Read Mofa New Testament Acts 16 Bible Online

Acts 16 - Mofa New Testament bible

Acts 16

¹A Paul a mshkè a kokwar Derbe a Lystre. Na haha gol Yèsu ngiƋè a zhè, nzlembaƋ na Timothèe, kra ngwoz Juif man a nco Yèsu a ndav na. Bab nenga'a ndo Grec.

²Labar ma nenga'a amba a sam kramamhi te Lystre, a Icone.

³Paul a woya, aman nenga'a a Ƌè a vna, a nco, a n'ngela na ngwon, a géƋ ndohi Juif man ta zhè a sama'a, aman tèlèba ta suna, bab nenga'a ndo Grec.

⁴Aman to do a kokwar, kokwar, ta fa ta ma a gèƋ a ndohai, aman ta jèjèr ma man ndohi sak a ndohi nhala'a te kokwar Jérusalem ta va ta.

⁵A mpi ndohi Zhiklè tèlèba ta ngots wuƋai te ncè-a-ndav, a ndohi ta shkè na va, a va, a nciƋ sam a nciƋ sam.

⁶A ta bozl ndev Phrygie, a Galatie. Aman Mèzhèɓ Zhiklè a mva ta civèƌ ɓai, aman ta nju ma Zhiklè te Asie.

⁷Aman ta shkè a Mysie, ta woy a ta bèzlè ndev Bithynie; aman Mèzhèɓ Yèsu a mva ta civèƌ ɓai.

⁸Gar haha to do auda a tsagi Mysie, a ta shkèhai a kokwar Troas.

⁹A nshunè a nkeƌa Paul a vaƌ, a nrka ndo Macédoine ngiƌè, nzlatsa, a ntsi rai, a gaƌa: Washkè auna a Macèdoine, a ka takaha nga!

¹⁰Mrke nshunè ma, nga slambaƌa, a ngo do Macèdoine tsam tsam, aman nga suna, a vava, Zhiklè a baba nga, aman nga Ƌè a nga njè ma mbela'a te pa.

¹¹A nga jèkeda kokwar Troas, a ngo do acivèƋ ndul ndula'a a kokwarSamothrace. Te mangoslèma'a a kokwar Néapolis,

¹²te pa a kokwar Philippes, mbìa nenga'a te Macédoine tèlèba, kokwar sojè.

¹³A nga nza a kokwar sa m'mèn kètè. A pats nshèk va, ngo do auda a ma kokwar, a ma iyam mbia'a, aman nga hur sam nîsi rai, a nga nzahai. A nga gaƋa ta ngwozai, man ta ɓica a pa ma.

¹⁴A ngwoz ngiƋè man a gi zlau Bi Zhiklè, nzlembaƋ na Lvdie, ngwoz mprè maslaka, ie kokwar Thyaíire, a ntsena"a. A Bi Zhikle a mwina ndav na, aman a fa na zlembaƋ a ma Paul.

¹⁵A nenga'a, a gi nenga'a tèlèba ta gu baptême, a ntsa nga rai, a ngaƋa: Aman kin rkayè ara ngwoz man a nco Bi Yèsu a ndav, sèi kin shkè a gi ga, a kin nzi a pa. A ngu mbuh mbuh.

¹⁶Aman ngo do a sam ntsi rai, nga zlü gèƋ a ngwoz, ɓèl ngiƋè, mèzhèɓ ambaɓia'a man a hodko ma, a ga na. A nhelka ta suli gani a babgihi na kumba, a géƋ nhèƋè ma nenga'a.

¹⁷A sam tèlèba a ndzadzarka nga, nga a nda Paul, a ngoƋ a wuƋai: Ndohi haha ɓèlèlihi Zhiklè te géƋè'a, man ta njè kinè civèƋ m'mbel ndo!

¹⁸A ngu arsa m'mèn kumba. A skwi haha a ndza na a ndav a Paul, a n'ngwoda ma a deɓa, a ngaƋa na mèzhèɓ ambaɓia sa: I gaƋa ka a ma staƋ, a nzlembaƋ Yèsu Kristi: Do auda te nenga'a! A nasa nasa mezheɓ a njèkeda.

