Read Mofa New Testament Matthew 26 Bible Online

Matthew 26 - Mofa New Testament bible

Matthew 26

¹Aman Yèsu a n'ndeva ma nenga'a haha tèlèba, a ngaƋa ta golahi nenga'a:

²Kin suna, njèkè m'mèn cèw, ta da gi ngolala Pâque, a ta da gshè Kra-ndo a kita, aman ta da gézlèlè'a.

³Te deɓa'a ndohi mvi skwi a Zhiklè mbibihia'a, a malamhai, a ndohi nhala'a ta ɓeceda va a gala Bi ndohi mvi skwi a Zhiklè, nzlembaƌ na Caiphe,

⁴a ta tsomma, aman ta gshè Yèsu, a maya ncèkèlma, a ta kèƌè'a.

⁵Aman ta gaƌa: Te ngolala ka ɓai, man ɓai ndohi ta da rubai.

⁶Aman Yèsu a zhè te Béthanie, te gi Simon, ndo hutsoƋ,

⁷ngwoz ngiƋè a mshkè a sam na, a koloba ɓurdi te rai, nshum nenga'a a vata. Aman Yèsu a ndi skwai, ngwoz a mbaƋa na burdi a gèƋ.

⁸Aman golahi Yèsu ta rka'a, ta gu ndav, a ta gaƋa: A gedasse te pa me?

⁹Dara man ta preda ma a suli kumba, a ta va ta ndohi ntawassa'a.

¹⁰Aman Yèsu a suna, a ngaƋa ta: Kin pra na zlau a va ngwoz haha èhèmè? A ngau skwi man amba a sam ga.

¹¹Ndohi ntawassa'a ta zhè a sam kinè pèc pècèk; aman iyè, i nzi a sam kinè pèc pècèk azɓai.

¹²Nenga'a a mbaƋa burdi a va ga, aman a tilay va ga, ga i metsi ga.

¹³A vava i gaƌa kinè: T'herkeda tèlèba, man ta da njè ta ma mbela'a, ta da gèƋè skwi man ngwoz haha a gau, a ta da hérè'a.

¹⁴Judas Iscariot, staƋ te va 12, a mdo a sam ndohi mvi skwi a Zhiklè mbibihia'a,

¹⁵a ngaƌa: Aman i va kinè Yèsu a ri a kinè, kin da vay mè? A tenga'a ta ngra na gurso 30.

¹⁶Te deɓa'a a hüno man a nwoy maya, aman a nga na ri a gèƌ.

¹⁷A pats nshèlèkura'a man ta ndi movar man skwi nshégèrè a te di ɓai, golahi Yèsu ta shkè a sam Yèsu, a ta gaƋa na: Ka woya aman nga da tila ka skwi n'ndi Pâque a ka ndia'a tema?

¹⁸Yèsu a ngaƋa ta: Vodo a kokwar mbia'a, vagaƋa na zana te pa: Ndo njèngè ma a gaƌa: País ga ndul ndul ma. Nga a golahi ga, nga ndi tambak Pâque a sam ngaya.

¹⁹A golahi Yèsu ta gu ara man Yèsu a gaƋa ta, a ta tila skwi n'ndi Pâque.

²⁰A dakwaƋ man pats nkala ma, Yèsu a n'nza hai a ndi skwai a nda golahi 12.

²¹Aman ta ndi skwi n'ndai, a ngaƋa ta: A vava i gaƋa kinè: StaƋ te ndev kinè a da gay ri a gèƌ.

²²Tenga'a ta kuƌi te ndav ta, a ta hüno, staƌ staƌ a ndzhoƌo: Bai, i dè?

²³A nenga'a a m'mbeƋa ta a ma: Nenga'a man nga tèr ri a gandaf a vna, nenga'a a nda gay ri a gèƌ.

²⁴Kra-ndo a dè na ara man ta windo te ƌèlèwèr Zhiklè a géƋ nenga'a; aman woba ndo man a ga na ri a gèƋ a Kra-ndo. Dara man da yoko ɓai.

²⁵A Judas man a nga na ri a gèƋ, a m'mbeƋa na a ma Yèsu: I Ƌè, Rabbi? A Yèsu a ngaƋa na: Ara ngèƋ ngaya!

²⁶Aman ta ndi skwai, Yèsu a nco movar, te deɓ man a mpshè na ma, a ntsaka'a, a mva ta golahi nenga'a, a ngaƋa: Voco, vandau, na haha va ga!

²⁷Te deɓa'a a nco kokwai, te deɓ nshid gèƋ, a mva ta, a ngaƋa: Vasau tèlèba te pa!

²⁸Aman na haha pombaz ga, pombaz nderzlèma, man mbaƋahai, a mprè mali ndohi kumba.

