Read Mokanda na Bomoi 1 Masolo ya Kala 27 Bible Online

1 Masolo ya Kala 27 - Mokanda na Bomoi bible

1 Masolo ya Kala 27

¹Tala bana ya Isalaele oyo bazalaki kosalela mokonzi : ezalaki na bakambi ya mabota, bakonzi ya bankoto mpe ya bankama ya basoda mpe bakomi mikanda. Mosala na bango ezalaki : kotala makambo oyo etali mabongisi ya mampinga. Sanza na sanza kati na mobu, lisanga moko ezalaki kokota na mosala mpe lisanga mosusu ezalaki kobima. Lisanga moko na moko ezalaki na mibali nkoto tuku mibale na minei.

²Mpo na sanza ya liboso : lisanga ya Yashobeami, mwana mobali ya Zabidieli ; lisanga yango ezalaki na mibali nkoto tuku mibale na minei.

³Yashobeami azalaki mokitani ya Peretsi mpe azalaki mokonzi ya bakonzi nyonso ya mampinga mpo na sanza ya liboso.

⁴Mpo na sanza ya mibale : lisanga ya Dodayi, moto ya libota ya Aoyi. Mikiloti azalaki mokambi ya lisanga ya Dodayi. Lisanga yango ezalaki na mibali nkoto tuku mibale na minei.

⁵Mpo na sanza ya misato : lisanga ya Benaya, mwana mobali ya Yeoyada, mokonzi ya Banganga-Nzambe ; lisanga yango ezalaki na mibali nkoto tuku mibale na minei.

⁶Benaya azalaki moko kati na basoda ya mpiko tuku misato mpe azalaki mokonzi na bango ; Amizadabi, mwana na ye ya mobali, azalaki moko kati na basoda ya lisanga yango.

⁷Mpo na sanza ya minei : lisanga ya Asaeli, ndeko mobali ya Joabi. Zebadia, mwana na ye ya mobali, akitanaki na ye ; lisanga yango ezalaki na bato nkoto tuku mibale na minei.

⁸Mpo na sanza ya mitano : lisanga ya mokambi Shamewuti, moto ya libota ya Yizirayi ; lisanga yango ezalaki na mibali nkoto tuku mibale na minei.

⁹Mpo na sanza ya motoba : lisanga ya Ira, mwana mobali ya Ikeshi, moto ya libota ya Tekoa ; lisanga yango ezalaki na mibali nkoto tuku mibale na minei.

¹⁰Mpo na sanza ya sambo : lisanga ya Eletsi, moto ya libota ya Peloni, moko kati na bato ya libota ya Efrayimi ; lisanga yango ezalaki na mibali nkoto tuku mibale na minei.

¹¹Mpo na sanza ya mwambe : lisanga ya Sibekayi, moto ya libota ya Usha, moko kati na bakitani ya Zera ; lisanga yango ezalaki na mibali nkoto tuku mibale na minei.

¹²Mpo na sanza ya libwa : lisanga ya Abiezeri, moto ya libota ya Anatoti, moko kati na bato ya libota ya Benjame ; lisanga yango ezalaki na bato nkoto tuku mibale na minei.

¹³Mpo na sanza ya zomi : lisanga ya Maarayi, moto ya libota ya Netofa, moko kati na bakitani ya Zera ; lisanga yango ezalaki na mibali nkoto tuku mibale na minei.

¹⁴Mpo na sanza ya zomi na moko : lisanga ya Benaya, moto ya libota ya Piratoni, moko kati na bato ya libota ya Efrayimi ; lisanga yango ezalaki na mibali nkoto tuku mibale na minei.

¹⁵Mpo na sanza ya zomi na mibale : lisanga ya Elidayi, moto ya libota ya Netofa, moko kati na bakitani ya Otinieli ; lisanga yango ezalaki na mibali nkoto tuku mibale na minei.

