Read Mofa New Testament John 4 Bible Online

John 4 - Mofa New Testament bible

John 4

¹Aman Bai Yèsu a suna, ndohi pharisie ta gaƋa, golahi Yèsu ta zhè a vata, a n'nga ta baptême, a fena man a Jean.

²Yèsu a ri na a n'nga baptême a ndo ɓai, sèi golahi nenga'a.

³A Yèsu a njèkeda kokwar Judée, a m'men na a deɓa a kokwar Galilée.

⁴CivèƋè'a a mbezda a ndev kokwar Samarie.

⁵A mshkè a kokwar ngiƋè, nzlembaƋ na Sychar, te Samarie, ndul ndul a sam gi dau, man Jacob a va na Joseph, kra na.

⁶Thal iyam Jacob a zhè. A Yèsu a n'ngeza a nshèwèlè, a n'nza a ma thal iyam, a géƋ pats.

⁷A ngwoz ngiƋè a mshkè te kokwar Samarie, a mɓèl iyam. A Yèsu a ngaƋa na: Ɓedzay iyam, a i sia'a!

⁸Golahi nenga'a ta kal ta a kokwar, a ta da shum skwi n'ndai.

⁹A ngwoz Samarie a ngaƋa na: Ka dzhoƋo iyam te ri ga èhèmè? Ka ndo Juif, iyè, i ngwoz Samarie? (ndohi Juif ta humƋè a ndohi Samarie azɓai).

¹⁰A Yèsu a m'mbeƋa na a ma: Aman agassa ka sun skwi man Zhiklè a vi a ndohai, a ka sun nenga'a man a gaƋa ka: Ɓedzay iyam a i sia'a, ar ka jhèƋè nenga'a, a nenga'a a nva ka iyam nshèffè.

¹¹A ngwoz a ngaƋa na: Bai, skwi man a ka kèl iyam a vna, azɓai; thal iyam nra a vata. Ka ngècè iyam nshèffè tema?

¹²Ka fena Jacob, bab nga, man a va nga thal iyam haha Ƌè? Nenga'a a wudahi nenga'a, a skwi nenga'a, ta sau te pa.

¹³A Yèsu a m'mbeƋa na a ma: Ndo man a si iyam haha, iyam a da dza na te deɓa'a za'a.

¹⁴Aman ndo man a si iyam man i va na, iyam a da dza na te deɓa'a asaɓai a mèƋèp. Aman iyam man i via'a, a da gi te ndav nenga'a ara nlèlè iyam nshèffè man ahi a mèƋèp.

¹⁵A ngwoz a ngaƋa na: Bai, vay iyama'a, aman iyam a da dzayè te deɓa'a asaɓai, a i shkè a deɓa asaɓai, aman i da ɓéj iyam.

¹⁶A Yesu a ngaƋa na: Do, baba na baki ngaya, a kin shkè!

¹⁷A ngwoz a m'mbeƌa na a ma: Baki ga azɓai! A Yèsu a ngaƌa na: Ka goƌ zura'a, baki ngaya azɓai.

¹⁸Ko do a gi bakihi zlam, a nenga'a man ka te pa antanta, baki ngaya ka ɓai. Narsa, a vava.

¹⁹A ngwoz a ngaƋa na: Bai, i rka, ka, ka ndo nhadka ma.

²⁰Babhi nga ta tsu ri a Zhiklè a géƋ za haha, a kinè, kin gaƋa sam ntsi ri Zhiklè a zhè te kokwar Jérusalem.

²¹Yèsu a ngaƋa na: Ngwoz, co ma ga! Patsa'a a di a shkè, aman kin da tsi ri a Bab Zhiklè a géƌ za ka ɓai, te kokwar Jérusalem ka ɓai.

²²Kin tsi ri a skwi man kin sun ɓai. Aman nga, nga tsi ri a skwi man nga suna: skwi m'mbel ndo a shkè te ndohi Juif.

²³Aman patsa'a a shkè, ani a zhè ma, aman ndohi man ta tsi ri Zhiklè zura'a, ta tsi ri a Bab Zhiklè te Mèzhèɓ Zhiklè, a nzura'a. Aman Bab ga a woya a ta tsi ri arsa.

²⁴Zhiklè, Mèzhèɓ, a ndohi man ta woya a ta tsi ria'a, sèi ta tsi ria'a te Mèzhèɓ, a nzura'a.

²⁵Ngwoz a ngaƋa na: I suna, Messie a di a shkè, ta baba na Kristi. Aman nenga'a a da shkè ma, a da senda nga skwi tèlèba.

²⁶Yèsu a ngaƋa na: Nenga'a iyè, man nga gèƋè a ka, haha.

²⁷Teva man tagèƋè, golahi nenga'a ta shkè, a ta rzl ta: ta gaƌa ma mè a ngwoz haha? Aman ko staƋ a ndzhaƋa ɓai: ka njè na ma mè?

