Read Mokanda na Bomoi Yobo 13 Bible Online

Yobo 13 - Mokanda na Bomoi bible

Yobo 13

¹Miso na ngai emonaki makambo oyo nyonso, matoyi na ngai eyokaki yango, mpe nasosoli yango malamu.

²Nayebi makambo nyonso oyo bino boyebi, boleki ngai na eloko moko te.

³Kasi nalingi nde koloba na Nkolo-Na-Nguya-Nyonso mpe kobundela likambo na ngai liboso ya Nzambe.

⁴Pamba te bino, bozali kobongisa lokuta, bozali lokola minganga oyo bayebi mosala malamu te.

⁵Soki bovandaki ata kimia, bolingaki ata komonana bato ya bwanya.

⁶Yoka sik’oyo maloba na ngai, yoka kosamba ya bibebu na ngai.

⁷Boni, bozali kokotela Nzambe na nzela ya lokuta mpe ya maloba ya solo te ?

⁸Bolingi kolakisa ete bozali na ngambo na Ye ? Bolingi kobundela Nzambe ?

⁹Bokosepela soki aluki koyeba makanisi ya mitema na bino ? Bokanisi ete bokoki kokosa Ye ndenge bakosaka bato ?

¹⁰Akopamela bino solo soki amoni ete, na se ya mitema na bino, boponaka-ponaka bilongi.

¹¹Boni, bokozala ata na somo ya lokumu na Ye te ? Kolenga ekokweyela bino te ?

¹²Pamba te maloba na bino ekokani na putulu, mpe makanisi na bino ezali lokola mabele ya bikeko.

¹³Botika makelele mpe botika ngai naloba ! Oyo ekoya eya !

¹⁴Mpo na nini nandima kokufa mpe nasakanela bomoi na ngai ?

¹⁵Ata soki abomi ngai, nakozala kaka na elikya na Ye, nakobundela solo nzela na ngai liboso na Ye.

¹⁶Yango kutu nde ekozala lobiko na ngai, pamba te moto moko te oyo azangi koyeba Nzambe akoki koya liboso na Ye.

¹⁷Boyoka maloba na ngai malamu ; tika ete matoyi na bino eyoka malamu makambo oyo nazali koloba !

¹⁸Sik’oyo, namibongisi mpo na kobundela likambo na ngai, nayebi ete nakolonga na kosambisama.

¹⁹Nani akoki kofunda ngai ? Soki te, nakokanga monoko mpe nakokufa.

²⁰Oh Nzambe, pesa ngai kaka biloko mibale, mpe nakobombama te liboso na Yo :

²¹longola loboko na Yo likolo na ngai, mpe tika kobangisa ngai na somo na Yo.

²²Bongo benga ngai, mpe nakoyanola ; to tika ngai naloba, mpe Yo okoyanola ngai.

²³Mabe mpe masumu boni nasali liboso na Yo ? Talisa ngai mbeba mpe masumu na ngai.

²⁴Mpo na nini obombi elongi na Yo mpe ozali kozwa ngai lokola monguna na Yo ?

²⁵Olingi kaka kotungisa lokasa oyo mopepe ezali komema ? Olingi kaka kolandela lititi oyo ekawuka ?

²⁶Pamba te okomaka makambo mabe na tina na ngai mpe okomisi ngai mokitani ya masumu ya bolenge na ngai.

²⁷Okangi makolo na ngai na minyololo ya bibende, ozali kokengela malamu lolenge na ngai ya kotambola mpe kolandela bisika nyonso oyo natiaka bilembo ya matambe na ngai.

²⁸Moto apola penza boye lokola eloko ya kopola, lokola elamba oyo balie na banselele !