Read Mofa New Testament Jude 1 Bible Online

Jude 1 - Mofa New Testament bible

Jude 1

¹Jude, ɓèl Yèsu Kristi, kramam Jacques, a sam ndohi man Zhiklè a baba ta, man Zhiklè, Bab nga, a woy ta, a Yèsu Kristi a ɓer ta.

²Kin da su Zhiklè te va kumba! A gumi a mwoy-ndo a ndav da zhè kumba a sam kinè!

³Kinè dalahimam ga! Nshèlèkura'a i huro ara man i windè kinè ma a géƌ skwi m'mbel nga man nga a nda kinè, nga ngotso. Aman te deɓa'a i gaƌa, sèi i bid kinè te ƌèlèwèr ga, aman kin gi var a kin nza na a deɓa a ncèand'av man Zhiklè a mva ta ndohi na, sak staƌ a mèdèp.

⁴Ndohi faƌkata ta wuca kinè va, kita tenga'a mwindèa n'nzi a zhè aranta ma: tenga'a ndohi man ta woy Zhiklè ɓai, ta ngwode pombi Zhiklè nga a ntétékè tenga'a, a ta cèkèlma a géƌ Bi nga Yésu Kristi, ndo ncè nga ma staƌgenè.

⁵Kin sun tèlèba ma: a i woy a i hodko kinè ma a gèƌ: Bi Zhiklè man nshèlèkura'a a takaha ta ndohi Israel a ta shkè auda te kokwar Egypte, a mbazl ta pats ngiƌè te deɓa'a, a gèƌ man ta ca a ndav ɓai.

⁶Vahur golahi Zhiklè ba; aman ta ɓera maya man ta ngots te ri Zhiklè ɓai, a ta jèkeda sam nzi ta, Zhiklè a ndzaw ta te ruva a cèlèlèu a mèdèp, ba pats kita mbia'a.

⁷Vahur SoƋome a Gomorrhe a kokwarhi man a tsagia'a, man ta gu mphömè lèmèlèmè ara golahi Zhiklè, a ta dzodzor ntètèkè tsaƌ tsaƌ t'hai. Ta fa ta kita a gèƌ te vogwa a mèdèp, a ndohi tèlèba ta slaha a ta hèrè'a.

⁸Lèmèlèmè tenga'a man ta nza herzlawa'a, man ta lizha va ta, ta woy Zhiklè a bi ta ɓai, a ta dérƋè skwi Zhiklè n'nzala'a.

⁹Michel, bigol Zhiklè, man ta bozl va a madzagai a géƋ nckondo Moise, a woya a mphomde madzagi ɓai, a ngaƋa: Bi Zhiklè da ga ka kita a gèƋ!

¹⁰Aman ndohi haha ta ngwèshè a skwi man ta sun ɓai. Arskwi man ta slaha a ta suna a zhè; aman ta ara skwi dakhai, man ta sun skwi ɓai, ta gedassa va ta a ri ta.

¹¹Wobau a géƋ tenga'a! Ta beza a civèƋ Cain, a ta gu mali ara Balaam a géƋ sulai, a ta bazl ta lèmèlèmè ara ndohi nrubi Coré.

¹²Tenga'a skwi horai, man ta gi hori ngi golahwaƌ azɓai, man ta ɓicè va a sam skwi n'ndai, a ta war va ta genè. Tenga'a ta ara vanai man iyam a te pa ɓai, man kozlar a patsedaussa; wofhi man ta yi azɓai, ko tiƌè sama ma, ta bazl ta, a zluzlor t'uda;

¹³ngid va iyam mbia'a, man a hubatka skwi hori tenga'a man ta gau, auda; bantihai nian ta wush ta hai, man sam n'nzi ta te ruva ntéƌèƌika'a a mèdèp.

¹⁴Enoch ba, ndo matsaraƌa'a te verzi Adam, a nhodko ma a géƌ tenga'a, a ngaƋa: I rka Bi Zhiklè a shkè a nda ndohi nkezla'a gozhèm gozhèm kumba,

¹⁵aman a gi kita a géƋ ndohi tèlèba, a ngra ta mali a ndohi tèlèba jnan ta woy civèƋ Zhiklè ɓai, a ngra ta ndérƋè ma tèlèba man ndohi malihai, man ta woy civèƋ Zhiklè ɓai, ta durƋo Zhiklè a vna.

¹⁶Tengahi ndohi man ko skwi mèmè ambaba ta ɓai, ta kuƋi a va, a ta jèjèr ntétékè tenga'a. Ta gèƋ ma nfi va, a ta shibèndè ndo, aman ta ngècè skwai.

¹⁷Aman kinè, dalahimam ga, vahur ma man ndohi sak Bi nga Yèsu Kristi ta gaƋa kinè hala'a.

¹⁸Aman ta gaƌa kinè, man ndul ndul ndikèma skwi tèlèba, ndohi ndérƋè ndo ta zhè, man ta jèjèr ntétékè te ndav tenga'a, man ambaba Zhiklè ɓai.

¹⁹Tenga'a ta poko ta gèƋ auda a ta kezla ndohai. Ta hér skwi herkeda. Ta ngatsa Mèzhèɓ Zhiklè ɓai.

²⁰Aman kinè, dalahimam ga, vagra a ma ma te ncè-a-ndav nkezla'a a vava, vatsu ri te Mèzhèɓ Zhiklè nkezla'a,

²¹vaɓür va kinè te mwoy-ndo Zhiklè, vozhoro aman Bi nga Yèsu Kristi a va kinè nshèffè a mèdèp, a géƋ man nga sia te va.

²²Ndohi man ta pi gèƋ cèw da se kinè te va;

²³vangazlka ta auda te vogwa, vambel ta! Tengahi ngiƋè da se kinè te va, aman vagu zlau; vagu shèwa a ntétékè tenga'a man a lizhè ndav ta.

²⁴A nenga'a, man a slaha a mɓer kinè, aman kin kèlèhi a mali azɓai, aman a zlatsede kinè a sam di na a n'njèl na, jèlèlè'a, a mwuffè,

²⁵a Zhiklè staƋgenè man a mbel nga te Yèsu Kristi, Bi nga, n'njèlè nslébèrdè, wuƋai a wuƋibai, te nhinkaƋ na, antanta, a ndè a ma ma a mèdèp. Amen.