Read Mokanda na Bomoi Yobo 12 Bible Online

Yobo 12 - Mokanda na Bomoi bible

Yobo 12

¹Yobo azongisaki :

²« Solo, bozali penza bato ; tango bokokufa, bwanya mpe ekokufa elongo na bino !

³Kasi atako bongo, ngai mpe nazali mayele lokola bino, boleki ngai na eloko te. Nani ayebi te makambo wana nyonso ?

⁴Nakomi eloko ya kotiola na miso ya baninga na ngai, ngai oyo nazali kobelela Nzambe mpo ete ayanola ngai ; moto ya sembo, moto ya alima, ye nde akomi eloko ya kotiola !

⁵Bato ya esengo basekaka bato oyo bazali na pasi, babetaka bato oyo batepaka-tepaka kisambeti.

⁶Bandako ya bato ya mobulu ezalaka na kimia, mpe bato oyo batombokelaka Nzambe, oyo bamonaka makasi na bango lokola Nzambe, bango nde babatelamaka.

⁷Kasi tuna nyama ya zamba, ekoteya yo ; tuna ndeke ya likolo, ekolakisa yo ;

⁸loba na mabele, ekoteya yo ; to tika ete mbisi ya ebale monene epesa yo sango.

⁹Kati na yango, ekelamu nini eyebi te ete loboko ya Yawe nde esalaki nyonso wana ?

¹⁰Bomoi ya bikelamu nyonso mpe pema ya bato nyonso ezali kati na loboko na Ye.

¹¹Boni, litoyi emekaka maloba te ndenge lolemo emekaka bilei ?

¹²Bwanya ezalaka kati na bampaka te ? Bomoi ya molayi epesaka mayele te ?

¹³Bwanya mpe makasi ezali epai ya Nzambe, toli mpe mayele ezali ya Ye.

¹⁴Bakokoka te kotonga lisusu oyo Ye asili kobebisa, bakokoka kokangola te moto oyo Ye asili kokanga.

¹⁵Soki akangi mayi, bokawuki ekotaka ; kasi soki afungoli yango, mokili ezindaka.

¹⁶Makasi mpe elonga ezali ya Ye ; moto oyo basili kokosa mpe moto oyo akosi, bango mibale bazali ya Ye.

¹⁷Amemaka bapesi toli na bowumbu mpe akomisaka basambisi bato ya maboma ;

¹⁸afungolaka minyololo ya bakonzi mpe akangaka liputa na baloketo na bango ;

¹⁹amemaka Banganga-Nzambe na bowumbu mpe akweyisaka bato oyo bavanda kala na bokonzi ;

²⁰akangaka minoko ya bato oyo balobaka malamu, alongolaka mikolo bososoli ;

²¹asopelaka bakonzi soni, abotolaka bibundeli ya bato ya makasi ;

²²abimisaka na pwasa, makambo ya sekele, makambo oyo ezali kati na molili, mpe abimisaka na pole bililingi oyo eleki mwindo ;

²³atombolaka bikolo mpe abebisaka yango, akomisaka minene mindelo ya bikolo mpe apanzaka yango ;

²⁴alongolaka makanisi ya bakonzi ya bikolo mpe asalaka ete batambola kati na bisobe oyo ezanga nzela

²⁵mpo ete batepatepa kati na molili, na kozanga pole ; mpe asalaka ete batepatepa lokola moto alangwe masanga.