²⁹I gaƋa kinè, anai i si barassa te deɓ anta asaɓai, ha pats man i da sia'a mɓua'a a nda kinè te kokwar-Bi Bab ga.

³⁰Te deɓa'a aman ta slu dimèsh psaume Zhiklè ma, to do ta, a za oliviers.

³¹Yèsu a ngaƋa ta: A vaƋ haha, kin da jèkyè tèlèba; aman ta windo te ƌèlèwèr Zhiklè: I keƌa ndo mɓer skwai, a tambakihi a ta ngezl ta.

³²Aman i slambaƋkaƋauda te m'metsi ma, i dè a ma kinè a kokwar Galilée.

³³A Pierre a m'mbeƋa na a ma: Aman tèlèba ta jèke ka a pa, iyè, i jèke ka a pa azɓai.

³⁴Yèsu a ngaƌa na: A vava, i gaƌa ka, a vaƋ haha, ga ngarah a tsi da'ai, ka cèkèlma a géƋ ga sak makar.

³⁵Pierre a ngaƋa na: Ko i metsi ga a va ka, i cèkèlma a géƋ ngaya azɓai. A golahi tèlèba ta goƋ arsa.

³⁶Te deɓa'a Yèsu a mshkè a nda golahi na a sam man ta baba na Gethsémané. Yèsu a ngaƋa ta: Vanza hai, ha i dè a i tsi ri ahngata.

³⁷A nco Pierre a wudahi Zèbédèe cèw a nda nenga'a, a hüno man a nkuƌi te ndav na, ndav nenga'a a mbeƌè.

³⁸A ngaƋa ta: Ndav ga a mbeƋè, nlèyè a keƋyè a hi a vèvèƋ. Vanza a haha, vanza a dai a nda iyè!

³⁹Te deɓa'a a nco sak a ma kètè, a ntseda medi a hai, a ntsu rai, a ngaƋa: Bab ga, aman ara man a gai, kokwi haha do do auda a sam ga; aman ara man iyè a nwoya ka ɓai, aman ara man ka, ka woya'a.

⁴⁰A Yèsu a mshkè a deɓa a sam golahi nenga'a, a n'ngats ta, ta nzhuna. A ngaƋa na Pierre: Ka slaha ka nzi a dai a nda iyè kèshkata azɓi Ƌè?

⁴¹Vanza a dai, vatsu rai, aman skwa da pe kinè a wi ɓai. Mèzhèɓ a woya a ngi amba, aman wuƋi ndo azɓai.

⁴²A va za'a, macecèwa'a, a ndo a ntsu rai, a ngaƋa: Bab ga, aman kokwi haha a slaha a ndè auda a sam ga azɓai, sèi i sia'a, da gu ara man ka woya'a.

⁴³Aman a mshkè a deɓa za'a, a n'ngats ta, ta nzhuna.

⁴⁴A njèke ta, a ndo za'a, a ntsu ri mamakara'a, a ngoƌ lèmèlèmè.

⁴⁵Te deɓa'a a mshkè a sam golahi nenga'a, a ngaƋa ta: Antanta vanzhun ma! Vasok va! Na haha, tiƋè sama ma, a ta va na Kra-ndo a ri a ndohi malihai.

⁴⁶VaslambaƋa, ngodokoya, na haha, nenga'a man a gay ri a gèƋ a herdeka nga va.

⁴⁷Aman a gèƋè dai, na haha Judas a mshkè, staƋ te va 12, a ndohi rèdèdèa a nda nenga'a, a ka fahi gwèsh a géƌ gaƋa, ara man ndohi mvi skwi a Zhiklé mbibihia'a, a ndohi nhala'a, ta zlinde ta.

⁴⁸Ndo n'nga na ri a gèƌ a Yèsu, a ngaƌa ta ar haha, aman ta shinè te pa: Nenga'a man i da kelawa na ri a da'ai, vogso!

⁴⁹Tsam-tsam a mshkè a sam Yèsu, a ngaƌa: Mbalai, Rabbi! A nkelawa na ri a da'ai.

⁵⁰Yèsu a ngaƌa na: Masli ga, gu skwi man ka shkè a géƌè'a. Te deɓa'a ta shkè, a ta faha ri a Yèsu, a ta gso.

⁵¹Na haha, staƋ te va tenga'a man ta zhè a nda Yèsu, a ngeda rai, a mpho kafahi gwèsh, a ntsau ɓèl bi ndohi mvi skwi a Zhiklè, a ntsahama na zlembaƋ auda a va.

⁵²A Yèsu a ngaƋa na: Ciɓda gwèsh a gi na! Aman ndohi tèlèba man ta phè gwèsh auda, ta da metsi te ri gwèsh.