²⁸A ngwoz a njèkeda duzlak nenga'a, a ndo a kokwar, a ngaƋa ta ndohai:

²⁹Vowashkè, varka ndo ngiƋè man a gaƋayè skwi tèlèba man i gau. Nenga'a Kristi ka ɓi Ƌè?

³⁰A to do a sam na.

³¹A golahi nenga'a ta tétika na skwi n'ndi a gèƋ a Yèsu, a ta tsa na rai: Rabbi, ndau!

³²Aman Yèsu a ngaƋa ta: I ngots skwi n'ndi man kin sun ɓai.

³³A golahi Yèsu ta goƌ a va ta: Ndo ngiƌè a ncko na skwi n'ndi Ƌè?

³⁴A Yèsu a ngaƋa ta: Na haha, skwi n'ndi ga, aman i gi skwi man ndo nzlindekayè a woya i gia'a, a i ndivè mizlinè nenga'a.

³⁵Kin gèƋè azɓi Ƌè? Na haha, njèkè ki faƋ, a ta da ɓicè skwai. Na haha, i gaƋa kinè: Vangul dai, a kin rka gi dau. Skwi n'nga ma, aman ta ɓicè'a antanta.

³⁶A ndo man a tsi dau, a ngècè skwi ntul na, a ɓicè skwi a nshèffè a mèƋèp. A ndo nzlekai, a ndo ntsi dau, ta wuffè a géƋè'a cèw ta ba.

³⁷Na haha ma nzura'a: Ndo ngiƋè a zlekia'a, ndo ngiƋè a ɓicè'a.

³⁸l zlinde kinè aman kin ɓicè skwai a sam man kin ga mizlinè a pa ɓai; ndohi ngiƋè ta gu mizlinè, a kin kèlè a géƋè'a.

³⁹A ndohi Samarie kumba te kokwar ta co Yèsu a ndav, a géƋ ma man ngwoz a gaƋa ta, man a n'ngreda ta: A ngaƋayè skwi tèlèba man i gau.

⁴⁰Aman ndohi Samarie ta shkè, ta tsu ria'a, aman a nzi a sam ta. A Yèsu a n'nza a sam ta m'mèn cèw.

⁴¹A ndohi kumba ta co a ndav, a géƋ njèma nenga'a, a ta gaƋa na ngwoz:

⁴²Anai nga co Yèsu a ndav a géƋ ma ngaya genè ka ɓai. Aman nga ba, nga tsena, a nga suna a ri nga, nenga'a ndo m'mbel herkeda a vava.

⁴³Te deɓ m'mèn cèw a njèkeda kokwar, a ndo a kokwar Galilée.

⁴⁴Aman Yèsu a n'ngreda a ri na, a ngaƋa: Ta cè ma ndo nhadka ma te kokwar bab na azɓai.

⁴⁵Aman a mdo a kokwar Galilée, ndohi Galilée ta feda Yèsu a gai, aman ta rka skwi tèlèba man a gu te kokwar Jérusalem te ngolala. Tenga'a ba to do ngolala.

⁴⁶A Yèsu a mshkè a deɓa a kokwar Cana te Galilée, a sam man a ngwoda iyam a barassa.

⁴⁷Bigol bi ngiƋè a zhè, kra nenga'a mbelakaɓai te kokwar Capemaum. Nenga'a a ntsena'a, Yèsu a mshkè te kokwar Judée, a nƋè a kokwar Galilée, a ndo a sam na, a ntsu ria'a, aman a shkè, a ntakaha kra na. Skwa a ndza na a vata, a woy m'metsai.

⁴⁸A Yèsu a ngaƋa na: Aman kin rka skwi malwuƌi a nrkedi ɓai, kin cè a ndav azɓai!

⁴⁹A bigol bai a ngaƋa na: Bai, washkè, ga kra ga a metsai!

⁵⁰A Yèsu a ngaƋa na: Do, kra ngaya a zhè a nshèffè. A ndo matsa a nco ma Yèsu a ndav, a ndo.

⁵¹Aman a ndo, a ta zli gèƋ a ɓèlèlihi nenga'a, a ta ngra na: Kra ngaya a zhè a nshèffè!

⁵²A nenga'a a ndzhoƋo: N'nga na dara a sam tèkè? A ta gaƋa na: Adatsa a géƌ pats, vogwa a va a ndal na.

⁵³A bab kra a suna, nasa sam man Yèsu a ngaƌa na: Kra ngaya a nzi a nshèffè. A nenga'a, a gi nenga'a tèlèba, ta co Yèsu a ndav.

⁵⁴Nasa nrkedi macecèwa'a, man Yèsu a gau, aman a shkè te kokwar Judée, a ndo a kokwar Galilée.