸בָּשָׁלשׁ מַגֵּפוֹת אֵלֶּה בָּאֵשׁ בֶּעָשָׁן וּבַגָּפְרִית הָעֹלוֹת מִפִּיהֶם הֻכָּה חֵלֶק שְׁלִישִׁי מִן־בְּנֵי הָאָדָם׃

¹⁹כִּי־כֹחַ הַסּוּסִים בְּמוֹ־פִיהֶם וּבְזַנְבוֹתָם כִּי זַנְבוֹתָם כִּנְחָשִׁים הֵם וְרָאשִׁים לָהֶם אֲשֶׁר בָּם הֵם מְחַבְּלִים׃

²⁰וּשְׁאָר בְּנֵי הָאָדָם אֲשֶׁר לֹא מֵתוּ בַּמַּגֵּפוֹת הָאֵלֶּה לֹא־שָׁבוּ מִמַּעֲשֵׂי יְדֵיהֶם מֵהִשְׁתַּחֲוֹת עוֹד לַשֵּׁדִים וְלַעֲצַבֵּי זָהָב וָכֶסֶף וּנְחשֶׁת וְאֶבֶן וָעֵץ אֲשֶׁר לֹא־יִרְאוּן וְלֹא־יִשְׁמְעוּן וְלֹא יְהַלֵּכוּן׃

²¹וְגַם לֹא־שָׁבוּ מֵרֶצַח וּמִכְּשָׁפִים וּמִזְּנוּת וּמִגְּנֵבָה אֲשֶׁר בִּידֵיהֶם׃