Read Mokanda na Bomoi Yobo 10 Bible Online

Yobo 10 - Mokanda na Bomoi bible

Yobo 10

¹Nayini bomoi na ngai ! Nakokoba kaka komilela, nakoloba na mongongo makasi mpe na pasi ya motema na ngai.

²Nakoloba na Nzambe : ‹ Kokatela ngai etumbu te, yebisa ngai mabe nini nasali ! ›

³Boni, ozali kosepela konyokola ngai, kobwaka ekelamu oyo maboko na Yo esali, mpe kolongisa mabongisi ya bato mabe ?

⁴Boni, ozali na miso ya mosuni ? Ozali komona lokola bato ?

⁵Boni, mikolo na Yo ezali lokola mikolo ya bato, mpe mibu na yo, lokola mibu ya bato,

⁶mpo ete oluka mabe na ngai to okundola masumu na ngai,

⁷atako oyebi malamu ete nasali na ngai mabe te, mpe ete ezali na moto moko te oyo akoki kokangola ngai na loboko na Yo ?

⁸Maboko na Yo nde ebongisaki ngai mpe esalaki ngai ; olingi sik’oyo kobenda nzoto mpe koboma ngai ?

⁹Kanisa ete Yo moko nde obongisaki ngai lokola mabele ya bikeko ; olingi sik’oyo kozongisa ngai na putulu ?

¹⁰Osopaki ngai lokola miliki te ? Okangisaki ngai mbuma-mbuma te lokola fromage ?

¹¹Olatisaki ngai poso ya nzoto mpe misuni te ? Otongaki mikuwa mpe misisa na ngai te ?

¹²Opesaki ngai bomoi mpe otalisaki ngai bolamu ; mpe na bonzambe na Yo, obatelaki molimo na ngai.

¹³Kasi tala likambo oyo obombaki kati na motema na Yo, mpe nayebi ete ezalaka kati na makanisi na Yo.

¹⁴Soki nasalaki masumu, olingaki komona ngai, mpe olingaki te kozanga kopesa ngai etumbu mpo na masumu na ngai.

¹⁵Soki nazali na ngambo, wana mawa na ngai ! Ata nasali mabe te, nazali kokoka te kotombola moto, pamba te natondisami na soni mpe nazindi kati na pasi na ngai.

¹⁶Soki nameki kotombola moto, ozali kolanda ngai lokola nkosi mpe ozali kobimisela ngai mayele na Yo nyonso mpo na kotelemela ngai,

¹⁷ozali komemela ngai batatoli ya sika mpo na kotelemela ngai, ozali kopelisela ngai kanda na Yo mpo na kosala ngai mabe, mampinga na Yo bazali tango nyonso koya kobundisa ngai.

¹⁸Mpo na nini obimisaki ngai na libumu ya mama na ngai ? Nalingaki na ngai kokufa, mpe liso moko te elingaki komona ngai.

¹⁹Soki kutu nazalaka na ngai te, nalingaki koleka kaka mbala moko longwa na libumu ya mama kino na kunda.

²⁰Boni, mwa ndambo ya mikolo na ngai esili te ? Kende ata mosika na ngai mpo ete nazwa ata tango ya kosepela

²¹liboso ete nakende na esika oyo bato bazongaka lisusu te, na mokili ya molili, mokili ya kufa,

²²na mokili ya molili makasi, ya kufa mpe ya mobulu, epai wapi ata pole ezalaka molili. »