¹⁶Tala bakonzi ya mabota ya Isalaele : Mpo na libota ya Ribeni : Eliezeri, mwana mobali ya Zikiri ; mpo na libota ya Simeoni : Shefatia, mwana mobali ya Maaka ;

¹⁷mpo na libota ya Levi : Ashabia, mwana mobali ya Kemweli ; mpo na libota ya Aron : Tsadoki ;

¹⁸mpo na libota ya Yuda : Eliwu, ndeko mobali ya Davidi ; mpo na libota ya Isakari : Omiri, mwana mobali ya Mikaeli ;

¹⁹mpo na libota ya Zabuloni : Yishimaeya, mwana mobali ya Abidiasi ; mpo na libota ya Nefitali : Yerimoti, mwana mobali ya Azirieli ;

²⁰mpo na libota ya Efrayimi : Oze, mwana mobali ya Azazia ; mpo na ndambo ya libota ya Manase : Joeli, mwana mobali ya Pedaya ;

²¹mpo na ndambo ya libota ya Manase kati na Galadi : Yido, mwana mobali ya Zakari ; mpo na libota ya Benjame : Yaasieli, mwana mobali ya Abineri ;

²²mpo na libota ya Dani : Azareeli, mwana mobali ya Yeroami. Bango wana nde bazalaki bakonzi ya mabota ya Isalaele.

²³Davidi atangaki te molongo ya mibali oyo bazalaki na se ya mibu tuku mibale ya mbotama, pamba te Yawe alakaki ete akokomisa Isalaele ebele lokola minzoto ya likolo.

²⁴Joabi, mwana mobali ya Tseruya, abandaki kotanga bango kasi asilisaki te. Pamba te likolo ya botangi wana, Yawe akitiselaki Isalaele kanda na Ye. Boye, motango ya bato yango ekomamaki te na buku ya masolo ya mokonzi Davidi.

²⁵Azimaveti, mwana mobali ya Adieli, azalaki kobatela bibombelo ya bozwi ya mokonzi. Jonatan, mwana mobali ya Oziasi, azalaki mobateli ya bibombelo na bazamba, na bingumba, na bamboka mike mpe na bandako milayi.

²⁶Eziri, mwana mobali ya Kelubi, azalaki mokambi ya basali bilanga ;

²⁷Shimei, moto ya engumba Rama, azalaki mobateli bilanga ya vino ; Zabidi, moto ya engumba Shefami, azalaki mobateli masanga ya vino mpe bilanga ya vino.

²⁸Bala-Anani, moto ya engumba Gederi, azalaki mobateli banzete ya olive mpe ya sikomori, na lubwaku ya ngambo ya weste ; Yoashi azalaki mobateli mafuta ya olive ;

²⁹Shitrayi, moto ya engumba Saroni, azalaki mobateli bangombe oyo ezalaki kolia na Saroni ; Shafati, mwana mobali ya Adilayi, azalaki mobateli bangombe na mabwaku.

³⁰Obili, moto ya libota ya Isimaeli, azalaki mobateli bashamo ; Yedeya, moto ya libota ya Meronoti, azalaki mobateli ba-ane ya basi.

³¹Yazizi, moto ya libota ya Agari, azalaki mobateli bibwele. Bango nyonso bazalaki babateli bozwi ya mokonzi Davidi.

³²Jonatan, ndeko ya tata ya Davidi, azalaki mopesi toli, moto ya mayele mpe mokomi mikanda. Yeyeli, mwana mobali ya Akimoni, azalaki kolandela bana mibali ya mokonzi.

³³Ayitofeli azalaki mopesi toli ya mokonzi ; mpe Ushayi, moto ya Ariki, azalaki mobateli sekele ya mokonzi.

³⁴Yeoyada, mwana mobali ya Benaya, elongo na Abiatari, bakitanaki na Ayitofeli. Joabi azalaki mokonzi ya mampinga ya mokonzi.