¹⁹Aman babgihi nenga'a ta rka, suli gani tenga'a a nze na, ta co Paul a Silas, a ta ngazl ta a sam ncèmma, a sam ndohi mbibihia'a.

²⁰A to do a sam bihi sojè, a ta gaƋa: Ndohi haha ta dzakaɓa kokwar nga, tenga ndohi Juif,

²¹a ta njè maya nshèffè, man nga, ndohi Rome, nga slaha a nga cè'a a nga gia ɓai.

²²A ndohi ta gu ndav a géƋ tenga'a, a bihi sojè ta kuratsa maslaka tenga'a a ta gaƋa, aman ta ndah ta a mènèwèd.

²³Aman ta ndah ta ma, ta pe ta a gi dangai, a ta gaƋa na ndo mɓer dangai, aman a ɓer ta mbelembela.

²⁴A ndo mɓer dangai a mpe ta a gi dangai nt'hwaƌa'a, a mpa ta shèla a sak.

²⁵A géƋ vaƋ, Paul a Silas ta tsu rai, a ta slu dimèsh nslébèrƋè Zhiklè. A ndohi dangai tèlèba ta tsena'a.

²⁶A nasa nasa herkeda a gudzai, a verzi gi dangai a gudzai, a ntamagihai ta win ta, a cèlèlèu ndohi dangi ta wush ta hai.

²⁷Aman ndo mɓer dangai a mpiƌèkwe na, a nrka ntamagi dangai mwinèa, a mpho gwèsh, a woya a nzli da'ai na, a nhur ndohi dangai tèlèba ta hu ta.

²⁸Aman Paul a mbaha na a wuƋai, a ngaƋa: Ka lama na va ngaya ɓai, nga tèlèba nga zhè!

²⁹A ndo mɓer dangai a ndzhoƋo vogwa, a mhu a pa, a ngudzai, a nkalahi a deɓ sak Paul a Silas,

³⁰a nde ta auda, a ngaƋa: Bihi ga, i gi be kè, aman i mbél ga?

³¹Ta gaƋa: Co Bi Yèsu Kristi a ndav ngaya, a ka, a gi ngaya kin mbel kinè.

³²A ta ngra na ma Zhiklè, a nenga'a, a ndohi tèlèba man ta zhè te gi na.

³³A vaƋ sa, a nasa nasa a nhel ta a sam na, a mpana ta sam man ta ndah ta a pa murmura'a, a ngau bapteme a ndohi nenga'a tèlèba.

³⁴A nde ta a gi nenga'a, a mva ta skwi n'ndai, a ta wuffè a ndohi gi nenga'a tèlèba, a géƋ man a nco Zhiklè a ndav na.

³⁵Aman sam nciƋa ta, bihi sojè ta zlinde ta sojèhai, a ta gaƋa:

³⁶Vapre ta ndohi sa! A ndo mɓer dangai a n'ngra na ma haha a Paul: Bihi sojè ta zlündo ndo, aman kin pra'a. Anai vodo a gumai!

³⁷Aman Paul a ngaƋa ta: Ta ndah nga a mènèwèƋ ambalai a sam di ndohi tèlèba, ta ga kita ɓai, nga ndohi Rome, a ta pe nga a gi dangai, a ta woy a ta pre nga a metsar Ƌè? Az arsa ɓai! Sèi ta shkè a ta de nga auda a ri ta.

³⁸A sojèhi ta ngra ta ma haha a bihi sojè. A ta gu zlau, aman ta tsena'a, ta ndohi Rome.

³⁹A ta shkè, a ta bid ta, a ta de ta auda, a ta tsu rai, aman ta jèkeda kokwar.

⁴⁰A to do auda te gi dangai, a to do a gi Lydie. Aman ta rka kramamhi ta, a ta bid ta ma, to do ta.