⁵³Ka hur antanta ba i slaha a i tsi ri a bab ga azɓi Ƌè, aman a zlindkoƋi golahi a fena gozhèm 12 a sam ga?

⁵⁴Ɗèlèwèr Zhiklè a da ndikè a pa kè? Sèi a gi arsa!

⁵⁵A pats nasa Yèsu a ngaƌa ta ndohi rèdèdèa: Kin shkè ara man kin shkè a sam ndo metsar, a kafahi gwesh a géƌ gaƋa, aman a kin gsyè Ƌè? Pèc pècèk i nza a sam kinè te gi Zhiklè, a i senda kinè, kin gsyè ɓai.

⁵⁶Aman skwi haha tèlèba a gi arsa, ara man Ƌèlèwèr ndohi nhadka ma Zhiklè a gaƋa. A golahi nenga'a ta jèkeda a pa tèlèba, a ta hu ta.

⁵⁷A ndohi man ta gso Yèsu, ta da'a a sam Caiphe, bi ndohi mvi skwi a Zhiklè, a sam man malamhai a ndohi nhala'a ta ɓica va.

⁵⁸A Pierre a ndzodzor te deɓa dra, ha a ndè a gala bi ndohi mvi skwi a Zhiklè, a n'nzahai a sam ndohi mizlinè, a woya a nrka kita man ta da ngela na a gèƋ.

⁵⁹A ndohi mvi skwi a Zhiklè mbibihia'a, a ndohi ncèmma tèlèba ta woy malwuƌi ncèkèlma a géƌ Yèsu, aman ta woy a ta kèƌè'a.

⁶⁰Aman ta ngatsa ɓai, ko ndohi malwuƋihi ncèkèlma kumba ta shkè, a ta tsokol ma a géƋ nenga'a. Te deɓa'a ndohi malwuƋihi ncèkèlma cèw ta shkè, a ta gaƋa:

⁶¹Ndo haha a gaƌa: I slaha man i mbèƌda gi Zhiklè aussa, a i rèm ngiƋè te m'mèn makar.

⁶²A bi ndohi mvi skwi a Zhiklè a nslambaƋa, a ngaƋa na Yèsu: Ndohi haha ta gi ma a géƋ ngaya, ka mbeƋi a pa azɓi Ƌè?

⁶³Aman Yèsu a n'nza tètè. A bi ndohi mvi skwi a Zhiklè a ngaƋa na: I mbaƋa ka a nzlembaƋ Bi Zhiklè a nshèffè, sèi ka ngra nga, aman ka Kristi, kra Zhiklè!

⁶⁴A Yèsu a ngaƋa na: Ara ngèƋ ngaya! Aman i gaƋa kinè: Anai kin da rka Kra-ndo a nzi te ri mandi Zhiklè, a da shkè te va vanai te zhiklè.

⁶⁵A bi ndohi mvi skwi a Zhiklè a nkuratsa maslaka nenga'a, a ngaƋa: A derƋe Zhiklè! Kos nga woy ma malwuƋi ngiƋè za Ƌè? Antanta kin tsena'a ara man a derƋi Zhiklè.

⁶⁶Kin hur kè? A ta mbèƌa na a ma: M'metsi mènè!

⁶⁷Te deɓa'a ta njfa na slèslèɓ a dai, ta dutso, matrhia'a ta tsama na bazlazlam,

⁶⁸a ta gaƋa: Kristi, ngreda nga, ntse ka wa?

⁶⁹Pierre a n'nzat'uda te gala. A dem mizlinè a mshkè a sam na, a ngaƋa: Ka ba, kin nza a nda Yèsu, ndo Galilée!

⁷⁰A Pierre a ntsokol ma a sam di ndohi tèlèba, a ngaƋa: I sun skwi man ka gèƋè ɓai.

⁷¹Aman a ndo auda a ntamagai, dem mizlinè ngiƋè a nrka'a, a ngaƋa ta tengahi man ta zhè: Nenga'a ba a n'nza a nda Yèsu, ndo Nazareth.

⁷²A Pierre a tsokol ma za'a a mbèƋè: I sun ndo haha ɓai!

⁷³Te deɓa kètè ndohi man ta zlatsa a pa ta shkè, a ta gaƋa na Pierre: A vava ka ba, ka staƋ te va ndohi nenga'a; aman da'ai ngaya ara tenga'a.

⁷⁴Te deɓa'a a hüno man a mbèƋè a géƋ va na: I sun ndo haha ɓai! A nasa nasa ngarah a ntsu da'ai.

⁷⁵A Pierre a nhur ma Yèsu, ara man a gaƋa na: Ga ngarah a tsi da'ai, ka cèkèlma a géƋ ga, sak makar. A mdo auda, a nkuƋau a vata.