Read Mofa New Testament Romans 5 Bible Online

Romans 5 - Mofa New Testament bible

Romans 5

¹Arhan anai nga ga'a a ndohi nzura'a te ncè-a-ndav, nga ngots gumi Zhiklè, te Bi nga Yèsu Kristi.

²Te Yèsu, a ncè-a-ndav, nga ngots civèƌ pombi haha. Ngawuffokoya, a nga zhèr n'njèl Zhiklè te ndav, man a di a shkè, man Zhiklè a da va nga.

³A va za'a: Ngawuffokoya a gèƌ skwi mwuƌitpa, te man nga suna, skwi mwuƌitpa a gi aman nga zhèr skwia dai.

⁴A gèƌ man nga zhèr skwia dai, nga nzi tara'a; a géƌ man nga nzi tara'a, nga zhèrè te ndav.

⁵Nzhèrè te ndav a pa nga hori a di azɓai, te man mwoy-ndo Zhiklè a zhè te ndav nga te Mèzhèɓ nenga'a nkezla'a man a mva nga.

⁶Aman Kristi a m'mets na a géƋ nga, te va man wuƋi nga az di ɓai; tiƋè sama ma, Kristi a m'mets na a géƋ ndohi man wuƋi ta azɓai.

⁷A géƋ ndo nzura'a, ndo a woya a nvi nshèffè azɓai. A géƋ ndo man amba, ar a slaha a mvi nshèffè genè.

⁸Aman Zhiklè a ngreda mwoy-ndo nenga'a a sam nga, te man Kristi a m'mets na a géƋ nga, aman nga ndohi malihi dai.

⁹Holhola'a a da ɓir nga a sam ndzoan Zhiklè, te man antanta nga ga'a a ndohi nzura'a te pombaz nenga'a.

¹⁰Aman Zhiklè a m'menda gumi a hai te m'metsi kra nenga'a, te va man nga mayamhi Zhiklè dai, holhola'a antanta, man gèƋ nga mpela ma, nga da mbel nga te nshèffè nenga'a.

¹¹Aman klèng di ka ɓai. Aman nga wuffè a géƋ Zhiklè te Bi nga Yèsu Kristi, te nenga'a nga ngots skwi m'mindè gumi a hai.

¹²Gar haha ara man a géƋ ndo staƋ malai a mshkè a herkeda, a m'metsai a mshkè a géƌ malai, m'metsai a zlézlèmè a géƌ ndohi tèlèba, a géƋ man ta tèlèba ta gu malai.

¹³Aman malai a zhè t'herkeda, ga ma kita Zhiklè a shkè. Aman a sam man ma kita Zhiklè azɓai, ta fa na gèƋ a mali azɓai.

¹⁴M'metsai a ngu bai, a hün te Adam, ha nda na ma a Moise, a géƋ ndohi tèlèba, a géƋ tenga'a ba, man ta ga mali lèmèlèmè ara Adam ɓai. Adam nara ndo man a di a shkè dai.

¹⁵Aman pombi man Zhiklè a mvau, a lèmdè a mali azɓai. A géƋ mali ndo staƋ, ndohi kumba ta bazl ta; aman pombi Zhiklé a zlézlème holhola'a a géƌ pombi ndo staƌ, Yèsu Kristi, man ndohi kumba ta ngotso.

¹⁶Mba skwi man Zhiklè a vau, a géƋ skwi ngedassa'a a géƋ mali ndo staƋ. Aman kita mali ndo staƋ a Ƌè a sam mphomda'a. Aman pombai a takaha ta ndohi malihi kumba, a ta ndi a ndohi nzura'a.

¹⁷Aman a géƋ mali ndo staƋ, m'metsi a gi bai, mba bi tenga'a man ta ngècè pombi mbia'a te nshèffè ta, a ngizura Zhiklè, a géƋ ndo staƋ, Yèsu Kristi.

¹⁸Ara man mali ndo staƋ a de ta ndohi tèlèba a sam mphomda'a, ngi skwi nzura'a ndo staƌ ba, ngizura'a man a vi nshèffè a ndohi tèlèba.

¹⁹Ara man a gèƌ ndo staƋ, man a gu mèdègèƋ, ndohi kumba taga'a a ndohi malihai, a gèƋ ndo staƋ, man a fa na gèƋ, ndohi kumba ta ngècè ngizura'a.

²⁰Aman ma kita Zhiklè a gu aman malai a ngredè auda holhola'a. A sam man malai n'ngreda auda holhola'a, pombi ba n'ngreda a fena'a.

²¹Aman lèmèlèmè ara malai a gu bai a m'metsai, lèmèlèmè pombi ba a da gi bai a ngizura'a a nshèffè a mèdèp, te Yèsu Kristi, Bi nga.